Read Dagbani 2 Nanima 24 Bible Online

2 Nanima 24 - Dagbani bible

2 Nanima 24

¹ Jɛhoyakim ʒiɛmani maa ni ka Babilɔn Naa Nɛbukadnɛza daa kana ti liri Judanima, ka Jɛhoyakim daa zaŋ omaŋ’ ti o n-jɛm o yuma ata; di nyaaŋa ka o daa ti zaɣis’ o jɛmbu.

²Ka Yawɛ daa chɛ ka Kalidianim’ mini Sirianim’ ni Mɔabnim’ ni Ammɔnnim’ tɔbbihi kana ti liri Judanim’ ni bɛ ku ba kaman Yawɛ ni daa chɛ ka o daba bɛn nyɛ anabinim’ pun yɛli shɛm la.

³Ka dimbɔŋɔ daa shiri niŋ Judanima kaman Yawɛ ni zali shɛm ni o yihi ba o sani. Manaasa ni daa tum alahichi shɛŋa la

⁴min’ o ni daa lan ku ninvuɣ’ shɛb’ bɛn ka taali n-chɛ ka bɛ ʒim zo n-tiɛli Jɛrusalɛm la zuɣu ka Yawɛ daa bi chɛ bɛ taali.

⁵Jɛhoyakim ni daa tum tuun’ shɛŋa zaa pahi min’ o ni daa pun tum shɛlikam zaa, bɛ sabi di yɛla niŋ Juda nanim’ litaafi shɛŋa bɛ ni booni Yɛlikura litaafinim’ la ni.

⁶Ka Jɛhoyakim daa ti kani ka o bia Jɛhoyachin di nam zan’ o zaani.

⁷Ka Ijipti naa daa bi lan yi o ya kana, dama Babilɔn naa daa deeg’ o ni su tiŋgban’ shɛli zaa din zaŋ Ijipti kulibɔŋ shee hal ti paai Yufretiiz Mɔɣili ni.

⁸Jɛhoyachin yuma daa nyɛla yuun’ pisaayika saha shɛl’ o ni daa di nam maa. O daa di nam maa niŋla chira ata Jɛrusalɛm. O ma yuli n-daa booni Nɛhushita. Ka Nɛhushita mi ba daa nyɛ Ɛlnatan ŋun daa nyɛ Jɛrusalɛm nir’ la.

⁹Jɛhoyachin daa tum alahichi Yawɛ sani kaman o ba ni daa tum shɛm la.

¹⁰Di saha ka Babilɔn Naa Nɛbukadnɛza daa chɛ ka o tɔbbihi kana ti liri Jɛrusalɛmnima n-teei gili bɛ tiŋ’ maa.

¹¹Babilɔn Naa Nɛbukadnɛza tɔbbihi maa ni daa teei gili Jɛrusalɛm saha shɛli maa, ka ŋun’ Nɛbukadnɛza maŋmaŋ’ daa ka Jɛrusalɛm na.

¹² Ka Juda Naa Jɛhoyachin min’ o ma ni o kpambaliba ni o bidibisi ni o naazɔnim’ daa zaŋ bɛmaŋ’ ti Babilɔn naa. Ka Babilɔn naa maa daa gbaai Naa Jɛhoyachin ŋun’ Babilɔn naa maa nam dibu yuma anii saha kuli Babilɔn.

¹³O daa kpuɣi Yawɛ jɛmbu duu nɛma mini nayili nɛma zaa, ka ŋme ŋ-ŋma salima la’ shɛŋa zaa Izraɛl Naa Sulemaana ni daa mali niŋ Yawɛ jɛmbu duu la kaman Yawɛ ni daa pun yɛli shɛm.

¹⁴Ka Naa Nɛbukadnɛza daa zaŋ Jɛrusalɛmnim’ zaa mini nabihi ni tɔbutuhiri’ biinsi tuhi’ pia ni tuumbaŋsimnim’ ni machɛlinim’ zaa kul’ o ya; ka so daa bi kpalim naɣila bɛn nyɛ nandaamba kɔŋko n-daa kpalim be bɛ tiŋgbɔŋ maa ni.

¹⁵ Ka Nɛbukadnɛza daa zaŋ Naa Jɛhoyachin min’ o ma ni o paɣiba ni o kpambaliba ni bɛ tiŋgbɔŋ ni ninvuɣ’ zuɣuri n-yi Jɛrusalɛm kuli Babilɔn tiŋgbɔŋ ni nti leei daba.

¹⁶Ka Babilɔn naa daa zaŋ ninvuɣ’ kpɛma tusaayopɔin mini tuumbaŋsimnim’ ni machɛlinim’ tuhili bɛn zaa mali kpiɔŋ din ni tooi tuhi tɔbu kuli Babilɔn.

¹⁷ Ka Babilɔn Naa Nɛbukadnɛza daa zaŋ Naa Jɛhoyachin bapira Matania n-leei naa zali ŋun’ Jɛhoyachin zaani, ka taɣ’ o yuli Zɛdɛkia.

¹⁸ Zɛdɛkia yuma daa nyɛla yuun’ pisiniyini saha shɛl’ o ni daa di nam maa. O daa diya n-niŋ o nam maa ni la yuun’ piniyini Jɛrusalɛm. O ma yuli n-daa booni Hamutal. Hamutal mi ba n-daa nyɛ Jɛrimia ŋun daa nyɛ Libina nir’ la.

¹⁹Zɛdɛkia daa tum alahichi Yawɛ sani kaman Jɛhoyakim ni daa tum shɛm la.

²⁰ Yɛlimaŋli, Jɛrusalɛmnim’ mini Judanim’ ni daa chɛ ka Yawɛ suhu yiɣisi zuɣu ka o daa kari ba o sani bahi.