Read Dagbani 2 Nanima 4 Bible Online

2 Nanima 4 - Dagbani bible

2 Nanima 4

¹Anab’ so pakoli daa ti yɛli Ilaisha, “A dab’ so ŋun yi nyɛ n yidan’ la kpiya. Ka a mi mi ni a dabili maa daa nyɛla ŋun zɔri Yawɛ, amaa ka o sandana kana ni o ti zaŋ m bidibis’ ayi nti leeg’ o daba.”

²Ka Ilaisha bɔh’ o, “Ka bɔ ka a lee bɔri ni n niŋ ti a? Yɛlim’ ma a ni mali shɛl’ a yiŋa.” Ka o yɛl’ o, “A dabipaɣa ka shɛli; kulla kpaŋman’ yini kɔŋko ka m mali.”

³Ka Ilaisha yɛl’ o, “Cham’ a ʒiʒiinitab’ sani nti suhi kpaŋman’ kuma pam na, pa biɛla.

⁴Ka a chɛ ka a min’ a bidibisi maa kpe yi duu ka yo yimaŋ’ niŋ di puuni, ka zaŋ kpam maa m-boori niŋdi ŋmana maa ni; ŋman’ yini yi ti pali, ka yi vuui li zali kpaŋa.”

⁵Ka pakoli maa daa yi o sani kuli nti chɛ ka o min’ o bihi maa kpe duu ka yo bɛmaŋ’ niŋ di puuni; ka o bihi maa zaŋdi ŋmana n-zaan’ o, ka o boori kpam maa niŋdi di ni.

⁶Ka ŋmana maa zaa daa ti pali; ka o yɛl’ o bidibisi maa ni yino, “Zaŋm’ ŋman’ shɛl’ na.” Ka o yɛl’ o, “Ŋman’ shɛl’ lan kani.” Ka kpam maa mi dii ŋmaai, ka bi lan yirina.

⁷Ka pakoli maa daa lab’ ti yɛli Naawuni daanab’ maa. Ka Ilaisha yɛl’ o, “Cham’ ti zaŋ kpam maa kɔhi n-yo yi samli maa, ka chɛ din kpalim ka a min’ a bidibisi maa dira.”

⁸Dahin shɛli ka Ilaisha daa ti chaŋ Shunɛm ka paɣ’ bundaan’ so daa be nimaani m-balim o ni o dim’ bindirigu. Dinzuɣu o daa yi ti doli nimaani polo saha shɛlikam, o kpɛrila yili maa ni ti diri bindirigu.

⁹Ka paɣ’ bundan’ maa daa ti yɛl’ o yidana, “Nyama, pumpɔŋɔ m baŋya ni do’ so ŋun doli yiri ti sanna waawaayili ŋɔ nyɛla Naawuni ninvuɣ’ gahindili.

¹⁰Chɛ ka ti me dubil’ tam ti yil’ ŋɔ zuɣusaa, ka bo garo mini teebuli ni kuɣa ni firila zali di ni, o yi ti lan ka ti sanna ka o kpe nimaani.”

¹¹Dahin’ shɛli ka Ilaisha daa ti chaŋ nimaani n-kpe duu maa ni ni o ti vuhi.

¹²Ka o daa ti yɛl’ o sɔŋda Gɛhaazi, “Bolim’ Shunɛm paɣ’ maa ti ma.” Ka o daa bol’ o, ka o kana ti zan’ o tooni.

¹³Ka o yɛli Gɛhaazi, “Yɛlim’ o, ‘Nyama, a niŋ wahala pam sɔŋ ti; ka bɔ ka a lee bɔri ni ti niŋ ti a? A bɔri ni ti yɛli naa bee sapashin’ kpɛm’ yɛtɔɣ’ shɛli ti a?’ ” Ka paɣ’ maa garigi yɛli, “Mmaŋmaŋ’ niriba ni ka m be maa.”

¹⁴Ka o bɔhi, “Ka bɔ ka ti lee yɛn niŋ ti paɣa maa?” Ka Gɛhaazi garigi yɛl’ o, “To, paɣ’ maa ka bidibiga, ka o yidana mi kurigi.”

¹⁵Ka Ilaisha yɛli, “Bolim’ o na.” Ka o daa boli paɣ’ maa, ka o kana ti zani dunol’ ni.

¹⁶ Ka Ilaisha yɛl’ o, “Zaŋ chaŋ yuuni na ŋ-ŋɔ tasaha a ni gbib’ bidibiga a nuu ni.” Ka paɣ’ maa yɛli, “Aai. Wɛi, n dana, a nyɛla Naawuni nira, di yɔhim’ man’ ŋun nyɛ a dab’ paɣ’ ŋɔ!”

¹⁷Amaa ka paɣ’ maa daa shiri niŋ pua n-dɔɣi bidibiga shɛɣuni kaman Ilaisha ni daa yɛl’ o ni o ni dɔɣi saha shɛli maa.

¹⁸Ka bia maa daa mali ti zooi. Dahin shɛli ka o daa ti dol’ o ba chaŋ puu ni kachɛriba sani.

¹⁹Ka o daa ti yɛl’ o ba, “Wɛi, n zuɣu n-yaara, n zuɣu n-yaara!” Ka bia maa ba yɛl’ o tumtumdi so, “Zaŋm’ bia maa kuli ti ti o ma.”

²⁰Ka doo maa daa zaŋ bia maa nti ti o ma; ka o zaŋ o ʒil’ o naba zuɣu n-gbib’ o hal ti paai wuntaŋ’ zuɣusaa saha, ka o leei Naawuni dini.

²¹Ka paɣ’ maa daa zaŋ bia maa n-du n-kpɛhi ti sɔŋ Naawuni nir’ maa garo zuɣu; ka yina n-vooi dunoli yo.

²²Ka o daa bol’ o yidana n-yɛl’ o, “Chɛ ka tumtumdi’ yino zaŋ bun’ yino ti ma na, ka n chaŋ yomyom ti nya Naawuni nir’ ŋɔ ka labina.”

²³Ka o yidan’ maa bɔh’ o, “Bɔzuɣu ka a bɔri ni a chaŋ o sani zuŋɔ? Zuŋɔ pala gol’ palli dabisili bee Vuhim Dabisili.”[1] Ka paɣ’ maa yɛli, “Di bi galim.”

²⁴Di saha ka o daa chɛ ka bɛ zaŋ buŋ’ nyaampara pa buŋa, ka o yɛl’ o tumtumda, “Niŋm’ buŋ’ maa ka o chani yomyom, ka di chɛ ka o baligi chandi naɣila mani nti yɛl’ a ni a chɛ ka o baligi chandi.”

²⁵Ka o daa yiɣisi n-chaŋ Naawuni nir’ maa sani Kamɛl Zoli zuɣu. Naawuni Nir’ maa ni daa nya paɣ’ maa ka o kanna ka o yɛl’ o sɔŋda Gɛhaazi, “Nyama, Shunɛm paɣ’ la m-be katiŋ’ kanna ŋɔ.

²⁶Guum’ yomyom tuh’ o soli ti bɔh’ o, ‘A min’ a yidan’ ni yi bia la mal’ alaafee?’ ” Ka o garigi yɛli Gɛhaazi, “Ti mal’ alaafee.”

²⁷O ni daa mali ti paai Naawuni nir’ maa sani zoli maa zuɣu, o daa gbaala o napɔŋ, ka Gɛhaazi kana ni o ti daag’ o bahi, ka Naawuni nir’ maa yɛl’ o, “Chɛl’ o. O malila yɛli muɣisirili ka Yawɛ zaŋ li sɔɣi ma ka bi kahigi li wuhi ma.”

²⁸Ka paɣ’ maa bɔhi Ilaisha, “N daa yɛli nyini n dana ni a tim ma bia? N daa pun bi yɛl’ a ni a di yɔhim ma?”

²⁹Ka Ilaisha daa yɛli Gɛhaazi, “Malim’ shili kpuɣi n jaaŋgbee ŋɔ chaŋ. A yi ti nya so sol’ ni, nyin’ di puh’ o; ka so yi puh’ a, nyin’ di saɣi. A yi ti paai, nyin’ zaŋmi n jaaŋgbee maa pa bia maa ninni.”

³⁰Ka bia maa ma maa daa yɛli Ilaisha, “Yawɛ ŋun be ŋɔ mini nyin’ ŋun be ŋɔ zuɣu, n ku chaŋ ka chɛ a.” Ka Ilaisha daa yiɣisi dol’ o.

³¹Ka Gɛhaazi daa daŋ tooni nti zaŋ jaaŋgbee maa pa bia maa ninni, amaa ka vuhim bee nyɛvili shɛhirili kani. Dinzuɣu ka o daa ŋmaligi labina ti tuhi Ilaisha soli n-yɛl’ o, “Bia maa bi neei.”

³²Ka Ilaisha daa paai yili maa ni nti nya ka bia maa kpi n-dola o garo zuɣu.

³³Ka o daa kpe duu maa ni, ka vooi dunoli yo bɛ niriba ayi maa niŋ, ka suhi Yawɛ.

³⁴Di nyaaŋa ka o daa chaŋ ti teei dɔni bia maa zuɣu n-zaŋ o noli min’ o nina kpa bia maa noli ni o nina, ka zaŋ o nuhi pa o nuhi zuɣu; ka teeg’ omaŋ’ dolisi bia maa, ka o niŋgbuna piligi biibu.

³⁵ Ka Ilaisha daa yiɣisi chaŋchaŋ gili duu maa ni, ka ti lan lab’ ti teei dɔni bia maa zuɣu yaha. Ka bia maa daa tihim siɣimsiɣim buyopɔin, ka neeg’ o nina.

³⁶Di saha ka o daa boli Gɛhaazi na ti yɛl’ o, “Bolim’ Shunɛm paɣ’ maa na.” Ka o bol’ o. Ka paɣ’ maa kana, ka o ti yɛl’ o, “Kpuɣim’ a bia.”

³⁷Ka paɣ’ maa daa kana ti lu n-gbani Ilaisha naba ni n-zaŋ o zuɣu silim tiŋa, ka kpuɣ’ o bia maa yi.

³⁸Ka kum daa ti lu, ka Ilaisha lab’ Giligal na. Ka anabinim’ daa ti ʒi o sani, ka o yɛl’ o sɔŋda, “Zaŋm’ duɣ’ titali tam n-duɣi ʒiɛri ti anabinim’ ŋɔ.”

³⁹Ka bɛ ni yino daa yi n-chaŋ ni o ti bo ʒiɛvari na nti nya mɔɣu ni yɔɣili m-pɔhi li buɣi na nti ŋmahiŋmahi li niŋ ʒɛduɣu maa ni, ka bi mi di ni nyɛ shɛli.

⁴⁰Ka bɛ daa ti tooi li ti niriba maa ni bɛ piɛbi. Bɛ ni daa piɛbiri ʒiɛri maa ka bɛ ti kuhi yɛli, “Wɛi, Naawuni nira, Lɔɣu be duɣu maa ni!” Ka bɛ daa kɔŋ li piɛbbu.

⁴¹Ka o daa yɛli, “Dindina niŋmiya zim ti ma na.” Ka o daa zaŋ zim maa yuɣisi ʒiɛri maa ni ka yɛli ba, “Toomiya li ti niriba maa ka bɛ piɛbi.” Ka barina shɛli daa lan ka di ni yaha.

⁴²Dahin shɛli ka do’ so daa ti yi Baalishalisha n-ʒi bindir’ pala din nyɛ kapala bɔrɔbɔro kpil’ pisi mini kawaan’ maha o kpalaŋ’ ni na nti ti Naawuni nir’ maa. Ka Ilaisha daa yɛl’ o sɔŋda, “Zaŋm’ li ti niriba maa ka bɛ ŋubi.”

⁴³Amaa ka o sɔŋda maa bɔh’ o, “Wula ka n lee yɛn tooi niŋ zaŋ dimbɔŋɔ tari ninvuɣ’ kɔbiga?” Ka Ilaisha daa lan garigi yɛl’ o, “Zaŋm’ li ti ba ka bɛ ŋubi, dama Yawɛ yɛliya, ‘Bɛ ni ŋub’ li tiɣi ka guui.’ ”

⁴⁴Ka o sɔŋda maa daa zaŋ li ti ba. Ka bɛ daa shiri ŋub’ li ka guui kaman Yawɛ ni daa pun yɛli shɛm maa.