Read Dagbani 2 Nanima 6 Bible Online

2 Nanima 6 - Dagbani bible

2 Nanima 6

¹Dahin shɛli ka anabinim’ shɛb’ daa ti yɛli Ilaisha, “Nyama, luɣ’ shɛli ti ni be ka a wuhiri ti ŋɔ pɔri pam.

²Chɛ ka ti chaŋ Jɔɔdɛn Mɔɣili ni, ka ti zaa ti ŋma dari na nti me duri pahi beni.” Ka o garigi yɛli ba, “Chamiya.”

³Di saha ka bɛ ni yino daa yɛl’ o, “A yi di saɣi n-dol’ ti chaŋ.” Ka o garigi yɛli, “N ni chaŋ.”

⁴Ka o daa pahi bɛ zuɣu ka bɛ chaŋ. Ka bɛ daa paai Jɔɔdɛn Mɔɣili ni nti gbaai dari maa ŋmabu.

⁵Ka bɛ ni yino daa ŋmari daɣu ka o lɛbiɛlim ti kpaai lu kom ni. Ka o kuhi yɛli, “Mbaye, Ndana! N suhi li mi na!”

⁶Di saha ka Naawuni nir’ maa daa bɔh’ o, “Ya polo ka di lu?” Ka o wuh’ o di shee, ka Ilaisha ŋmaai daɣu n-zaŋ bahi nimaani n-chɛ ka lɛbiɛlim maa puhi pan’ na.

⁷Ka o yɛli doo maa, “Yihim’ li,” ka o zaŋ o nuu tim ha yihi li.

⁸Siria naa daa ti lo tɔbu ni o tuhi Izraɛlnima, ka daa niŋ o sapashinnim’ saawara, yɛli, “Luɣili yaakaza ka n yɛn chaŋ ti dɔni.”

⁹Amaa ka Naawuni nir’ maa daa tim ti yɛli Izraɛl naa, “Miri ka a doli yaakaza polo, dama Sirianim’ yɛn chaŋ ti dɔni la nimaani.”

¹⁰Ka Izraɛl naa tim tuumba luɣ’ shɛli polo Naawuni nir’ maa ni yɛli maa. Lala ka o daa yi pun daŋdi yɛr’ o n-chɛ ka o tilig’ omaŋ’ nimaani n-gari buyi.

¹¹Ka yɛlli maa daa muɣisi Siria naa maa pam ka o bol’ o sapashinnim’ na nti bɔhi ba, “Yi ni ŋuni n-lee be Izraɛl naa polo?”

¹²Ka bɛ ni yino garigi yɛl’ o, “N dan’ naa, ti ni so bi be o polo. Amaa anabi Ilaisha ŋun be Izraɛl tiŋgbɔŋ ni la n-yɛri Izraɛl naa a ni be a duu tɔɣisiri yɛtɔɣ’ shɛlikam.”

¹³Ka o yɛli ba, “Chamiya ti nya o ni be luɣ’ shɛli ka n tim ka bɛ ti gbaag’ o na.” Ka bɛ daa ti yɛl’ o, “O be Dɔtan.”

¹⁴Ka o daa tim tɔbbihi pam, ka bɛ zaŋ yuri mini chɛchɛbunsi n-chaŋ yuŋ ti teei gili tiŋ’ maa.

¹⁵Ka biɛɣu daa ti neerina asibaasi, ka Ilaisha sɔŋda yina nti nya ka tɔbbihi mini yuri ni chɛchɛbunsi n-kul teei gili bɛ tiŋ’ maa zaa. Ka Ilaisha sɔŋda maa kuhi yɛli, “Mbaye, n dana! Ka wula ka ti lee yɛn niŋ?”

¹⁶Ka Ilaisha garigi yɛl’ o, “Di chɛ ka dabiɛm mal’ a, dama bɛn be ti sani gari bɛn be bɛ sani.”

¹⁷Di saha ka Ilaisha daa suhi Yawɛ yɛli, “Neem’ o nina ka o nya.” Ka Yawɛ daa neei nachimbil’ maa nina ka o lihi nya ka yuri mini buɣim chɛchɛbunsi n-kul pali zoli zuɣu n-teei gili Ilaisha.

¹⁸Ka Sirianim’ maa daa kana ni bɛ ti liri Ilaisha, ka Ilaisha suhi Yawɛ yɛli, “N suhir’ a, chɛ ka niriba ŋɔ zom!” Ka o daa chɛ ka bɛ shiri zom kaman Ilaisha ni daa suh’ o yɛli shɛm maa.

¹⁹Ka Ilaisha daa yɛli ba, “Pa yi ni chani tin’ shɛli maa soli m-bɔŋɔ; pa yi mi ni chani tin’ shɛli maa m-bɔŋɔ. Doliya ma ka n zaŋ ya tahi yi ni bɔri so maa sani.” Ka o daa zaŋ ba tahi Samaria.

²⁰Bɛ ni daa ti kul kpe Samaria puuni, ka Ilaisha suhi Yawɛ yɛli, “Neem’ niriba ŋɔ nina n-chɛ ka bɛ nya.” Ka Yawɛ daa neei bɛ nina maa, ka bɛ lihi nya ka bɛ bela Samaria puuni.

²¹Izraɛl naa ni daa nya ba, o daa bɔhila Ilaisha, “M ba, n kum ba? N kum ba?”

²²Ka Ilaisha garigi yɛl’ o, “Di ku ba. A ni ku a ni zaŋ a takɔb’ min’ a tɔbu n-gbahi shɛb’ leeg’ a daba? Bomi la bindirigu ti ba ka bɛ di ka nyu kom, ka lab’ bɛ naa sani.”

²³Ka Izraɛl naa maa daa chɛ ka bɛ duɣi bindira pam ti ba, ka bɛ di ka nyu n-naai, ka o chɛ ka bɛ lab’ kuli bɛ naa sani. Ka Sirianim’ daa bi lan kana ti liri Izraɛlnim’ yaha.

²⁴Dimbɔŋɔ nyaaŋa ka Siria Naa Bɛnhadad daa ti zaŋ o tɔbbihi zaa n-chaŋ ti teei gili Samaria.

²⁵Ka bɛ ni daa teei gili Samaria maa zuɣu chɛ ka kum lu Samaria tiŋ’ puuni nim’ zuɣu hal ka bɛ daa ti kɔhiri buŋ’ zuɣu la anzinfa laɣibaligu pihinii; ka kɔhiri bɛ ni daa booni binshɛli ŋmani bindi[3] la din tibisim nyɛ giram kɔbisiyi anzinfa laɣibaligu diba anu.

²⁶Ka Izraɛl naa daa ti doli tiŋ’ maa gooni zuɣusaa n-chani garita, ka paɣ’ so kuhi yɛl’ o, “N dan’ naa, sɔŋm’ ma!”

²⁷Ka naa maa yɛl’ o, “Yawɛ yi bi sɔŋ a, wula ka man’ ni tooi sɔŋ a? M malila chi bee wain?”

²⁸Ka bɔh’ o, “Bɔ n-lee muɣis’ a?” Ka paɣ’ maa yɛl’ o, “Paɣ’ ŋɔ n-daa yɛli ma, ‘Zaŋm’ a bidibiga ŋɔ ka ti duɣi ŋubi zuŋɔ; ka sa zaŋ m mi bidibiga duɣi ŋubi biɛɣuni.’

²⁹ Ka ti zaŋ m bia duɣi ŋubi n-kaai biɛɣu, ka n yɛl’ o, ‘Zaŋm’ a bidibiga la na ka ti duɣi ŋub’, ka ŋun’ zaŋ o bidibiga maa ti sɔɣi.’ ”

³⁰Naa maa ni daa wum paɣ’ maa yɛtɔɣa maa, ka o darigi toog’ omaŋmaŋ’ binyɛrigu, ka doli gooni maa zuɣu garita. Ka niriba nya o ka o yɛla buɣu ka di be o binyɛrigu tiŋli.

³¹Ka o daa yɛli, “N yi bi ŋma Shafat bia Ilaisha la zuɣu zuŋɔ dabisili ŋɔ, Naawuni ŋun’ niŋm’ ma din gari lala.”

³²Ka o daa tim ni bɛ ti gbaai Ilaisha na. Di saha maa Ilaisha mini kpeen’ shɛba n-daa ʒi o yiŋa. Ka naa tumo maa daa na bi paana ka Ilaisha yɛli kpamba maa, “Nyamiya, ninvuɣ’ kur’ la ni tim ni bɛ kana ti ŋma n zuɣu shɛm. Nyamiya, Tumo maa yi paana, yin’ yomiya dunoli n-dihi li gbibi ka di chɛliya ka o kpe na. O dan’ napɔn chichiba n-kul vuri dol’ o nyaaŋa ŋɔ na.”

³³O noli daa na bi lu tiŋa, ka naa maa paag’ o sanna ti yɛl’ o, “Ti muɣisigu ŋɔ yila Yawɛ sanna! Ka bɔzuɣu ka n lan yɛn guhi ŋun’ Yawɛ yaha?”