Read Dagbani 2 Nanima 8 Bible Online

2 Nanima 8 - Dagbani bible

2 Nanima 8

¹ Di saha ka Ilaisha daa yɛli Shunɛm paɣ’ so bia o ni daa neei kum ni la, “Yiɣisim’ zaŋ a yiŋnim’ zaa kuli luɣ’ shɛli a ni yɛn tooi kuli; dama Yawɛ ni chɛ ka kum lu tiŋgbɔŋ ŋɔ ni yuma ayopɔin.”

²Ka paɣ’ maa daa yiɣisi niŋ kaman Naawuni nir’ maa ni daa yɛl’ o shɛm maa n-zaŋ o yiŋnim’ kuli Filistianim’ tiŋgbɔŋ ni nti be nimaani yuma ayopɔin.

³Ka yuma ayopɔin maa daa ti gari, ka paɣ’ maa yi Filistianim’ tiŋgbɔŋ maa ni n-lab’ o ya nti chaŋ ni o ti yɛli naa ka o zaŋ o yili min’ o tiŋgbani labisi ti o.

⁴Di saha naa maa daa tɔɣisirila Gɛhaazi ŋun daa nyɛ Naawuni nir’ maa sɔŋda la yɛtɔɣa n-yɛr’ o, “Yɛlim’ ma Ilaisha ni daa tum tuun’ kar’ shɛŋa zaa yɛla.”

⁵O ni daa yɛri naa maa Ilaisha ni daa neei kpim’ kum ni shɛm saha shɛli maa, ka o ni daa neei paɣ’ so bia kum ni maa kana nti yɛli naa maa ni o labisim’ o yili min’ o tiŋgbani ti o. Ka Gɛhaazi daa yɛli naa maa, “N dana, n-nyɛ paɣ’ maa, Ilaisha ni daa neeg’ o bi’ so kum ni maa mi m-bɔŋɔ.”

⁶Ka naa maa daa bɔhi paɣ’ maa, ka o yɛl’ o di yɛla ni nyɛ shɛm. Ka naa maa daa bo kpambal’ so n-dolisi paɣ’ maa, ka yɛl’ o, “Labisim’ paɣ’ maa ni su binshɛɣukam zaa zaŋ tabil’ o puu atam din yi o puu maa ni na saha shɛl’ o ni daa yi yiŋ’ maa zaŋ kana pumpɔŋɔ zaa ti o.”

⁷Dahin shɛli ka Ilaisha daa ti ka Damaskus na. Di saha maa ka Siria Naa Bɛnhadad daa biɛra. Ka bɛ daa yɛl’ o, “Naawuni nir’ la be yaŋɔ.”

⁸Ka naa maa daa yɛli Hazaɛl, “Bom’ pini n-chaŋ ti puhi Naawuni nir’ maa, ka chɛ ka o bɔhi Yawɛ nya n ni kpaŋ m barigu ŋɔ ni?”

⁹Ka Hazaɛl daa bo Damaskus binshɛɣukam n-ʒili laakumnim’ pihinahi chaŋ ni o ti puhi Naawuni nir’ maa. Ka Hazaɛl daa paai ti zani Ilaisha tooni ka yɛl’ o, “A bia Siria Naa Bɛnhadad n-tim ma a sanna ni n ti bɔh’ a nya o ni kpaŋ o barigu ŋɔ ni?”

¹⁰Ka Ilaisha daa yɛl’ o, “Cham’ ti yɛli naa maa ni biɛhiŋ kani, o ni kpaŋ; amaa Yawɛ lee kahigi wuhi ma ni o ni bahi kpi.”

¹¹Ka Ilaisha daa mirig’ o nina kpa Hazaɛl n-kul lihir’ o hal ka vi ti gbaag’ o. Ka Ilaisha kumda.

¹²Ka Hazaɛl bɔh’ o, “N dana, bɔzuɣu ka a kumda?” Ka Ilaisha garigi yɛl’ o, “N ni mi a ni ti yɛn niŋ Izraɛlnim’ zaɣ’ biɛ’ shɛli zuɣu n-chɛ ka n kumdi maa. A ni ti nyo bɛ birininim’ buɣim, ka zaŋ takɔbi ku bɛ nachimbihi, ka ŋme n-chɛrisichɛrisi bɛ bibihi, ka karigi bɛ paɣipuhinim’ puya.”

¹³ Ka Hazaɛl bɔh’ o, “Ya ka a dabili ŋun nyɛ baa ŋɔ yɛn nya yiko n-tum tuun’ karili ŋɔ!” Ka Ilaisha garigi yɛl’ o, “Yawɛ kahigi wuhi ma ni a ni ti leei Siria naa.”

¹⁴Dimbɔŋɔ nyaaŋa ka Hazaɛl daa yi Ilaisha sani n-lab’ o dan’ maa sani, ka o ti bɔh’ o, “Ka wula ka Ilaisha lee yɛl’ a?” Ka o garigi yɛl’ o, “O yɛli ma ni a ni kpaŋ.”

¹⁵Amaa ka biɛɣu daa neei, ka Hazaɛl niŋ kom mahigi bɔdua n-zaŋ pa naa maa ninni hal ka o ti leei Naawuni dini. Ka Hazaɛl daa di nam zan’ o zaani.

¹⁶Izraɛl Naa Jɔram ŋun daa nyɛ Ɛhab bia la ni daa di nam zaŋ chaŋ yuma anu saha, ka Juda Naa Jɛhɔram ŋun daa nyɛ Jɛhɔshafat bia la daa di nam.

¹⁷O ni daa di nam Jɛrusalɛm saha shɛli maa, o daa nyɛla yuun’ pihitanaayi nira. O daa dila nam maa n-ʒini Jɛrusalɛm yuma anii.

¹⁸O daa dolila Izraɛl nanim’ naba n-tum kaman Ɛhab min’ o daŋ ni daa tum shɛm la, dama o paɣ’ daa nyɛla Ɛhab bipuɣiŋga. O daa tum alahichi Yawɛ sani.

¹⁹ Amaa Yawɛ daa bi yu ni o bahi Judanim’ yoli o dabili Dauda zuɣu, dama o daa pun lo Dauda alikauli ni o ni zaŋ firila ti o min’ o bidibisi.

²⁰ O ʒiɛman’ ni ka Ɛdomnim’ daa zaɣisi ni Judanim’ ku lan su ba; ka daa pii so n-leei bɛmaŋmaŋ’ naa.

²¹Di saha maa ka Jɛhɔram daa zaŋ o chɛchɛbunsi zaa n-yiɣisi yuŋ chaŋ Zairi, ka o min’ o chɛchɛbunsi sapashinnim’ ti lu Ɛdomnim’ bɛn daa teei gil’ o zuɣu n-niŋ ba buɣim; amaa ka o tɔbbihi daa zo n-kuli.

²²Ka Ɛdomnim’ daa zaɣisi ni Judanim’ ku lan su ba hal ni zuŋɔ. Di saha maa ka Libinanim’ gba daa zaɣisi ni Judanim’ ku lan su ba.

²³Jɛhɔram ni daa tum tuun’ shɛŋa pahi min’ o ni daa pun tum shɛlikam, bɛ sab’ di yɛla niŋ Juda nanim’ litaafi shɛli bɛ ni booni Yɛlikura litaafi la ni.

²⁴Ka Jɛhɔram daa ti leei Naawuni dini, ka bɛ sɔɣ’ pah’ o yaannim’ zuɣu Dauda tiŋ’ la ni, ka o bia Ahazia daa di nam zan’ o zaani.

²⁵Ɛhab bia Izraɛl Naa Jɔram ni daa di nam zaŋ chaŋ yuun’ pinaayi saha, ka Juda Naa Jɛhɔram bia Ahazia gba daa di nam.

²⁶Ahazia daa nyɛla yuun’ pisinaayi nira saha shɛl’ o ni daa di nam maa; o daa di nam la maa yuun’ yini Jɛrusalɛm. O ma daa nyɛla Izraɛl Naa Omri yaaŋa, ka o yuli booni Atalia.

²⁷Ahazia gba daa dolila Ɛhab daŋ niriba naba n-tum alahichi Yawɛ sani kaman Ɛhab daŋ niriba maa ni daa tum shɛm la, dama o daa nyɛla Ɛhab daŋ niriba maa deemba.

²⁸Ka ŋun’ Ahazia daa pahi Ɛhab bia Jɔram la zuɣu, ka bɛ lo tɔbu chaŋ ni bɛ ti tuhi Siria Naa Hazaɛl Ramɔtigiliad, ka Sirianim’ daa ti ti Jɔram daŋa.

²⁹Ka Naa Jɔram daa lab’ kuli Jɛziriil ni o ti tibi dan’ shɛli Sirianim’ ni daa ti o Rama saha shɛl’ o mini Siria Naa Hazaɛl ni daa tuhiri tab’ la. Ka Juda Naa Jɛhɔram bia Ahazia daa chaŋ Jɛziriil ni o ti kaai Ɛhab bia Jɔram, o ni daa biɛri la zuɣu.