Read Dagbani 1 Yɛlikura 10 Bible Online

1 Yɛlikura 10 - Dagbani bible

1 Yɛlikura 10

¹Filistianim’ mini Izraɛlnim’ daa ti tuhiri tɔbu, ka Izraɛlnim’ daa ŋmaligi guui ka chɛ Filistianima. Ka Filistianim’ maa daa doli ti ku ba Gilibɔa Zoli zuɣu.

²Ka Filistianim’ maa daa kari doli Naa Sool min’ o bidibisi nti ku Jɔnatan mini Abinadab ni Malikishua.

³Ka tɔb’ maa daa kpaɣi mii Sool, ka peentɔriba daa to o piɛm ti o daŋa.

⁴Di saha ka Sool daa yɛli ŋun ʒir’ o tɔbutuhiri’ nɛma, “Ŋoom’ a takɔbi na n-kuhi ku ma, di so ka bɛn bi gundi ŋɔ ti kana ti zaŋ ma diɛm.” Amaa ka dabiɛm daa gbaag’ o neen’ ʒira maa ka o bi saɣi ku o. Di saha ka Sool daa zaŋ omaŋmaŋ’ takɔbi zali n-lu di zuɣu.

⁵O neen’ ʒira maa ni daa nya ka Sool kpi maa, ka o gba lu o takɔbi zuɣu kpi.

⁶Sool min’ o bidibis’ ata ni o neen’ ʒira ni o yiŋnim’ zaa ni daa laɣim kpi shɛm m-bala.

⁷Ka Izraɛlnim’ bɛn daa be vinvamli ni ni daa wum ni Izraɛlnim’ ŋmaligimi guui, ka Sool min’ o bidibisi kpi, ka bɛ daa yi bɛ tinsi ni zo. Ka Filistianim’ maa daa chaŋ ti be di ni.

⁸Ka biɛɣu daa neei, ka Filistianim’ maa daa chaŋ ni bɛ ti yeei kpiimba maa situra, ka nya Sool min’ o bidibis’ ata maa ni do Gilibɔa Zoli zuɣu.

⁹Ka bɛ daa ŋmaai Sool zuɣu, ka yeeg’ o tɔbutuhiri’ nɛma, ka bahi bihi ni bɛ gili Filistia tiŋgbɔŋ maa ni zaa m-moli lahibali suŋ maa ti bɛ buɣa mini bɛ niriba zaa.

¹⁰Ka bɛ daa zaŋ o tɔb’ nɛma maa ti niŋ bɛ buɣ’ shɛli jɛmbu duu, ka daa zaŋ o zuɣu maa ti yili bɛ buɣili Dagɔn jɛmbu duu puuni.

¹¹Amaa ka Jabɛshigiliadnim’ zaa daa wum Filistianim’ maa ni niŋ Sool shɛm maa zaa,

¹²ka bɛ dɔbba bɛn zaa daa mali suhukpeeni daa yiɣisi chaŋ ti zaŋ Sool min’ o bihi maa niŋgbuna maa chaŋ Jabɛshi nti zaŋ ba sɔɣi Jabɛshi oki tia gbini, ka daa lo noli daba ayopɔin.

¹³ Sool ni daa bi ʒe Yawɛ yim ka kpi shɛm m-bala. O daa bi ʒe Yawɛ yim ka bi doli Yawɛ zaligu, ka daa lan chaŋ ti buɣi baɣa m-bɔr’ sɔŋsim.

¹⁴O daa bi bo sɔŋsim maa Yawɛ sani, dinzuɣu ka Yawɛ daa ku o, ka zaŋ o nam maa ti Jɛsi bia Dauda.