Read Dagbani 1 Yɛlikura 13 Bible Online

1 Yɛlikura 13 - Dagbani bible

1 Yɛlikura 13

¹Ka Dauda mini tɔbbi’ kpamba bɛn daa su tɔbbihi tuhilituhili mini bɛn su tɔbbihi kɔbigakɔbiga fukumsi la ni kpamba zaa daa gbaai saawara.

²Ka Dauda daa yɛli Izraɛlnim’ zaa, “Di yi viɛl’ yi sani, ka lan nyɛ Yawɛ ŋun nyɛ ti Naawuni ŋɔ yubu, yin’ chɛliya ka ti tim boli ti mabihi bɛn be bɔba ni yaɣa ni Izraɛl tiŋgbɔŋ ŋɔ ni zaa m-pahi maligumaaniba mini Lɛvinim’ fɔntinsi din mali biŋkɔbiri mɔri ŋubbu shee zaa ka bɛ ka kpe na.”

³“Di saha ka ti chɛ ka bɛ chaŋ ti zaŋ Naawuni Daalikauli Adaka la na, dama Sool ʒiɛman’ la ni ti baɣa daa lan ka di ni.”

⁴Ka salo maa zaa daa saɣi ni bɛ niŋmi lala, dama di daa nyɛla din tiɣi niriba maa zaa nini.

⁵ Ka Dauda daa laɣim Izraɛlnim’ maa zaa zaŋ Shihɔr din daa be Ijipti la hal ti kpa garibu shee din be Lɛbohamat la ni bɛ chaŋ Kiriatijiarim ti zaŋ Naawuni Daalikauli Adaka maa na.

⁶ Ka Dauda mini Izraɛlnim’ maa zaa daa chaŋ Baala, di gbinni nyɛla Kiriatijiarim din daa be Juda tiŋgban’ ni la ni bɛ ti zaŋ Yawɛ ŋun nyɛ Naawuni ŋɔ daalikauli Adaka shɛli zuɣu Naawuni yuli ni daa be, ka o nam ʒiishee tam chɛrubinim’ zuɣu la na.

⁷Ka bɛ daa zaŋ Naawuni Daalikauli Adaka maa niŋ naɣitɔroko palli ni n-yi Abinadab yiŋ’ chana, ka Yuza mini Ahio daa vɔri li chana.

⁸Di saha ka Dauda mini Izraɛlnim’ zaa daa doli yiini yila, ka ŋmɛri mɔɣilɔnim’ mini goonjɛnima ni dawulɛnima ni guŋgombihi din mali chaɣisa, ka piɛbiri kikahi n-wari waa ni bɛ yaa zaa Naawuni tooni.

⁹Bɛ ni daa ti paai Chidɔn kabɔɣili ni, ka naɣ’ shɛb’ bɛn daa vɔri tɔroko maa tuui, ka Yuza daa teeg’ o nuu gbaai Naawuni Daalikauli Adaka maa gbibi.

¹⁰Ka Yawɛ suhu daa yiɣisi bahi Yuza zuɣu, ka o daa chɛ ka o lu n-kpi nimaani Naawuni tooni, o ni daa zaŋ o nuu gbaai Alikauli Adaka maa zuɣu.

¹¹Ka Dauda suhu daa yiɣisi Yawɛ ni daa yiɣis’ o suhu bahi Yuza zuɣu shɛm maa zuɣu, ka bɛ daa boli nimaani yuli Pɛrɛzuza hal ni zuŋɔ.

¹²Dindali maa ka Naawuni yɛla daa gbaai Dauda dabiɛm pam ka o yɛli, “Ka wula ka n lee yɛn niŋ zaŋ Naawuni Daalikauli Adaka ŋɔ kuli?”

¹³Lala zuɣu ka Dauda daa bi lan zaŋ Alikauli Adaka maa kuli ŋun’ Dauda ya la, amaa ka ŋmaligi zaŋ li tahila Obɛdɛdom ŋun daa nyɛ Giiti nir’ la yiŋa.

¹⁴ Ka Naawuni Daalikauli Adaka maa daa kpalim be Obɛdɛdom min’ o yiŋnim’ sani o yiŋa chira ata. Ka Yawɛ daa niŋ alibarika niŋ Obɛdɛdom min’ o yiŋnim’ ni ni o ni daa mali binshɛlikam zaa ni.