Read Dagbani 1 Yɛlikura 14 Bible Online

1 Yɛlikura 14 - Dagbani bible

1 Yɛlikura 14

¹Ka Taai Naa Hiram daa chɛ ka tuumba ʒi sida dakuɣiri chaŋ ti ti Dauda. O daa bola tammɛriba mini kapintanima ni bɛ ti me Dauda yili ti o.

²Di saha ka Dauda daa baŋ ni Yawɛ zaŋ o leei Izraɛlnim’ zaa naa, ka lan chɛ ka o nam du pam o niriba Izraɛlnim’ zuɣu.

³Ka Dauda daa kpuɣi paɣiba Jɛrusalɛm pahi n-lan dɔɣi bidibisi mini bipuɣinsi pahi.

⁴O ni daa dɔɣi bi’ shɛb’ Jɛrusalɛm maa yuya m-bɔŋɔ: Shammua mini Shɔbab ni Neetan ni Sulemaana

⁵ni Ibihar ni Ɛlishua ni Ɛlipɛlɛt

⁶ni Nɔga ni Nɛfɛg ni Jafia

⁷ni Ɛlishama ni Biiliada ni Ɛlifɛlɛt.

⁸Filistianim’ ni daa wum ni bɛ booi kpam bahi Dauda zuɣu ni n-zaŋ o leei Izraɛlnim’ zaa naa, ka Filistia tɔbbihi zaa daa yi n-chaŋ ni bɛ ti bo o shee. Ka Dauda daa wum lala ka yi n-chaŋ ni o ti liri ba.

⁹Di saha maa Filistianim’ maa daa chaŋmi ti tuhi Rɛfaim tin’ shɛli din daa be vinvamli ni la nima, ka di bɛ nɛma.

¹⁰Ka Dauda daa bɔhi Naawuni, “N cham’ ti liri Filistianim’ maa? A ni zaŋ ba niŋ n nuu ni?” Ka Yawɛ daa yɛl’ o, “Cham’ ti liri ba, n ni zaŋ ba niŋ a nuu ni.”

¹¹Ka Dauda daa chaŋ ti liri ba Baalipɛrazim n-nyaŋ ba nimaani ka yɛli, “Naawuni n-chɛ ka n kpe n dimnim’ maa sunsuuni kaman kokpɛɣu la.” Lala zuɣu ka bɛ daa boli nimaani yuli Baalipɛrazim.

¹²Ka Filistianim’ maa daa zo ka chɛ bɛ buɣa, ka Dauda daa chɛ ka bɛ nyo li buɣim.

¹³Ka Filistianim’ maa daa ti lan liri vinvamli ni nim’ maa n-lan tuhi ba, ka di bɛ nɛma.

¹⁴Ka Dauda daa lan bɔhi Naawuni ka Naawuni daa yɛl’ o, “Di kari doli bɛ gbini, amaa ŋmam’ bɛ noli nti liri ba balisam tihi la tooni.

¹⁵Ka a yi ti wum niriba napɔna vubu balisam tihi maa zuɣu, di saha nyin’ lirim ba, dama man’ Naawuni n-daŋ a tooni ni n ti nyaŋ Filistia tɔbbihi maa.”

¹⁶Ka Dauda daa niŋ kaman Naawuni ni zal’ o shɛm maa n-nyaŋ Filistianim’ maa Gibiɔn hal ni Gɛza.

¹⁷Ka Dauda yuli daa du pam tiŋgbɔna maa ni zaa, ka Yawɛ daa chɛ ka Dauda yɛla gbaai zuliya kam dabiɛm.