Read Dagbani 1 Yɛlikura 15 Bible Online

1 Yɛlikura 15 - Dagbani bible

1 Yɛlikura 15

¹Ka Dauda daa me omaŋmaŋ’ ya o tiŋ’ maa ni, ka daa mali luɣ’ shɛli n-ti suɣili nimaani zali Naawuni Daalikauli Adaka la.

² Di saha ka o daa yɛli, “Lɛvinim’ ŋɔ kɔŋko n-nyɛ bɛn yɛn ʒi Naawuni Daalikauli Adaka maa ka pa ni shɛb’ yaha, dama bɛna ka Yawɛ daa pii ni bɛ ʒiri li, ka tumd’ o jɛma tuma sahakam.”

³Ka Dauda daa laɣim Izraɛlnim’ zaa Jɛrusalɛm ni bɛ ti zaŋ Yawɛ Daalikauli Adaka maa zali o ni daa mali luɣ’ shɛli zal’ li maa.

⁴Di saha ka Dauda daa laɣim Aduna bidibisi mini Lɛvi bidibisi na.

⁵Kɔhat bidibisi ni, Uriɛl n-daa nyɛ bɛ kpɛma, ka bɛ daŋ maa ni niriba kɔbiga ni pisi pah’ o zuɣu.

⁶Mɛrari bidibisi ni, Asaaya n-daa nyɛ bɛ kpɛma, ka bɛ daŋ maa ni niriba kɔbisiyi ni pisi pah’ o zuɣu.

⁷Gɛrishom bidibisi ni, Joɛl n-daa nyɛ kpɛma, ka bɛ daŋ maa ni niriba kɔbiga ni pihita pah’ o zuɣu.

⁸Ɛlizafan bidibisi ni, Shɛmaya n-daa nyɛ kpɛma, ka bɛ daŋ maa ni niriba kɔbisiyi pah’ o zuɣu.

⁹Hiburɔn bidibisi ni, Ɛliɛl n-daa nyɛ kpɛma, ka bɛ daŋ maa ni niriba pihinii pah’ o zuɣu.

¹⁰Uziɛl bidibisi ni, Aminadab n-daa nyɛ kpɛma, ka bɛ daŋ maa ni niriba kɔbiga ni pinaayi pah’ o zuɣu.

¹¹Di saha ka Dauda daa boli maligumaaniba Zadok mini Abiata m-pahi Lɛvi zuliya ni niriba bɛn nyɛ: Uriɛl mini Asaaya ni Joɛl ni Shɛmaya ni Ɛliɛl ni Aminadab na

¹²nti yɛli ba, “Yinima n-nyɛ Lɛvi zuliya ni dɔɣirikpamba, yi mini yi mabihi zaa malimiya yimaŋa n-yi daɣiri ni din ni chɛ ka yi tooi zaŋ Yawɛ ŋun nyɛ Izraɛlnim’ Naawuni Daalikauli Adaka ŋɔ ti zali luɣ’ shɛli n ni mali ni n zaŋ li zal’ la.

¹³Yi ni daa bi kpuɣi li tuuli la zuɣu n-daa chɛ ka Yawɛ ŋun nyɛ ti Naawuni ŋɔ daa yiɣisi o suhu bahi ti zuɣu n-darigi ti tibili la, dama ti daa bi niŋ li kaman di ni simdi ni ti niŋ li shɛm.”

¹⁴Dinzuɣu ka maligumaaniba maa mini Lɛvinim’ maa daa mali bɛmaŋa ni bɛ kpuɣi Yawɛ ŋun nyɛ Izraɛlnim’ Naawuni ŋɔ Daalikauli Adaka maa.

¹⁵ Ka Lɛvinim’ maa daa zaŋ Alikauli Adaka maa tam dapuhi zuɣu n-zaŋ li buɣi bɛ bɔɣusapima zuɣu kaman Yawɛ ni daa yɛli Musa ka o zali shɛm la.

¹⁶Dauda daa lan zali Lɛvi kpamba maa ni bɛ bom’ bɛ daŋ maa ni baansi mini biŋkumdiŋmɛriba bɛn ni tooi ŋme biŋkumda pampam, kaman mɔɣilɔnim’ mini goonjɛnima ni guŋgombihi din mali chaɣisa din ni chɛ ka suhupiɛlli biŋkumda beni.

¹⁷Ka Lɛvinim’ maa daa pii Joɛl bia Hɛman min’ o mabia Asaf ŋun daa nyɛ Bɛrɛkia bia la ni Mɛrari bidibisi ni bɛ daŋ ni mabia Ɛtan, ka o nyɛ Kushaya bia la.

¹⁸Bɛ ni daa pii bɛ mabihi maa shɛb’ ni bɛn pa bɛ zuɣu pahi n-daa nyɛ: Zakaria mini Jaaziɛl ni Shɛmiramɔt ni Jɛiɛl ni Unni ni Ɛliab ni Bɛnaaya ni Maasɛya ni Matitia ni Ɛlifɛlɛhu ni Mikinɛya; ka Obɛdɛdom mini Jɛiɛl daa nyɛ dunɔguliba.

¹⁹Baansi maa mi, Hɛman mini Asaf ni Ɛtan n-daa nyɛ bɛn ŋmɛri daanya guŋgombihi din mali chaɣisa la.

²⁰Ka Zakaria mini Aziɛl ni Shɛmiramɔt ni Jɛhiɛl ni Unni ni Ɛliab ni Maasɛya ni Bɛnaaya daa nyɛ bɛn ŋmɛri mɔɣilɔnim’ kaman Alamɔt ŋmɛbu la.

²¹Ka Matitia mini Ɛlifɛlɛhu ni Mikinɛya ni Obɛdɛdom ni Jɛiɛl ni Azazia mi daa nyɛ bɛn be tooni ŋmɛri goonjɛnim’ kaman Shɛminit ŋmɛbu la.

²²Ka Kɛnania ŋun daa nyɛ Lɛvi zuliya maa biŋkumdiŋmɛriba zuɣulan’ la daa nyɛ ŋun yɛn wuhiri bɛ ni yɛn ŋmɛri biŋkumda maa shɛm, dama ŋuna n-daa mi di ŋmɛbu.

²³Ka Bɛrɛkia mini Ɛlikana daa nyɛ Alikauli Adaka duu maa dunɔguliba.

²⁴Ka Shɛbania mini Jɔshafat ni Nɛtanɛl ni Amasai ni Zakaria ni Bɛnaaya ni Ɛliɛza, bɛn daa nyɛ maligumaaniba la daa nyɛ bɛn yɛn be Naawuni Daalikauli Adaka maa tooni piɛbiri kikahi. Ka Obɛdɛdom mini Jɛhaya gba daa nyɛ Alikauli Adaka maa dunɔguliba.

²⁵Di saha ka Dauda mini Izraɛl kpamba ni sapashin’ kpamba bɛn daa su tɔbbihi tuhilituhili fukumsi daa chaŋ Obɛdɛdom yiŋ’ ni bɛ ti zaŋ Yawɛ Daalikauli Adaka maa ni suhupiɛlli.

²⁶Ka Lɛvinim’ bɛn daa buɣiri Yawɛ Daalikauli Adaka maa daa kɔri naɣilah’ ayopɔin mini piɛlah’ ayopɔin mali sara, Naawuni ni daa sɔŋ ba maa zuɣu.

²⁷Dauda daa yɛla zabba piɛl’ viɛlli kaman Lɛvinim’ bɛn daa buɣiri Alikauli Adaka maa mini baansi maa ni Kɛnania ŋun daa nyɛ baan’ kpɛm’ maa ni daa ye zabba shɛŋa. Ka Dauda daa zaŋ tampiɛlli din ŋmani mukuru lo o shee ni.

²⁸Ka Izraɛlnim’ zaa daa zaŋ Yawɛ Daalikauli Adaka maa na. Bɛ daa kul tahirimi ka piɛbiri kikahi ni piɛlahi yila, ka ŋmɛri guŋgombihi din mali chaɣisa, ka daa lan ŋmɛri mɔɣilɔnim’ mini goonjɛnim’ pampam.

²⁹Bɛ ni daa zaŋ Yawɛ Daalikauli Adaka maa paai Dauda tiŋ’ maa ni, ka Mikal ŋun daa nyɛ Sool bipuɣiŋga la daa lihi takɔro ni na n-nya Naa Dauda ni wari waa ka yiɣiri jɛmda, ka o ʒiɛm o o suhu ni.