Read Dagbani 1 Yɛlikura 17 Bible Online

1 Yɛlikura 17 - Dagbani bible

1 Yɛlikura 17

¹Dauda ni daa kpe o yili la ni naai, ka o daa ti yɛli anabi Neetan, “Nyama, man’ bela sida dari yil’ ni, amaa ka Yawɛ Daalikauli Adaka ŋɔ din’ be suɣili ni.”

²Ka Neetan daa garigi yɛli Dauda, “Niŋm’ a ni lo a suhu ni ni a niŋ shɛlikam zaa, dama Naawuni be a sani.”

³Amaa dindali maa yuŋ ka Yawɛ daa yɛli Neetan,

⁴“Cham’ ti yɛli n dabili Dauda, Yawɛ ni yɛli shɛm m-bɔŋɔ: ‘Pa nyini n-yɛn me yili ti ma ka m be di ni.

⁵Dama saha shɛli n ni daa zaŋ n niriba Izraɛlnim’ la na hal ni zuŋɔ, n na ʒi m-be yil’ ni, amaa n daa kul yirila suɣili ni n-lan kpɛri suɣili ni, ka yiri m biɛhigu shee.

⁶N ni daa kul be Izraɛlnim’ zaa sani n-chani luɣ’ shɛlikam zaa la, n daa mi n-bɔhi Izraɛl zuɣulaannim’ shɛb n ni daa pii ni bɛ su n niriba Izraɛlnim’ la ni so, ‘Bɔ n-niŋ ka yi bi zaŋ sida dari me yili ti ma?” ’

⁷“Dinzuɣu pumpɔŋɔ yɛlimi n dabili Dauda: Yawɛ ŋun nyɛ Tɔbbihi Naa ŋɔ yɛliya: Mani n-daa yih’ a mɔɣu ni piɛri gulibu ni na ni a ti leei n niriba Izraɛlnim’ naa.

⁸Ka a daa yi chaŋ luɣ’ shɛlikam zaa m bela a sani n-nyaŋ a dimnim’ zaa ti a. N ni chɛ ka a yuli du kaman dunia ŋɔ ni wɔɣira yuya ni daa du shɛm la.

⁹N ni bo biɛhigu shee ti n niriba Izraɛlnima n-zaŋ ba ʒili nimaani, ka bɛ be bɛmaŋmaŋ’ tiŋgbɔŋ ni, ka so ku lan muɣisi ba, ka putɔɣunim’ ku lan liri ba kaman bɛ ni daa yi liriti ba shɛm

¹⁰saha shɛli n ni daa pii zuɣulaannim’ ka bɛ su n niriba Izraɛlnim’ la. N ni nyaŋ a dimnim’ zaa. Din pahi nyɛla, n daa pun kahigi wuh’ a ni man’ Yawɛ ni chɛ ka a zuliya yɛligi.

¹¹Ka a saha yi ti paai ni a pah’ a yaannim’ zuɣu, n ni piig’ amaŋmaŋ’ zuliya ni so ŋun nyɛ amaŋmaŋ’ bidɔɣiro ka o leei naa.

¹²Ŋuna n-ni ti me yili ti ma, ka n ti chɛ ka o nam kul ʒiɛya sahakam.

¹³ N ni ti leeg’ o ba, ka o mi lee m bia. N ti ku yihi n yurilim maŋli o ni kaman n ni daa yihi n yurilim ŋun daa daŋ a tooni la ni shɛm la.

¹⁴Amaa n ni ti zaŋ o leei n niriba zuɣulana, ka chɛ ka o nam kul beni sahakam.”

¹⁵Ka Neetan daa yɛli Dauda yɛtɔɣa ŋɔ zaa min’ o ni nya shɛli ʒii maa ni zaa.

¹⁶Di saha ka Naa Dauda daa kpe nti ʒini Yawɛ tooni ka yɛli, “Yawɛ ŋun nyɛ Naawuni ŋɔ, m mi lee nyɛ ŋuni bee n daŋ lee nyɛ banima, ka a ti zaŋ ma zali n ni ʒe zaashe’ shɛl’ ni ŋɔ?

¹⁷Yaa n Naawuni, ka dimbɔŋɔ na nyɛla din pɔra a sani, ka a lan yɛli n yili ni ti yɛn be shɛm saha shɛli din na kanna. Yawɛ ŋun nyɛ Naawuni ŋɔ, a lan wuhi ma n zuliya ni ti yɛn be shɛm yuma din kanna.

¹⁸Ka wula ka man’ Dauda ŋun nyɛ a dabili ŋɔ lee lan yɛn yɛli yaha zaŋ chaŋ a ni tibigi ma shɛm ŋɔ polo? A mi a dabili.

¹⁹Yawɛ, a suhuyubu puuni ka a tum tuun’ kara ŋɔ zaa, mani ŋun nyɛ a dabili ŋɔ zuɣu, ka kahigi yɛl’ kara ŋɔ zaa wuhi ma.

²⁰Yawɛ, so lan kani ŋ-ŋman’ a, ka Naawuni so mi lan kani pah’ a zuɣu kaman ti tiba ni wum shɛm.

²¹Zuliya banima n-lee lan be dunia ŋɔ ni ŋ-ŋman’ a niriba Izraɛlnima, ka nyin’ Naawuni tiligi ba ka zaŋ ba leeg’ a dahalali niriba? A daa tum tuun’ kara din mali dabiɛm n-chɛ ka a yuli du, ka lan kari zuliya shɛb’ bɛn daa gu a ni daa yihi a ninvuɣ’ shɛb’ Ijipti na la sol’ la zaa.

²²Nyini n-zaŋ a niriba Izraɛlnim’ leeg’ a dahalali niriba sahakam; ka nyin’ Yawɛ nyɛ bɛ Naawuni.

²³“Yawɛ, pumpɔŋɔ chɛ ka a ni yɛli mani ŋun nyɛ a dabili ŋɔ yɛtɔɣ’ shɛŋa zaŋ chaŋ n zuliya polo ŋɔ niŋ pali sahakam. Niŋmi kaman a ni yɛli shɛm maa.

²⁴Ka dimbɔŋɔ chɛ ka niriba duh’ a yuli, ka tibigi li sahakam ka yɛra, ‘Yawɛ nyɛla Tɔbbihi Naa, ŋuna n-nyɛ Izraɛlnim’ Naawuni.’ Chɛ ka mani a dabili Dauda zuliya nya zaa zani a sani.

²⁵Dama nyini ŋun nyɛ n Naawuni ŋɔ n-kahigi wuhi mani ŋun nyɛ a dabili ŋɔ ni a ni chɛ ka n zuliya yɛligi. Dinzuɣu ka mani ŋun nyɛ a dabili ŋɔ mali suhukpeeni n-suhir’ a ŋɔ.

²⁶Yawɛ, nyini n-nyɛ Naawuni, ka lo a dabili alikauli ni a ni niŋ o zaɣ’ viɛlli ŋɔ.

²⁷Dinzuɣu pumpɔŋɔ n suhir’ a mi, niŋmi alibarika niŋ mani ŋun nyɛ a dabili ŋɔ zuliya ni, ka chɛ ka bɛ kul be a sani sahakam. Dama nyini Yawɛ yi niŋ alibarika niŋ binshɛli ni, alibarika maa kul ni kpalim be di ni sahakam.”