Read Dagbani 1 Yɛlikura 20 Bible Online

1 Yɛlikura 20 - Dagbani bible

1 Yɛlikura 20

¹ Ka di daa ti niŋ siɣili saha, saha shɛli nanim’ ni daa chani tɔb’ la, ka Jɔab daa zaŋ tɔbbihi chaŋ ti saɣim Ammɔnim’ tiŋgbɔŋ, ka daa chaŋ ti teei gili Raba. Amaa ka Dauda daa kpalim be Jɛrusalɛm. Ka Jɔab daa chaŋ ti lu Raba zuɣu n-wurim li.

²Ka Dauda daa piligi Milikom[4] zuɣupiligu o zuɣu ni, ka nya ka di tibisim nyɛ kilɔgiram pihitanaanahi, ka kuɣ’ viɛla be di ni. Ka bɛ daa zaŋ li pili Dauda, ka o daa va bɛ ni daa tuhi di neen’ shɛŋa tiŋ’ maa ni pam kuli.

³Ka o daa zaŋ ninvuɣ’ shɛb’ bɛn daa be tiŋ’ maa ni kuli nti chɛ ka bɛ zaŋ suhi din mali nyina mini kuriti kuya ni kuriti lɛri tumd’ o tuma. Lala ka Dauda daa niŋ Ammɔnnim’ maa tinsi zaa. Di nyaaŋa ka Dauda min’ o niriba maa zaa daa lab’ Jɛrusalɛm.

⁴Dimbɔŋɔ nyaaŋa ka tɔb’ daa ti lan lu bɛ mini Filistianim’ sunsuuni Gɛza. Di saha ka Sibɛkai ŋun daa nyɛ Husha nir’ la daa ku Sipai ŋun daa yi tiyaawumyanim’ zuliya ni na la, ka bɛ daa nyaŋ Filistianim’ maa.

⁵ Ka bɛ mini Filistianim’ maa daa ti lan tuhiri tɔbu, ka Ɛlhanan ŋun daa nyɛ Jair bia la daa ku Lahimi ŋun daa nyɛ Goliat Gaat nir’ la mabia, ka o kpani daɣu daa ŋmani kpalu’ daɣu.

⁶Ka bɛ mini Filistianim’ maa daa ti lan tuhiri tɔbu Gaat, ka wɔɣiri tital’ so daa beni, o daa malila nubih’ ayɔbuyɔbu ni napombih’ ayɔbuyɔbu. Ka o nubihi min’ o napombihi zaa kalinli daa yiɣisi pisinaanahi. O gba daa yila tiyaawumyanim’ zuliya ni na.

⁷Ka o daa ti maani Izraɛlnima ansarisi, ka Dauda Mabia Shimia bia Jɔnatan daa ku o.

⁸Bɛmbɔŋɔnim’ daa yila Gaat tiyaawumyanim’ la zuliya ni na. Ka Dauda min’ o niriba daa ku ba.