Read Dagbani 1 Yɛlikura 22 Bible Online

1 Yɛlikura 22 - Dagbani bible

1 Yɛlikura 22

¹Di saha ka Dauda daa yɛli, “Kpe ka Yawɛ ŋun nyɛ Naawuni ŋɔ jɛmbu duu ti yɛn be, ka Izraɛlnim’ ni ti yɛn zaŋdi sara nyɔri buɣim bimbin’ shɛli zuɣu be kpe.”

²Ka Dauda daa zali ka bɛ laɣim tinzunnim’ bɛn zaa be Izraɛl tiŋgbɔŋ maa ni na, ka o daa pii kuɣikpɛriba ni bɛ kpe kuɣa ka bɛ zaŋ me Naawuni jɛmbu duu.

³Dauda daa lan bo kuriti pam ni bɛ mali kpahi din ni kpahi dunɔdaya pundi mini chɛulɔnima. O daa lan bo daanya pam, hal nir’ daa naan ku tooi zaŋ li pa sania zuɣu zahim li.

⁴O daa lan bo sida dakuɣiri din ka kalinli, dama Sidɔnnim’ mini Taainim’ daa ʒi sida dakuɣiri maa pam na ti ti Dauda.

⁵Dama Dauda daa yɛlimi, “M bia Sulemaana na nyɛla bi’ polli, ka na bi mi tuma ŋ-ŋɔ soli viɛnyɛliŋga, ka ti ni yɛn me Yawɛ jɛmbu du’ shɛli maa veeni ka di nyɛla zaɣ’ tital’ wubinli din ni mali yuli ni jilima dunia zaa ni. Dinzuɣu di simdi ka n daŋ mali di shili zali.” Di saha ka Dauda daa bo binyɛra pam zali ka daa naanyi ti kpi.

⁶Di nyaaŋa ka o daa ti bol’ o bia Sulemaana na ti yɛl’ o ni o mɛm Yawɛ ŋun nyɛ Izraɛlnim’ Naawuni ŋɔ jɛmbu duu maa.

⁷Dauda daa yɛlila Sulemaana, “M bia, m pun lo n suhu ni ni m me jɛmbu duu ti Yawɛ ŋun nyɛ Naawuni ŋɔ jilima.”

⁸Amaa ka Yawɛ daa yɛli ma, “A tuhi tɔbu pam, ka ku niriba pam, di bi simdi ka a me jɛmbu duu n-ti ma jilima, dama a ku niriba pam dunia ŋɔ ni n ninni.”

⁹O daa lan yɛli ma, “Nyama, a ni ti dɔɣi bidibiga ŋun ni ti mali suhudoo. N ni ti ti o suhudoo o dimnim’ bɛn zaa gil’ o sani; dama o yuli nti yɛn booni Sulemaana.[5] Ka n ni ti ti Izraɛlnim’ suhudoo, ka binshɛli ku lan dam ba o ʒiɛman’ ni.

¹⁰ Ŋuna n-ni ti me jɛmbu duu ti ma jilima. N ni ti leeg’ o ba, ka o mi leei m bia, ka n chɛ ka o nam mali yaa Izraɛl tiŋgbɔŋ ni sahakam.”

¹¹Dinzuɣu m bia, pumpɔŋɔ Yawɛ ni be a sani ka ni chɛ ka a nya nasara Yawɛ ŋun nyɛ a Naawuni ŋɔ jɛmbu duu maa mɛbu ni kaman o ni yɛli shɛm zaŋ chaŋ a polo.

¹²Yawɛ ni ti a tɛhi’ zilima mini baŋsim, ka o yi ti zaŋ Izraɛl tiŋgbɔŋ ŋɔ fukumsi niŋ a nuu ni, a ni doli Yawɛ ŋun nyɛ a Naawuni ŋɔ zaligunima.

¹³ A yi ni doli Naawuni ni daa chɛ ka Musa zaŋ zalikpan’ shɛŋa mini zaligu shɛŋa din pahi ti Izraɛlnim’ la viɛnyɛliŋga, a biɛhigu ni tɔŋ. Mali kpiɔŋ mini suhukpeeni, Di zɔri dabiɛm, ka di chɛ ka a suhu zɔhira.

¹⁴Zaŋ chaŋ Naawuni jɛmbu duu maa mɛbu polo, m pun kpaŋ mmaŋ’ bo salima tɔn tusaata ni kɔbisinahi ka bo anzinfa tɔn tuhi’ pihitanaanahi, amaa daanya mini kuriti dina, di ka kalinli. N lan bo dakuɣuri mini kuɣa gba, amaa di simdi ka a bo shɛli pahi di zuɣu.

¹⁵A mali tumtumdiba pam; kuɣikpɛriba mini tammɛriba ni kapintanima ni nuhi tuumbaŋsim balibu kam zaa tumtumdiba bɛn ka kalinli.

¹⁶Bɛ ni tooi zaŋ salima mini anzinfa ni daanya bee kuriti tum tuma.” Pumpɔŋɔ piligim’ tuma maa, Yawɛ be a sani.

¹⁷Ka Dauda daa zali Izraɛl zuɣulaannim’ ni bɛ sɔŋm’ o bia Sulemaana, ka lan yɛli ba,

¹⁸“Yawɛ ŋun nyɛ yi Naawuni ŋɔ be yi sani. O tin ya suhudoo luɣ’ shɛlikam zaa, dama ŋuna n-daa zaŋ ninvuɣ’ shɛb’ bɛn daa pun be tiŋgbɔŋ ŋɔ ni la niŋ n nuu ni, ka tiŋgbɔŋ ŋɔ leei ŋun’ Yawɛ min’ o niriba ni su shɛli.

¹⁹Dinzuɣu jɛmmiya Yawɛ ŋun nyɛ yi Naawuni ŋɔ ni yi tɛha zaa ni yi suhuri zaa. Yiɣisimiya zani m-me Yawɛ ŋun nyɛ Naawuni ŋɔ jɛmbu duu maa din ni chɛ ka yi zaŋ Yawɛ Alikauli Adaka la mini Naawuni la’ shɛŋa din be kasi la na ti zali yi ni me jɛmbu du’ shɛli ti Yawɛ jilima maa ni.