Read Dagbani 1 Yɛlikura 27 Bible Online

1 Yɛlikura 27 - Dagbani bible

1 Yɛlikura 27

¹Izraɛlnim’ bɛn daa nyɛ bɛ daŋ ni kpamba mini tɔbbi’ kpamba bɛn daa su tɔbbihi tuhilituhili mini bɛn daa su tɔbbihi kɔbigakɔbiga fukumsi ni bɛ sapashin’ kpamba bɛn daa yi tumdi naa tuma din nyɛ niriba piribu mini tuma piri ti niriba goli kam yuuni puuni la yuya m-bɔŋɔ: Pirigibu kam ni daa malila ninvuɣ’ tuhi’ pisinaanahi.

²Zabidiɛl bia Jashɔbiam n-daa su bɛ ni tuui pirigi ninvuɣ’ shɛb’ la fukumsi gol’ tuuli puuni. Ninvuɣ’ tuhi’ pisinaanahi ka o daa su.

³O daa nyɛla Pɛrɛz yaaŋa, ka daa nyɛ ŋun su tɔbbi’ kpamba zaa fukumsi goli tuuli maa ni.

⁴Dɔdai ŋun daa nyɛ Aho nir’ la n-daa su bɛ ni daa lan pirigi ninvuɣ’ shɛb’ la fukumsi gol’ so ŋun pahi ayi ni. Mikilɔt n daa su o yaɣili fukumsi. Ninvuɣ’ tuhi’ pisinaanahi ka o daa su.

⁵Sapashin’ kpɛm’ ŋun daa pah’ ata n-su gol’ so ŋun pah’ ata ni n-daa nyɛ maligumaana Jɛhɔiada bia Bɛnaaya, o daa nyɛla kpɛma. Ninvuɣ’ tuhi’ pisinaanahi ka o daa su.

⁶Bɛnaaya ŋɔ n-daa nyɛ wɔɣirili ŋun be ninvuɣ’ pihita la ni, ka nyɛ bɛ zuɣulana. O bia Amizabad n-daa nyɛ ŋun zan’ o zaani n-su o niriba maa fukumsi.

⁷Jɔab mabia Asahɛl n-daa nyɛ ŋun pah’ anahi n-su gol’ so ŋun pah’ anahi ni. O kalinsi nyaaŋa, o bia Zɛbadia n-daa zan’ o zaani, ninvuɣ’ tuhi’ pisinaanahi ka o daa su.

⁸Zuɣulaan’ so ŋun daa pah’ anu n-su gol’ so ŋun pahi anu ni n-daa nyɛ Shamhut, o daa nyɛla Izira nira. Ninvuɣ’ tuhi’ pisinaanahi ka o daa su.

⁹Ŋun daa pah’ ayɔbu n-su gol’ so ŋun pah’ ayɔbu ni n-daa nyɛ Ira. O daa nyɛla Ikɛsh ŋun daa nyɛ Tɛkɔa nir’ la bia; ninvuɣ’ tuhi’ pisinaanahi ka o daa su.

¹⁰Ŋun daa pah’ ayopɔin n-su chira ayopɔin ni n-daa nyɛ Hɛlɛz ŋun daa nyɛ Pɛlɔn nira ka yi Ifriim zuliya ni na la, ninvuɣ’ tuhi’ pisinaanahi ka o daa su.

¹¹Ŋun daa pah’ anii n-su chira anii ni n-daa nyɛ Sibɛkai ŋun daa yi Husha na ka nyɛ Zɛra daŋ ni nir’ la, ninvuɣ’ tuhi’ pisinaanahi ka o daa su.

¹²Ŋun daa pah’ awɛi n-su chira awɛi ni n-daa nyɛ Abiɛza ŋun daa yi Anatɔt na ka nyɛ Bɛnjamin zuliya ni nir’ la, ninvuɣ’ tuhi’ pisinaanahi ka o daa su.

¹³Ŋun daa pahi pia n-su chir’ pia ni n-daa nyɛ Maharai ŋun daa yi Nɛtɔfa na ka nyɛ Zɛra daŋ ni nir’ la, ninvuɣ’ tuhi’ pisinaanahi ka o daa su.

¹⁴Ŋun daa pahi piniyini n-su chir’ piniyini ni n-daa nyɛ Bɛnaaya ŋun daa yi Piratɔn na ka nyɛ Ifriim zuliya ni nir’ la, ninvuɣ’ tuhi’ pisinaanahi ka o daa su.

¹⁵Ka ŋun daa pahi pinaayi n-su chir’ pinaayi ni mi n-daa nyɛ Hɛlidai ŋun daa yi Nɛtɔfa na ka nyɛ Otiniɛl daŋ ni nir’ la, ninvuɣ’ tuhi’ pisinaanahi ka o daa su.

¹⁶Ninvuɣ’ shɛb’ bɛn daa lihiri Izraɛl zuliya. Zikiri bia Ɛliɛza n-daa nyɛ Rubin zuliya ni kpɛma, ka Maaka bia Shɛfatia nyɛ Simiɔn zuliya ni kpɛma n-lihiri ba.

¹⁷Hashabia ŋun daa nyɛ Kɛmuɛl bia la n-daa nyɛ Lɛvi zuliya ni kpɛma. Aduna zuliya ni, Zadok n-daa nyɛ bɛ kpɛma;

¹⁸Juda zuliya ni, Ɛlihu ŋun daa nyɛ Dauda mabihi ni yino la n-daa nyɛ bɛ kpɛma, Isaka zuliya ni, Omri ŋun daa nyɛ Maikil bia la n-daa nyɛ bɛ kpɛma.

¹⁹Obadia bia Ishimaya n-daa nyɛ Zɛbulɔn zuliya ni kpɛma, ka Kɛrimɔt ŋun daa nyɛ Aziriɛl bia la daa nyɛ Naftali zuliya kpɛma,

²⁰ka Hɔshia ŋun daa nyɛ Azazia bia la daa nyɛ Ifriim zuliya ni kpɛma, ka Joɛl ŋun daa nyɛ Pɛdaya bia la mi nyɛ Manaasa zuliya pirigili la kpɛma,

²¹ka Iddo ŋun daa nyɛ Zakaria bia la mi nyɛ Manaasa zuliya pirigili bɛn daa be Giliad la kpɛma, ka Jaasiɛl ŋun daa nyɛ Abinɛr bia la nyɛ Bɛnjamin zuliya ni kpɛma,

²²ka Azarɛl ŋun daa nyɛ Jɛrɔham bia la mi nyɛ Dan zuliya ni kpɛma. Bɛmbɔŋɔnima n-daa nyɛ Izraɛl zuliya zuɣulaannima.

²³ Dauda daa bi kali ninvuɣ’ shɛb’ bɛn bi paai yuun’ pisi, dama Yawɛ daa lo alikauli ni o ni chɛ ka Izraɛlnim’ galisi kaman saŋmarisi bɛn be zuɣusaa ŋɔ.

²⁴ Ka Zɛruya bia Jɔab la daa piligi niriba maa kalibu, amaa o daa bi kali ba naai, ka alɔbo daa lu Izraɛlnim’ zuɣu niriba kalibu maa zuɣu, ka bɛ daa bi sabi bɛ kalinli maa niŋ Naa Dauda yɛla teebu litaafi ni.

²⁵Azimavɛt ŋun daa nyɛ Adiɛl bia la n-daa su nayili azichi fukumsi, ka Jɔnatan ŋun daa nyɛ Uzia bia la mi daa nyɛ ŋun su bɛ tiŋgbɔŋ maa ni mini bɛ fɔntinsi ni tiŋkpansi du’ shɛŋa din du pam azichi fukumsi.

²⁶Kɛlub bia Ɛzri n-daa su kpariba fukumsi.

²⁷Ka Shimɛi ŋun daa nyɛ Rama nir’ la daa nyɛ ŋun lihiri wain tihi puri, ka Zabidi ŋun daa nyɛ Shifam nir’ la daa lihiri wain ni be du’ shɛŋa ni.

²⁸Ka Baalihanan ŋun daa nyɛ Gɛda nir’ la daa lihiri sinsabisi mini olivi tihi din daa be Shɛfɛla la, ka Jɔash daa su kpam ni be du’ shɛŋa ni fukumsi.

²⁹Ka Shitirai ŋun daa nyɛ Sharɔn nir’ la daa lihiri naɣ’ shɛb’ bɛn daa be Sharɔn ka Shafat ŋun daa nyɛ Adilai bia la daa lihiri naɣ’ shɛb’ bɛn be vinvamli ni.

³⁰Obil ŋun daa nyɛ Ishimail zuliya ni nir’ la daa lihirila laakumnima, ka Jɛdɛiya ŋun daa nyɛ Mɛrɔnɔt nir’ la daa lihiri bunsi, ka Jaziz ŋun daa nyɛ Hagiri nir’ la mi daa lihiri piɛri mini buhi.

³¹Bɛmbɔŋɔnim’ zaa daa nyɛla bɛn lihiri Naa Dauda daazichi.

³²Dauda bapira Jɔnatan n-daa nyɛ saawaralana ŋun mi niriba yɛlimuɣisira, ka lan nyɛ gbansabira karimba. O mini Jɛhiɛl ŋun daa nyɛ Hachimɔni bia la n-daa nyɛ bɛn lihiri naa bidibisi.

³³Ahitɔfɛl daa nyɛla naa Saawaralana, ka Hushai ŋun daa nyɛ Ariki nir’ la daa nyɛ naa zo sumo.

³⁴Ahitɔfɛl kalinsi nyaaŋa Jɛhɔiada ŋun daa nyɛ Bɛnaaya bia la mini Abiata n-daa zan’ o zaani. Ka Jɔab mi daa nyɛ naa tɔbbihi sapashin’ kpɛma.