Read Dagbani 1 Yɛlikura 29 Bible Online

1 Yɛlikura 29 - Dagbani bible

1 Yɛlikura 29

¹Naa Dauda daa yɛli niriba bɛn laɣim maa zaa, “M bia Sulemaana n-nyɛ Naawuni ni pii so, ka o mi na nyɛ bi’ polli, ka bi mi tuma looloochi, ka tuma maa mi zooi; dama pa ninsal’ duu ka ti yɛn me, amaa Yawɛ ŋun nyɛ Naawuni ŋɔ jɛmbu duu ka ti yɛn me maa.

² Dinzuɣu n kpaŋ mmaŋa m-bo nɛma din ni me n Naawuni duu maa, m-bo salima din ni mali salima binyɛra mini anzinfa din ni mali anzinfa binyɛra ni daanya din ni mali daanya binyɛra ni kuriti din ni tum kuriti tuma ni dakuɣiri din ni tum’ dari tuma ni kuɣ’ kpɛra ni kuɣ’ viɛla din ni pie taba ni din ni ŋma bilichiisi ni kuɣ’ shɛŋa din mal’ liɣisibu ni kuɣ’ viɛla balibu kam ni nyolinsi pam.

³Din pahi nyɛla n ni bo binshɛŋa zaa ni bɛ me du’ kasi maa, n lan mali mmaŋmaŋ’ daazichi din nyɛ salima mini anzinfa, ka n ni zaŋ n zaŋsim zaa niŋ n Naawuni duu ŋɔ mɛbu ni maa zuɣu, n zaŋ li ti ni bɛ tum n Naawuni duu maa tuma.

⁴M mali Ofiri salima din gari tɔn kɔbiga mini anzinfa din nyɛ alali tɔn kɔbisiyi ni pihinahi ni bɛ zaŋ li dooi pa Naawuni jɛmbu duu maa dukpina zuɣu.

⁵N lan mali salin’ shɛli nuhi tuun’ baŋsimnim’ ni ti yɛn zaŋ tum salima tuma mini anzinfa shɛli bɛ ni ti yɛn zaŋ tum anzinfa tuma. Ka ŋuni n-lee ni zaŋ omaŋ’ zaa ti Yawɛ zuŋɔ dabisili ŋɔ, ka ti binshɛli ka di nyɛla o suhuyubu zuɣu?”

⁶Di saha ka daŋ kam ni kpamba mini zuliya kam ni kpamba daa ti bɛ pina ni bɛ suhu yubu. Ka tɔbbi’ kpamba bɛn daa su tɔbbihi tuhilituhili mini bɛn su tɔbbihi kɔbigakɔbiga fukumsi la ni kpamba bɛn daa lihiri nayili tuma la nim’ zaa gba ti bɛ pina ni bɛ suhu yubu.

⁷Bɛ daa tɔhi salima ka di gari tɔn kɔbiga ni pisopɔin, ka tɔhi anzinfa tɔn kɔbisita ni pihinahi, ka tɔhi daanya kaman tɔn kɔbisiyɔbu ni pisi ka tɔhi kuriti gari tɔn tusaata ni kɔbisinahi ni bɛ zaŋ li tum Naawuni duu maa mɛbu tuma.

⁸Ka ŋunkam daa mali kuɣ’ viɛla zaŋ li ti niŋ Yawɛ jɛmbu duu maa daazichi ni be luɣ’ shɛli, ka Jɛhiɛl ŋun daa nyɛ Gɛrishɔn zuliya nir’ la daa gul’ li,

⁹ka di daa niŋ niriba maa suhupiɛlli pam, dama bɛ daa zaŋ li ti Yawɛ ni suhu yini ka di nyɛ bɛ suhuyubu. Ka di daa niŋ Naa Dauda gba nyaɣisim pam.

¹⁰Di nyaaŋa ka Dauda daa paɣi Yawɛ zama maa zaa ninni ka yɛli, “Ti paɣiri nyini Yawɛ ŋun nyɛ ti yab’ Izraɛl Naawuni ŋɔ sahakam.

¹¹ Nyini n-galisi, ka su yiko mini jilima ni nasara ni nam dariza zaa, dama nyini n-su binshɛɣukam din be zuɣusaa ni tiŋa. Yawɛ, nyini n-nya duhibu gari sokam zaa.

¹²Buni mini jilima zaa yirila a sanna, nyini n-su binshɛɣukam zaa. A nuu ni ka yiko ni kpiɔŋ be, ka a zaŋ a nuu maa namdi wɔɣira, ka tiri sokam yaa.

¹³Dinzuɣu ti Naawuni, ti puhir’ a ka paɣir’ a yuli din mali jilima ŋɔ.

¹⁴Amaa m mini n niriba ŋɔ mi lee nyɛ banima, ka ni tooi zaŋ pina ŋɔ ti a ti suhu yubu puuni? Dama binshɛɣukam zaa yila a sanna, a ni su shɛli ka ti lan zaŋ ti a maa.

¹⁵Ti nyɛla saamba bɛn go n-chani gind’ a tooni kaman ti yaannim’ la. Ti dunia ŋɔ ni biɛhigu ŋmanila shilinshia, ka tahima kani.

¹⁶Yawɛ ŋun nyɛ ti Naawuni ŋɔ, ti ni bo bin’ gbaliŋ shɛŋa zaa ni ti me jɛmbu duu n-ti a yuli din be kasi ŋɔ zaa nyɛla din yi a nuu ni na, ka nyɛ a ni su shɛli.

¹⁷N Naawuni, m mi ni nyini n-zahindi baŋdi din be suhu ni, ka a nini tiɣiri ninvuɣ’ shɛb’ bɛn mali nimmaŋtali. N nimmaŋtali puuni ka n zaŋ pina ŋɔ na ti ti a ni n suhu zaa, ka pumpɔŋɔ, n nyaya ka a niriba bɛn laɣim kpe ŋɔ na gba zaŋ bɛ pina na ti tir’ a bɛ suhu yubu puuni ni suhupiɛlli.

¹⁸Yawɛ ŋun nyɛ ti yaannim’ bɛn nyɛ Ibrahimma mini Yisahaku ni Izraɛl Naawuni ŋɔ, ŋmaligim’ a niriba ŋɔ suhuri kpa a polo, ka chɛ ka bɛ ni mali nia shɛŋa mini tɛhi shɛŋa ŋɔ kul ni be bɛ suhuri ni sahakam.

¹⁹Chɛ ka m bia Sulemaana dol’ a fukumsi zaligunim’ min’ a zaligu shɛŋa din pahi ni o suhu zaa, ka tumdi di tuma din ni chɛ ka o tooi me a jɛmbu du’ shɛli n ni pun bo nɛma zali ni di me ŋɔ.”

²⁰Di saha ka Naa Dauda daa yɛli niriba maa zaa, “Paɣimiya Yawɛ ŋun nyɛ yi Naawuni ŋɔ.” Ka zama maa zaa daa paɣi Yawɛ ŋun nyɛ bɛ yaannim’ Yawɛ maa, ka silim bɛ zuɣuri tiŋa n-jɛm Naawuni, ka lu naa sizuura.

²¹N-daa yi biɛɣu ka bɛ mali bɛ ni zaŋdi sara shɛli nyɔri buɣim la ti Yawɛ. Bɛ daa kɔrila naɣilahi tuhili mini piɛlahi tuhili ni piɛbihi pola tuhili, m-pahi bɛ binnyura pina zuɣu m-mali sara pam Izraɛlnim’ zaa zuɣu.

²²Ka bɛ daa di ka nyu dindali maa ni suhupiɛlli pam Yawɛ tooni. Ka bɛ daa lan booi kpam bahi Dauda bia Sulemaana zuɣu ni n-zaŋ o leei naa ti Yawɛ m-pahi buyi, ka zaŋ Zadok leei maligumaana.

²³ Di saha ka Sulemaana daa ʒini Yawɛ nam ʒiishee maa zuɣu n-zan’ o ba Dauda zaani leei naa. O daa tɔŋya, ka Izraɛlnim’ zaa daa deeg’ o noli.

²⁴Ka zuɣulaannim’ mini wɔɣira zaa nti pahi Naa Dauda bidibisi bɛn daa kpalim la zaa daa lo alikauli ni bɛ ni doli Naa Sulemaana.

²⁵Ka Yawɛ daa duhi Sulemaana pam Izraɛlnim’ zaa sani, ka lan chɛ ka o nam mali dariza pam gari na’ shɛb bɛn daa pun daŋ o tooni Izraɛl tiŋgbɔŋ ni maa zaa.

²⁶Jɛsi bia Dauda daa di nam n-sula Izraɛlnim’ zaa.

²⁷ O daa di nam su Izraɛlnim’ la yuun’ pihinahi, o daa di nam ʒini Hiburɔn la yuma ayopɔin, ka ʒini Jɛrusalɛm mi yuun’ pihitanaata.

²⁸O daa kurigiya zaa, ka mali azichi mini jilima, ka o dabisa daa ti pali, ka o naanyi kpi, ka o bia Sulemaana daa di nam zan’ o zaani.

²⁹Pumpɔŋɔ Naa Dauda piligu ni o bahigu tuma zaa sab’ bela anabi Samuɛl yɛlikura yɛla teebu litaafi ni, ka lan sab’ be anabi Neetan mini anabi Gaad yɛlikura yɛla teebu litaafinim’ ni.

³⁰Di wuhir’ o ni daa di nam shɛm min’ o kpiɔŋ ni binshɛŋa din daa niŋ o mini Izraɛlnim’ zaa zaŋ tabili dunia ŋɔ nanim’ zaa yɛla.