Read Dagbani 2 Yɛlikura 13 Bible Online

2 Yɛlikura 13 - Dagbani bible

2 Yɛlikura 13

¹Jɛrɔbɔam ni daa di Izraɛl nam ka di ti paai yuun’ pisaayika saha shɛli, ka Abija mi daa leei Juda naa.

²Ka o daa di nam ʒini Jɛrusalɛm’ yuma ata. O ma yuli n-daa booni Mikaya, o daa nyɛla Uriɛl ŋun daa nyɛ Gibia nir’ la bipuɣiŋga. Ka tɔb’ daa ti lu Abija mini Jɛrɔbɔam sunsuuni,

³ka Abija daa laɣim dɔbba bɛn mali suhukpeeni din ni tuhi tɔbu ka lan nyɛ bɛn mi tɔb’ tuhibu ninvuɣ’ tuhi’ kɔbisinahi ni bɛ chaŋ tɔbu tuhibu. Ka Jɛrɔbɔam mi daa laɣim tɔbutuhiri’ biinsi bɛn nyɛ wɔɣira ninvuɣ’ tuhi’ kɔbisinii ni bɛ tuhi taba.

⁴Di saha ka Abija daa du n-tam zo’ shɛli din yuli booni Zɛmaraim Zoli din be Ifriim tiŋgban’ ni zoya ni la zuɣu ka yɛli, “Nyin’ Jɛrɔbɔam mini Izraɛlnim’ zaa, wummiya n ni yɛn yɛli shɛm ŋɔ!

⁵Yi bi mi ni Yawɛ ŋun nyɛ Izraɛlnim’ Naawuni ŋɔ daa lola alikauli din ka lɔrigibu n-zaŋ nam ti Dauda min’ o bidibisi ni bɛ su Izraɛlnim’ ʒiɛmani kam ni?

⁶Amaa ka nyin’ Nɛbat bia Jɛrɔbɔam ŋun nyɛ Dauda bia Sulemaana dabili ŋɔ ti zaɣis’ a duuma,

⁷ka ninvuɣ’ galima bɛn ka buchi laɣimna ti pah’ o zuɣu, ka bɛ zaɣisi Naa Sulemaana bia Rɛhɔbɔam ŋun daa na nyɛ bipolli ka o yɛm na bi ziligi ka o ku tooi nyaŋ ba la noli.

⁸Pumpɔŋɔ ka yi ti tɛhi ni yi ni mali niriba pam, ka lan mali salima naɣila’ shɛb’ Jɛrɔbɔam ni mali tin ya, ka bɛ nyɛ yi buɣa la zuɣu yi ni tooi tuhi Yawɛ nam shɛli o ni zaŋ niŋ Dauda bihi nuu ni ŋɔ.

⁹Yi bi kari Yawɛ maligumaaniba bɛn nyɛ Aduna bihi la mini Lɛvinim’ zaa ka zalila yimaŋmaŋ’ maligumaaniba kaman tiŋgban’ shɛŋanim’ ni niŋ shɛm la? Ka ŋunkam zaŋ naɣilaa bee piɛlah’ ayopɔin kana ni o ti mal’ omaŋ’ kasi, o leerila yi buɣ’ shɛŋa bɛn pa Naawuni la maligumaana.

¹⁰Amaa tinim’ bɛna, Yawɛ n-nyɛ ti Naawuni, ka ti na ʒi n-zaɣis’ o. Aduna bidibisi n-nyɛ ti maligumaaniba bɛn maani sara tiri Yawɛ ka Lɛvinim’ nyɛ bɛn sɔŋdi ba.

¹¹Bɛ maani sara shɛli bɛ ni zaŋdi nyɔri buɣim la tiri Yawɛ asiba mini zaawuni kam, ka lan tuɣindi tulaale zim shɛli din nyom viɛla n-zaŋdi li zaani baɣindi bɔrɔbɔro kasi din tam salima alali teebuli zuɣu, ka lan yuuni salima firila tamdigu la din ni chɛ ka di firila maa kul diri zaawuni kam, dama tinim’ nyɛla bɛn gbibi Yawɛ ŋun nyɛ ti Naawuni ŋɔ ni zali ti shɛm, amaa ka yinim’ zaɣis’ o.

¹²Nyamiya, Naawuni be ti sani, ŋuna n-nyɛ ti zuɣulana, ka o maligumaaniba mi mali tɔbutuhiri’ kikahi ni bɛ piɛb’ niŋ ti ka ti tuhi ya. Dinzuɣu yinim’ Izraɛlnima, miriya ka yi tuhi Yawɛ ŋun nyɛ yi yaannim’ Naawuni ŋɔ, dama yi ku di nasara.”

¹³Jɛrɔbɔam daa chɛ ka tɔbbi’ shɛb’ lɔɣi gilila Judanim’ maa nyaaŋa nti sɔɣi dɔni gu ba, ka bɛn kpalim mi be bɛ tooni polo.

¹⁴Ka Judanim’ maa daa nya ka tɔb’ maa be n-gili ba tooni ni nyaaŋa zaa, ka bɛ suhi Yawɛ ka maligumaaniba daa piɛbi bɛ kikahi.

¹⁵Di saha ka Judanim’ maa daa bu tɔb’ zambu. Bɛ ni daa bu tɔb’ zambu maa, ka Naawuni daa nyaŋ Jɛrɔbɔam mini Izraɛlnim’ zaa bɛn daa be Abija mini Judanim’ tooni maa.

¹⁶Ka Izraɛlnim’ maa daa ŋmaligi guui ka chɛ Judanima, ka Naawuni daa chɛ ka Judanim’ maa nyaŋ ba.

¹⁷Ka Abija min’ o tɔbbihi maa daa ku ba pam, ka bɛ ni daa ku Izraɛlnim’ maa ninvuɣ’ shɛb’ daa nyɛla tɔbutuhiri’ biinsi tuhi’ kɔbisinu.

¹⁸Ka Izraɛlnim’ maa daa tuhi lu di saha maa, ka Judanim’ di nasara, dama bɛ daa niŋla Yawɛ ŋun nyɛ bɛ yaannim’ Naawuni la naani.

¹⁹Di saha ka Abija daa kari doli Jɛrɔbɔam nti ŋme n-deeg’ o tinsi; Bɛtɛl mini di tiŋkpansi ni Jɛshana mini di tiŋkpansi ni Ɛfurɔn mini di tiŋkpansi.

²⁰Abija ʒiɛmani maa ni Jɛrɔbɔam daa bi lan nya yaa, ka Yawɛ daa ti ŋme o luhi ka o kpi.

²¹Amaa Abija ŋun’ yaa daa kul kirisimi. O daa kpuɣila paɣiba pinaanahi n-dɔɣi bidibisi pisinaayi mini bipuɣinsi pinaayɔbu.

²²Abija tuun’ shɛŋa din pahi min’ o yɛtɔɣa ni o tuma zaa, bɛ sabi li niŋ anab’ Iddo yɛlikura litaafi ni.