Read Dagbani 2 Yɛlikura 14 Bible Online

2 Yɛlikura 14 - Dagbani bible

2 Yɛlikura 14

¹Ka Abija daa ti faai siɣ’ o yaannim’ sani, ka bɛ sɔɣ’ o Dauda tiŋ’ la ni. Ka o bia Asa daa di nam zan’ o ba zaani. Asa ʒiɛmani maa ni, bɛ mini so daa bi tuhi tɔbu hal ni yuun’ pia.

²Asa daa tum din tuhi ka viɛla Yawɛ ŋun nyɛ o Duuma Naawuni sani.

³O daa wurim tinzun buɣa maligu bimbina la mini buɣa jɛmbu shee, ka ŋme n-kabisi di daantalisi, ka wurim Ashɛrim.

⁴O daa zali Judanim’ ni bɛ jɛmmila Yawɛ ŋun nyɛ bɛ yaannim’ Naawuni la kɔŋko, ka dol’ o fukumsi zaligunim’ mini zaligu shɛŋa din pahi.

⁵O daa lan wurim Juda tiŋgban’ ni fɔntinsi ni zaa buɣa mini bɛ ni daa yi tuɣindi tulaale zim bimbin’ shɛŋa zuɣu la zaa, ka di zuɣu daa chɛ ka suhudoo be o nam ʒiɛmani maa ni.

⁶Ka o daa me goondahi gili Juda fɔntinsi, vuhim ni daa be tiŋgbani maa ni saha shɛli, dama o mini so daa bi zabira. O daa bi tuhi tɔbu di yuma maa ni, dama Yawɛ daa ti o vuhim.

⁷Ka o daa yɛli Judanima, “Chɛliya ka ti me fɔntinsi, ka me goondahi mini dufahira din du pam gil’ li, ka niŋ dunɔdaya mini dunokparitisi niŋ li. Tiŋgbani maa nyɛla ti dini, dama ti jɛmdila Yawɛ ŋun nyɛ ti Naawuni ŋɔ. Ti ni jɛmd’ o maa zuɣu ka o ti ti suhudoo luɣilikam maa.” Dinzuɣu ka bɛ daa me binshɛɣukam maa ka bɛ biɛhigu tɔŋ.

⁸Asa daa malila tɔbbihi tuhi’ kɔbisita Juda tiŋgban’ ni, bɛ bidibbina daa nyɛla kpana mini nyɔtaɣirisi zaɣ’ yɛlima, ka daa lan mali tɔbbihi tuhi’ kɔbisiyi ni tuhi’ pihinii Bɛnjamin zuliya tiŋgban’ ni, bɛ bidibbina daa nyɛla tɔbiri mini nyɔtaɣirisi; bɛ zaa daa nyɛla tɔbutuhiri’ biinsi.

⁹Ka Zɛra ŋun daa nyɛ Itiɔpia nir’ la tɔbbihi tuhi’ tuhili mini chɛchɛbunsi kɔbisita kana ti liri ba Marɛsha.

¹⁰Ka Asa daa chaŋ ni o ti tuh’ o. Ka bɛ zaa daa zani bɛ tɔb’ gɔri ni Zɛfata din daa be Marɛsha la vinvamli ni.

¹¹Ka Asa daa suhi Yawɛ ŋun nyɛ o Naawuni ŋɔ yɛli, “Yawɛ, a ni sɔŋdi bɛn mali yaa shɛm lala ka a sɔŋdi bɛn ka yaa gba. Yawɛ ŋun nyɛ ti Naawuni ŋɔ, sɔŋmi ti, dama nyini ka ti niŋ naani, ka zaŋ a yuli kana ni ti ti tuhi salo ŋɔ zaa. Yawɛ, nyini n-nyɛ ti Naawuni, di chɛ ka ninsal’ nyaŋ a.”

¹²Ka Yawɛ daa nyaŋ Itiɔpianim’ maa ti Asa mini Judanima ka Itiɔpianim’ maa daa ŋmaligi guui.

¹³Ka Asa mini tɔbbihi bɛn daa be o sani maa daa kari doli ba ni Gɛra n-daa ku Itiɔpianim’ maa zaa ka so bi kpalim, dama Yawɛ min’ o tɔbbihi daa ku ba. Ka Judanim’ maa daa di nɛma pam chaŋ.

¹⁴Ka bɛ daa nyaŋ tin’ shɛŋa din daa gili Gɛra maa nim’ zaa, dama Yawɛ yɛla daa gbahi ba dabiɛm. Ka tɔbbihi maa daa ʒe fɔntinsi maa zaa nɛma chaŋ, dama nɛma daa be tinsi maa ni.

¹⁵Bɛ daa liri bɛn mali biŋkɔbiri n-taɣi piɛri mini buhi ni laakuma chaŋ. Di nyaaŋa ka bɛ daa lab’ kuli Jɛrusalɛm.