Read Dagbani 2 Yɛlikura 19 Bible Online

2 Yɛlikura 19 - Dagbani bible

2 Yɛlikura 19

¹Ka Juda Naa Jɛhɔshafat daa lab’ kul’ o ya Jɛrusalɛm ni alaafee.

²Ka Hanani bia Jɛhu ŋun daa nyɛ anabi la daa yi n-chaŋ ti tuhi Naa Jɛhɔshafat soli n-yɛl’ o, “A tɛhiya ni di simdi ni a sɔŋdi ninvuɣ’ biɛri ka yuri bɛn je Yawɛ? A ni niŋ shɛm ŋɔ zuɣu, Yawɛ suhu yiɣisiya pam bahi a zuɣu.

³Amaa a nyɛla ŋun tum tuun’ suma, dama a daa wurim Ashɛra ŋmahima zaa tiŋgbɔŋ ŋɔ ni, ka zaŋ a suhu zaa niŋla Naawuni jɛmbu ni.”

⁴Jɛhɔshafat daa ʒila Jɛrusalɛm, ka daa kul chani Bɛrishiiba hal ni Ifriim zoya ni tinsi la zaa ni niriba sani nti lan labisi ba Yawɛ ŋun nyɛ bɛ yaannim’ Naawuni ŋɔ jɛmbu ni yaha.

⁵O daa lan zali sariakaritiba bɛ ni daa me goondahi gili Juda tiŋgban’ ni fɔntin’ shɛŋa la zaa yiniyini ni

⁶ka yɛli sariakaritiba maa, “Gbibiya yimaŋ’ viɛnyɛliŋga yi saria karibu ni, dama pa ninsalinim’ ka yi yɛn niŋdi li tira, amaa Yawɛ ka yi yɛn niŋdi li tira. O be yi sani yi saria karibu ni.

⁷Dinzuɣu zomiya Yawɛ, ka gbaamiya yimaŋ’ yi tuma ni; dama Yawɛ ŋun nyɛ ti Naawuni ŋɔ bi bɔri ŋaribu bee gaŋbu bee yi bɔri ni niriba tiri ya birapu”.

⁸Jɛhɔshafat daa lan pii Lɛvinim’ mini maligumaaniba ni Izraɛl daŋ kam puuni kpɛma n-leei Jɛrusalɛm sariakaritiba ni bɛ kariti saria tiri Yawɛ, ka maani niriba yɛla. Bɛ daa ʒila Jɛrusalɛm.

⁹Ka o daa kpahi bɛ zuɣu ni yɛli, “Di simdi ka yi zɔri Yawɛ ka tum tuma maa ni ʒiɛyimtali ni yi suhu zaa.

¹⁰Yi mabihi yi yi fɔntin’ shɛli ni n-zaŋ yɛtɔɣa tahi yi sanna ka di nyɛla ninvuɣ’ kubo yɛtɔɣa bee kali shɛli bee fukumsi zaligu shɛli birigibu yɛtɔɣa, yin’ wuhimi ba bɛ ni yɛn niŋ shɛm ka ku kpe taali ni Yawɛ sani ka o suhu yiɣisi bahi yi mini ba zuɣu. Niŋmiya lala ka ku kpe taali ni.

¹¹Nyamiya, Amaria ŋun nyɛ maligumaaniba kpɛm’ ŋɔ n-yɛn su yi fukumsi zaŋ chaŋ Yawɛ yɛlli kam polo. Ishimail bia Zɛbadia ŋun nyɛ Juda zuliya ni gomna la mi n-yɛn su yi fukumsi zaŋ chaŋ naa yɛlli kam polo. Ka Lɛvinim’ mi nyɛ kpamba bɛn yɛn sɔŋdi ya. Maliya suhukpeeni, Yawɛ ni be ŋunkam tumdi din’ tuhi sani.”