Read Dagbani 2 Yɛlikura 20 Bible Online

2 Yɛlikura 20 - Dagbani bible

2 Yɛlikura 20

¹Dimbɔŋɔ nyaaŋa ka Mɔabnim’ mini Ammɔnnim’ ni Miunnim’ shɛb’ daa ti lo tɔb’ na ni bɛ ti tuhi Jɛhɔshafat.

²Ka ninvuɣ’ shɛb’ daa kana ti yɛli Jɛhɔshafat, “Salo pam yi Ɛdom kanna ni bɛ ti lir’ a, bɛ yila teekubil’ duli yaɣ’ din’ la polo kanna, ka pumpɔŋɔ bɛ bela Hazazɔntarima.” (Dina n-nyɛ Ɛngɛdi.)

³Ka dabiɛm daa gbaai Jɛhɔshafat, ka o niŋ nimmoo suhi Yawɛ, ka moli molo ni sokam lom noli Juda tiŋgbani maa ni zaa.

⁴Ka Judanim’ daa laɣim ni bɛ suhi Yawɛ ka o sɔŋ ba. Bɛ daa yila Juda fɔntinsi zaa ni n-laɣimna ni bɛ ti niŋ nimmoo suhi Yawɛ.

⁵Ka Judanim’ mini Jɛrusalɛmnim’ daa laɣim zani Yawɛ jɛmbu duu dundɔn palli la ni, ka Jɛhɔshafat daa kana ti zani bɛ sani

⁶n-yɛli, “Yawɛ ŋun nyɛ ti yaannim’ Naawuni ŋɔ, pa nyini n-nyɛ alizanda Naawuni? Pa nyin’ n-nyɛ ŋun su zuliya kam zaa nam fukumsi? Kpiɔŋ mini yiko bela a nuu ni, ka so ku tooi mo a.

⁷ Yaa ti Naawuni, pa nyini n-daa kari tiŋgbɔŋ ŋɔ ni niriba ka chɛ a niriba Izraɛlnima, ka zaŋ li ti a zo Ibrahimma zuliya sahakam la?

⁸Ka bɛ daa ʒini di ni ka me a luɣ’ kasi shee ni bɛ jɛmd’ a ka yɛra,

⁹‘Zaɣ’ biɛɣu yi ti paai ti, kaman tibidarigibo tɔbu bee alɔbo bee fifali, ka ti ka a duu ŋɔ gbin’ na nti zani a tooni n-fabili niŋ a ti muɣisigu saha a ni wum ti fabila maa ka tiligi ti dama a be duu ŋɔ ni.’ ”

¹⁰ Ka pumpɔŋɔ nyama, Ammɔnnim’ mini Mɔabnim’ ni Ɛdom[3] zoli zuɣunima lola tɔb’ na ni bɛ ti liri ti. Saha shɛli Izraɛlnim’ ni daa yi Ijipti tiŋgbɔŋ ni na ka a bi saɣi ni bɛ kpe zuliya shɛba tiŋgbɔna ni, ka bɛ daa chɛ ba ka bi ku ba la,

¹¹bɛ ni yɛn yo ti sam’ shɛli nyɛla bɛ kana ni bɛ ti kari ti a ni zaŋ tiŋgbɔn shɛli ti ti ni ti su maa ni.

¹²Ti Naawuni a ku darigi bɛ tibili ti ti? Dama ti ka yiko din ni tooi tuhi salo pam bɛn kanna ni bɛ ti tuhi ti ŋɔ. Ti bi mi ti ni yɛn niŋ shɛm, amaa nyini ka ti kul lihira.

¹³Di saha maa Judanim’ zaa mini bɛ paɣiba ni bɛ biliɛri ni bɛ bi’ kura zaa daa ʒiɛla Yawɛ tooni.

¹⁴Ka Yawɛ Shia daa siɣi Jahaziɛl zuɣu na niriba maa ni. Jahaziɛl daa nyɛla Zakaria bia, ka Zakaria nyɛ Bɛnaaya bia, ka Bɛnaaya nyɛ Jɛiɛl bia, ka Jɛiɛl mi nyɛ Matania ŋun daa yi Lɛvi zuliya ni na ka nyɛ Asaf daŋ ni nir’ la bia.

¹⁵Ka o daa yɛli, “Yinim’ Judanim’ zaa mini Jɛrusalɛmnim’ ni Naa Jɛhɔshafat, Wummiya; Yawɛ ni yɛli ya shɛm m-bɔŋɔ: ‘Di zɔriya dabiɛm, ka di chɛliya ka yi suhuri zɔhiri salo pam zuɣu, dama tɔb’ maa pala yi dini, amaa di nyɛla Naawuni dini.

¹⁶Biɛɣuni sa siɣimiya ti tuhi ba. Bɛ sa yɛn dolila Ziz polo duna. Yi sa ni tuhi ba soli vinvamli maa tariga Jɛruɛl tiŋgban’ nɛl’ la ni.

¹⁷ Yinim’ Judanim’ mini Jɛrusalɛmnima, di zɔriya dabiɛm, yi mi di chɛ ka yi suhuri zɔhira, dama pa yinima n-yɛn tuhi tɔb’ maa, yinim’ dee’ kul chamiya ti zani yi zaashee, ka nya Yawɛ ni yɛn tum faako tuun’ shɛli tin ya. Biɛɣuni sa yimiya chaŋ ti liri ba, Yawɛ ni be yi sani.’ ”

¹⁸Di saha ka Jɛhɔshafat daa silim o zuɣu n-zaŋ o nini kpa tiŋa, ka Judanim’ mini Jɛrusalɛmnim’ zaa daa lu tiŋa Yawɛ tooni jɛm’ o.

¹⁹Ka Lɛvinim’ bɛn daa nyɛ Kɔhat daŋ niriba mini Kɔra daŋ niriba la daa yiɣisi zani ŋ-ŋme kuŋ’ pam paɣi Yawɛ ŋun nyɛ Izraɛlnim’ Naawuni ŋɔ.

²⁰Ka bɛ daa yiɣisi asiba nolɔɣu kukoli saha n-yi n-chaŋ Tɛkɔa tiŋgban’ nɛli ni. Bɛ ni daa yiri maa, ka Jɛhɔshafat yiɣisi zani yɛli ba, “Yinim’ Judanim’ mini Jɛrusalɛmnima, wummiya n ni yɛn yɛli shɛm ŋɔ: Niŋmiya Yawɛ ŋun nyɛ yi Naawuni ŋɔ yɛda ka o chɛ ka yi ba n-zani. Niŋmiy’ o daanabinim’ yɛda ka di nasara.”

²¹Ka o mini niriba maa gbaai saawara naai, ka o daa pii baansi shɛba ni bɛ zaŋ bɛ neen’ kasinim’ yɛna ti yili yila paɣi Yawɛ. Ka baansi maa daa gari tɔbbihi maa tooni ka ŋme kuŋ’ yɛli, “Paɣimiya Yawɛ, dama o yurilim bi naara.”

²²Bɛ ni daa kul piligi yiini wumpaɣibo yilli maa, ka Yawɛ daa chɛ ka mbusim lu Ammɔnnim’ mini Mɔabnim’ ni Ɛdom zoli zuɣunim’ bɛn daa laɣim kana ti liri Judanim’ maa zuɣu, ka bɛ daa birim ka ŋmaligi lu tab’ zuɣu ku taba.

²³Dama Ammɔnnim’ mini Mɔabnim’ daa yiɣisimi lu Ɛdom Zoli zuɣunim’ maa zuɣu kuri ba. Bɛ ni daa ti ku ba naai, ka bɛ lan ŋmaligi lu tab’ zuɣu n-ku taba.

²⁴Ka Judanim’ daa ti paai luɣ’ shɛli din du pam mɔɣu ni la shee, ka bɛ daa du li n-lihi tɔbbi’ gbaliŋ la polo, n-nya ka kpiimba n-do tiŋa, ka bɛ so bi tiligi.

²⁵Jɛhɔshafat min’ o niriba ni daa kana ni bɛ ti di bɛ nɛma maa, bɛ daa nya nɛma pam mini kpiimba ni binsuma bɛ sani, ka bɛ daa va li hal ti ku lan tooi ʒi li yaha. Bɛ daa zaŋla daba ata va nɛma maa, di ni daa galisi pam zuɣu.

²⁶Dabisi’ shɛli din pahir’ anahi dali ka bɛ daa laɣim Bɛraka Vinvamli ni, [4] dama nimaani ka bɛ daa paɣi Yawɛ. Dinzuɣu ka bɛ daa boli nimaani Bɛraka Vinvamli hal ni zuŋɔ.

²⁷Di saha ka Judanim’ mini Jɛrusalɛmnim’ ni bɛ zuɣulan’ Jɛhɔshafat daa lab’ kuli Jɛrusalɛm ni suhupiɛlli, dama Yawɛ daa chɛ ka bɛ nya suhupiɛlli o ni daa nyaŋ bɛ dimnim’ ti ba maa zuɣu.

²⁸Ka bɛ daa ka Jɛrusalɛm na nti ŋme mɔɣilɔnim’ mini goonjɛnima, ka piɛbi kikahi ti kpe Yawɛ duu.

²⁹Ka Naawuni yɛla daa gbaai tiŋgbɔna nam kam zaa dabiɛm, bɛ ni daa wum Yawɛ ni tuhi Izraɛlnim’ dimnim’ shɛm maa zuɣu.

³⁰Ka suhudoo daa be Naa Jɛhɔshafat ʒiɛmani maa ni, dama o Naawuni daa ti o vuhim luɣilikam zaa.

³¹Jɛhɔshafat ni daa di nam n-su Judanim’ shɛm m-bala. O yuma daa nyɛla yuun’ pihitanaanu saha shɛl’ o ni daa di nam, o daa dila nam maa yuun’ pisinaanu Jɛrusalɛm. O ma yuli n-daa booni Azuba, o daa nyɛla Shilihi bipuɣiŋga.

³²Jɛhɔshafat daa kul dolila o ba Asa soli ka bi birigi li. O daa kul tumdila din tiɣiri Yawɛ nini.

³³Amaa bɛ daa bi wurim buɣa jɛmbu shee la. Dina n-daa chɛ ka niriba maa daa na bi zaŋ bɛ suhuri zaa labisi bɛ yaannim’ Naawuni jɛmbu polo.

³⁴Jɛhɔshafat ni daa tum tuun’ shɛŋa pahi piligu ni hal ti paai di bahigu ni, bɛ sab’ di yɛla niŋ Hanani bia Jɛhu yɛlikura sabbu ni, ka di be Izraɛl Nanim’ litaafi ni.

³⁵Dimbɔŋɔ nyaaŋa ka Juda Naa Jɛhɔshafat maa daa zaŋ omaŋ’ ti tabili Izraɛl Naa Ahazia ŋun daa tum tuumbiɛri pam la.

³⁶O daa zaŋla’ omaŋ’ tabil’ o ka bɛ be Ɛziɔngɛba m-maani ŋarima ni bɛ zaŋdi li chani Speen.[5]

³⁷Di saha ka Dɔdavahu ŋun daa nyɛ Marɛsha nir’ la bia Ɛliɛza daa tɔɣisi anabitali yɛtɔɣa jɛndi Jɛhɔshafat yɛli, “A ni zaŋ amaŋ’ tabili Ahazia maa zuɣu Yawɛ ni saɣim a tuma maa.” Ka ŋarima maa daa chaŋ ti saɣim sol’ ni ka bi paai Speen.