Read Dagbani 2 Yɛlikura 23 Bible Online

2 Yɛlikura 23 - Dagbani bible

2 Yɛlikura 23

¹Amaa yuun’ shɛli din daa pahiri yuma ayopɔin la ni ka maligumaana Jɛhɔiada daa niŋ suhukpeeni n-chaŋ ka o mini sapashin’ kpamba shɛb’ bɛn daa su tɔbbihi kɔbigakɔbiga ti tɔɣisi naai noli. Bɛna n-daa nyɛ: Jɛrɔham bia Azaria mini Jɛhɔhanan bia Ishimail ni Azaria bia Obɛd ni Adaya bia Maasɛya ni Zikiri bia Ɛlishafat.

²Ka bɛ daa chaŋ gili Juda tiŋgban’ ni fɔntinsi zaa ni nti laɣim Lɛvinim’ mini Izraɛl dɔɣirikpamba, ka bɛ ka Jɛrusalɛm na.

³ Ka niriba maa zaa daa lo naa alikauli Naawuni jɛmbu duu maa puuni. Ka Jɛhɔiada daa yɛli ba, “N-nyɛ nabia maa, chɛliya ka o di nam kaman Yawɛ ni daa yɛli shɛm zaŋ chaŋ Dauda zuliya polo la.”

⁴O daa lan yɛli, “Yi ni yɛn niŋ shɛm m-bɔŋɔ: yi pirigibu buta puuni yim bɛn nyɛ maligumaaniba mini Lɛvinim’ bɛn yɛn be tuma ni Vuhim Dabisili dali yɛn nyɛla dunɔguliba,

⁵ka yim zuɣu be nayili, ka yim zuɣu mi be tanzaa dunɔdal’ la gbini. Ka zama zaa mi kpalim be Yawɛ jɛmbu duu maa dundɔŋ ni.

⁶So di kpe Naawuni jɛmbu duu maa puuni naɣila maligumaaniba mini Lɛvinim’ bɛn tumdi tuma la kɔŋko; bɛna n-ni tooi kpe di puuni, dama bɛna m-be kasi, amaa di simdi ka bɛnkam kpalim zaa saɣi Yawɛ ni zali ba shɛm maa.

⁷Lɛvinim’ ni gbibi bɛ bidibbina bɛ nuhi ni n-zani gili naa, ka ŋunkam kpe nayili maa na, bɛn’ kum’ o. Kul benya naa sani, o yi ti yɛn yina, yin’ benya o sani, ka o yi ti labiri kpɛra yin’ benya o sani.”

⁸Ka Lɛvinim’ mini Judanim’ zaa daa niŋ maligumaana Jɛhɔiada ni zali ba shɛm maa zaa. Ka sapashin’ kpɛm’ kam daa zaŋ o ninvuɣ’ shɛb’ bɛn yɛn deei tuma Vuhim Dabisili maa dali na nti pahi bɛn yɛn yiɣisi tuma ni kuli maa zuɣu, dama maligumaana Jɛhɔiada daa bi yɛli ba ni bɛ di lan tum tuma.

⁹Ka maligumaana Jɛhɔiada daa zaŋ Naa Dauda kpana la min’ o nyɔtaɣiri’ kara ni zaɣibihi zaa din daa be Naawuni duu la ni n-ti sapashin’ kpamba bɛn su tɔbbihi kɔbigakɔbiga maa,

¹⁰Ka chɛ ka niriba maa zaa gbibi bɛ bidibbina bɛ nuhi ni n-ʒe nudirigu mini nuzaa polo zaa gili naa ka shɛb’ mi ʒe n-gili sara maligu bimbini la mini duu maa.

¹¹Di saha ka o daa zaŋ nabia maa na nti zaŋ nam zuɣupiligu pil’ o, ka zaŋ nam fukumsi litaafi ti o, ka bɛ leeg’ o nam. Ka Jɛhɔiada min’ o bidibisi daa booi kpam bah’ o zuɣu ni. Ka sokam daa kuhi yɛli, “Naawuni dolimi naa ŋɔ nyɛvili.”

¹²Ka Atalia daa wum bɛ ni zɔri gindi ka paɣiri naa maa, ka o daa kpe Yawɛ duu maa ni niriba maa sani

¹³nti lihi nya ka naa maa ʒiɛla dunol’ ni o bimbini zuɣu, ka sapashin’ kpamba mini kika’ piɛbiriba ʒe o sani, ka tiŋgbani maa nim’ zaa suhuri daa paligi, ka bɛ piɛbiri bɛ kikahi. Ka baansi zaŋ bɛ biŋkumda m-be tooni ŋmɛra. Ka Atalia daa dari chɛh’ omaŋmaŋ’ situra, ka kuhi yɛli, “Nyaanyibo! Nyaanyibo!”

¹⁴Ka maligumaana Jɛhɔiada daa zaŋ sapashin’ kpamba bɛn daa su tɔbbihi zaa la yi nti yɛli ba, “Gbaamiy’ o tim tɔbbihi maa sunsuuni chaŋ, ka so yi dol’ o na, yin’ zaŋmiya takɔbi ku dilana.” Dama maligumaana maa daa yɛliya, “Di kuny’ o Yawɛ jɛmbu duu ŋɔ puuni.”

¹⁵Ka bɛ daa gbaag’ o n-zaŋ o chaŋ nayili dunɔdali din yuli daa booni wɔhu dunɔdal’ la gbini nti ku o nimaani.

¹⁶Ka Jɛhɔiada daa chɛ ka o mini niriba maa zaa ni naa lo alikauli ni bɛn’ yɛn nyɛla Yawɛ niriba.

¹⁷Di saha ka niriba maa zaa daa kabi chaŋ buɣili Baal duu nti daai li luhi ka wurim di maligu bimbina la mini di binnana la n-chɛrisichɛrisi di zaa, ka ku Matan ŋun daa nyɛ Baal tindan’ la maligu bimbini maa tooni.

¹⁸Ka Jɛhɔiada daa zaŋ Yawɛ jɛmbu duu maa tuma fukumsi niŋ Lɛvinim’ bɛn nyɛ maligumaaniba shɛb’ Dauda ni daa zali ni bɛ su Yawɛ jɛmbu duu tuma fukumsi ka maani bɛ ni zaŋdi sara shɛli nyɔri buɣim la tiri Yawɛ kaman di ni sabi shɛm Musa zaligu ni la nuu ni, ka bɛ daa mali suhupiɛlli ka yiini yila kaman Dauda ni daa wuhi ba shɛm la.

¹⁹Ka Jɛhɔiada daa zali dunɔguliba Yawɛ jɛmbu duu maa dunoya ni ni bɛ kariti bɛn bi be kasi.

²⁰Ka o daa zaŋ sapashin’ kpamba mini ninvuɣ’ zuɣuri ni gomnanima ni tiŋgbani maa ni niriba zaa ka bɛ chaŋ ti zaŋ naa maa Yawɛ jɛmbu duu maa ni yi n-doli zuɣusaa polo dunol’ la n-kuni nayili. Ka bɛ daa zaŋ naa maa ʒili nayili nam ʒiishee.

²¹Ka di daa niŋ tiŋgbani maa nim’ zaa nyaɣisim, ka tiŋ’ maa daa maai, bɛ ni daa zaŋ takɔbi ku Atalia maa nyaaŋa.