Read Dagbani 2 Yɛlikura 24 Bible Online

2 Yɛlikura 24 - Dagbani bible

2 Yɛlikura 24

¹Jɔash yuma daa nyɛla yuma ayopɔin saha shɛl’ o ni daa di nam maa. O daa di nam maa ʒini Jɛrusalɛm la yuun’ pihinahi. O ma yuli n-daa booni Zibia, o daa nyɛla Bɛrishiiba nira.

²Jɔash daa tum din tuhi Yawɛ sani maligumaana Jɛhɔiada ʒiɛmani maa ni zaa.

³Ka Jɛhɔiada daa bo paɣiba ayi ti o ka o zaŋ ba dɔɣi bidibisi mini bipuɣinsi.

⁴Dimbɔŋɔ nyaaŋa ka di daa lu Jɔash suhu ni ni o lan malimali Yawɛ jɛmbu duu la.

⁵Ka o daa laɣim maligumaaniba mini Lɛvinim’ na ti yɛli ba, “Chamiya Juda fɔntinsi ni ti chɛ ka Izraɛlnim’ zaa tɔhi liɣiri ka yi zaŋ li na ka ti ti maani yi Naawuni jɛmbu duu ŋɔ yuuni kam.” “Niŋmiya lala yomyom.” Amaa ka Lɛvinim’ maa daa bi niŋdi yomyom.

⁶ Di saha ka o daa boli Jɛhɔiada ŋun daa nyɛ bɛ kpɛm’ maa na ti bɔh’ o, “Bɔ n-niŋ ka a bi chɛ ka Lɛvinim’ chaŋ Juda mini Jɛrusalɛm ti deei Yawɛ dabili Musa ni daa zali Izraɛlnim’ ni bɛ yɔri Yawɛ alikauli suɣili farigu shɛli la na?”

⁷Dama Atalia ŋun daa nyɛ paɣ’ putɔɣulan’ la bidibisi daa kabila Naawuni jɛmbu duu maa kpe, hal ka daa lan zaŋ Yawɛ jɛmbu duu neen’ kasinim’ zaa ti jɛmdi Baalnima.

⁸Dinzuɣu ka naa daa zali ni bɛ malim’ adaka zali Yawɛ jɛmbu duu samban’ ni dunɔdali gbini.

⁹Ka o daa moli molo gili Juda mini Jɛrusalɛm zaa ni bɛ yo Yawɛ farigu shɛli Naawuni dabili Musa ni daa zali Izraɛlnim’ tiŋgban’ nɛli ni ni bɛ yo la.

¹⁰Ka di daa niŋ kpamba maa mini niriba maa zaa nyaɣisim pam, ka bɛ daa kanna ti yɔri bɛ farigu liɣiri maa niŋdi adaka maa ni hal ti naai dindali maa.

¹¹Lɛvinim’ daa yi ti nya ka liɣiri zooi adaka maa ni saha shɛli, bɛ zaŋdi li mi tahi naa gbaŋŋmara mini maligumaaniba kpɛm’ sani, ka bɛ ti yihi liɣiri maa, ka zaŋ adaka maa labisi ti zali di zaashee. Lala ka bɛ daa kul niŋdi dabisili kam n-laɣisi liɣiri pam.

¹²Ka naa mini Jɛhɔiada daa zaŋ li ti ninvuɣ’ shɛb’ bɛn daa su Yawɛ jɛmbu duu tuma fukumsi la ka bɛ bo tammɛriba mini kapintanima ni bɛ mali Yawɛ jɛmbu duu maa, ka lan bo bɛn mi kuriti mini daanya tuma ni bɛ mali Yawɛ jɛmbu duu maa.

¹³Ka tumtumdiba maa daa tum tuma, ka duu maa malibu tuma chaŋ tooni. Ka bɛ daa mali Naawuni jɛmbu duu maa ka di be kaman di ni daa pun be shɛm, ka lan niŋ yaa pahi.

¹⁴Ka bɛ daa tum tuma maa naai, ka zaŋ laɣ’ shɛli din daa guui na ti ti naa mini Jɛhɔiada, ka bɛ daa zaŋ li mali Yawɛ jɛmbu duu maa ni binyara, binyari shɛŋa bɛ ni daa mali jɛmdi Naawuni mini bɛ ni daa mali binshɛŋa tumdi bɛ ni daa zaŋdi sara shɛli nyɔri buɣim la tuma ni chɛrisi ni salima mini anzinfa duɣuri. Jɛhɔiada saha maa zaa bɛ daa kul maanila bɛ ni zaŋdi sara shɛli nyɔri buɣim la Yawɛ jɛmbu duu maa ni dabisili kam.

¹⁵Ka Jɛhɔiada daa ti kurigi ka o dabisa pali ka o kpi. O yuma daa nyɛla yuun’ kɔbiga ni pihita saha shɛl’ o ni daa kpi maa.

¹⁶Ka bɛ daa sɔɣ’ o Naa Dauda tiŋ’ la ni nanim’ silisi ni, dama o daa tum tuun’ suma Izraɛl tiŋgbɔŋ ni, ka lan tum tuun’ suma ti Naawuni min’ o jɛmbu duu.

¹⁷Jɛhɔiada kum maa nyaaŋa ka Juda kpamba daa kana ti jɛm naa, ka naa daa wum bɛ ni yɛli shɛm.

¹⁸Ka bɛ daa chɛ Yawɛ ŋun nyɛ bɛ yaannim’ Naawuni la jɛmbu duu ni kpɛbu, ka jɛmdila buɣili Ashɛra binyɛra mini binnana. Ka Naawuni suhu daa yiɣisi bahi Judanim’ mini Jɛrusalɛmnim’ zuɣu bɛ taali tumbu maa zuɣu.

¹⁹Amaa o daa timdi anabinim’ bɛ sani ni bɛ ti chɛ ka bɛ labi ŋun’ Yawɛ sanna. Ka anabinim’ maa daa saɣisi ba, amaa ka bɛ zaɣisi wumbu.

²⁰Ka Naawuni Shia daa kpe Zakaria ŋun daa nyɛ maligumaana Jɛhɔiada bidibiga la ni, ka o daa yiɣisi zani niriba maa sunsuuni yɛli, “Naawuni yɛliya, ‘Bɔ n-niŋ ka yi zaɣisi Yawɛ zaligunim’ dolibu ka di zuɣu chɛ ka yi biɛhigu bi tɔŋda? Yi ni zaɣisi Yawɛ maa zuɣu, ka o gba zaɣisi ya.’ ”

²¹ Amaa bɛ daa lo o nia biɛɣu. Ka naa daa bahi ba noli ka bɛ lab’ kuɣa ku o Yawɛ jɛmbu duu dundɔŋ ni.

²²Naa Jɔash daa bi lan teei Zakaria ba Jɛhɔiada ni daa niŋ o nirilim shɛm la zaa yɛla, ka daa chɛ ka bɛ ku o bia maa. Zakaria ni daa yɛn kpi, o daa yɛlimi, “Yawɛ, nyam’ bɛ ni niŋ shɛm ŋɔ, ka bɔhi ba biɛri.”

²³Zaŋ chaŋ yuuni daa ti yɛn giligi, ka Siria tɔbbihi daa lo tɔb’ na ti liri Naa Jɔash. Bɛ daa lirila Judanim’ mini Jɛrusalɛmnima n-ku bɛ zuɣulaannim’ zaa, ka di nɛma n-zaŋ li chaŋ ti ti Damaskus naa.

²⁴Hal Siria tɔbbihi maa ni daa bi galisi maa zaa yoli, Naawuni daa zaŋ tɔbbihi pam niŋ bɛ nuu ni, dama tɔbbihi maa daa nyɛla bɛn zaɣisi Yawɛ ŋun nyɛ bɛ yaannim’ Naawuni la. Lala zuɣu ka bɛ daa darigi Jɔash tibili.

²⁵Ka bɛ daa ti Naa Jɔash daŋa ka chaŋ ka chɛ o, ka o kpambaliba daa lo o nia biɛɣu ka ku o o bindoo zuɣu, maligumaana Jɛhɔiada bia ʒim yihibu la zuɣu. Ka o daa kpi ka bɛ sɔɣ’ o Dauda tiŋ’ la ni, amaa bɛ daa bi sɔɣ’ o nanim’ silisi la ni.

²⁶Bɛn daa lo o nia biɛɣu maa n-daa nyɛ Zabad Shimiat ŋun daa nyɛ Ammɔn nir’ la bia mini Shimrit ŋun daa nyɛ Mɔab nir’ la bia Jɛhɔzabad.

²⁷O kalinsi nyaaŋa ka o bia Amazia daa di nam zan’ o zaani. Bɛ sabi o bidibisi yɛla mini bɛ ni daa tɔɣisi anabitali yɛtɔɣ’ shɛŋa pam jɛnd’ o la ni o ni daa mali Naawuni jɛmbu duu me shɛm la, niŋ Nanim’ yɛlikura litaafi ni.