Read Dagbani 2 Yɛlikura 25 Bible Online

2 Yɛlikura 25 - Dagbani bible

2 Yɛlikura 25

¹Amazia yuma daa nyɛla yuun’ pisinaanu saha shɛl’ o ni daa di nam maa. O daa di nam maa ʒini Jɛrusalɛm la yuun’ pihitayinika. O ma yuli n-daa booni Jɛhɔadan. O ya n-daa nyɛ Jɛrusalɛm.

²Amazia daa nyɛla ŋun tum din tuhi Yawɛ sani, amaa o daa bi tum li ni o suhu zaa.

³O nam maa ni daa ti niŋ yaa naai, ka o daa chɛ ka bɛ ku o kpamba bɛn daa ku o ba ŋun daa nyɛ naa la.

⁴ Amaa o daa bi chɛ ka bɛ ku bɛ bihi bɛna, kaman di ni daa sabi shɛm Musa zaligu kundi ni la. Luɣ’ shɛli Yawɛ ni daa yɛli, “Di kunya bihi banima bɛ bihi taali zuɣu bee n-ku bihi bɛ banim’ taali zuɣu, amaa di simdi ni sokam kpila omaŋmaŋ’ taali zuɣu.”

⁵Ka Amazia daa laɣim Judanim’ na nti piripiri ba kaman bɛ daŋ ni nyɛ shɛm, n-zaŋ ba ti sapashin’ kpamba mini bɛn su tɔbbihi tuhilituhili mini kɔbigakɔbiga fukumsi Juda mini Bɛnjamin tiŋgbana maa ni zaa. Ka o daa laɣim nachimba bɛn paai yuun’ pisi zaŋ chana, n-nya ka bɛn mali yaa ka ni tooi gbibi kpana mini nyɔtaɣirisi chaŋ tɔbu kalinli nyɛla niriba tuhi’ kɔbisita.

⁶Ka o daa lan zaŋ anzinfa din tibisim nyɛ kilɔgiram tusaata ni kɔbisinahi n-chaŋ ti da Izraɛl tɔbutuhiri’ biinsi tuhi’ kɔbiga na ti pahi.

⁷Amaa ka Naawuni nira daa chaŋ naa maa sani ti yɛl’ o, “N dan’ naa, di chɛ ka Izraɛl tɔbbihi ŋɔ pahi dol’ a chaŋ, dama Yawɛ ka Izraɛlnim’ bɛn nyɛ Ifriim zuliya ŋɔ zaa so sani.

⁸Amaŋmaŋ’ cham’ ti tuhi, mali kpiɔŋ tɔb’ maa tuhibu ni. Di yi pa lala Naawuni ni ŋme a luh’ a dimnim’ maa tooni. Dama Naawuni mali yiko din ni sɔŋ nira bee n-ŋme o luhi.”

⁹Ka Amazia daa bɔhi Naawuni nira maa, “Ka n ni pun zaŋ anzinfa kilɔgiram tusaata ni kɔbisinahi shɛli da Izraɛl tɔbutuhiriba maa na, wula ka ti lee yɛn niŋ zaŋ chaŋ di polo?” Ka Naawuni nira maa garigi yɛl’ o, “Yawɛ ni tooi ti a anzinfa din gari li.”

¹⁰Di saha ka Amazia daa chɛ ka tɔbutuhiriba bɛn daa yi Ifriim tiŋgban’ ni na maa lab’ kuli. Ka bɛ suhuri daa yiɣisi pam bahi Judanim’ zuɣu ka bɛ je suli pam lab’ kuli.

¹¹Ka Amazia daa niŋ suhukpeeni n-gari tooni zaŋ o niriba maa chaŋ Yalim Vinvamli la ni nti ku Ɛdomnim’[8] maa ninvuɣ’ tuhi’ pia.

¹²Ka Judanim’ maa daa gbahi ninvuɣ’ nɛma mi tuhi’ pia. Ka bɛ daa zaŋ ba du Sɛla Zoli zuɣu nti daai ba Sɛla Zoli maa zuɣu luhi zolɔŋni, ka bɛ zaa chɛrisichɛrisi.

¹³Amaa ka Amazia ni daa zaɣisi ni tɔbutuhiriba shɛb’ di dol’ o chaŋ tɔb’ maa ni ka kari ba ni bɛ kulim’ maa daa kana ti liri Juda tin’ shɛŋa, zaŋ Samaria hal ni Bɛtihɔrɔn n-daa ku niriba tusaata ka di nɛma pam.

¹⁴Amazia ni daa tuhi Ɛdomnim’ naai ka labiri kuna, o daa kpuɣila bɛ wuna m-mali kuli ti zaŋ li leeg’ omaŋmaŋ’ wuna n-jɛmdi li ka maani li.

¹⁵Ka Yawɛ daa je suli niŋ’ o, ka daa tim anabi o sani ka o ti yɛl’ o, “Bɔ n-niŋ ka a jɛmdi tinzun’ buɣ’ shɛŋa din daa bi tooi tiligi dimaŋmaŋ’ niriba a nuu ni la?”

¹⁶Amaa o ni daa yɛri lala maa, ka naa yɛl’ o, “Fom’ a noli, ŋuni n-lee zaŋ a leei naa saawaralana? Bɔ n-niŋ ka a yɛn bo kum ti amaŋa?” Ka anabi maa daa fo, amaa ka lee yɛli, “M mi ni Naawuni n-lo ni o ku a a ni tum shɛm ka zaɣisi n yɛligu wumbu maa zuɣu.”

¹⁷Di saha ka Naa Amazia ŋun daa nyɛ Juda naa maa daa mali o kpamba saawara, ka tim ti yɛli Naa Jɛhɔash ŋun daa nyɛ Izraɛl naa, ka nyɛ Jɛhɔahaz bia, ka nyɛ Jɛhu yaaŋa la ni o kana ti chɛ ka bɛ nina pali taba.

¹⁸Ka Izraɛl Naa Jɛhɔash mi daa tim ti yɛli Naa Amazia ŋun daa nyɛ Juda naa maa, “Lɛbanɔn zoya zuɣu goo tutuɣu daa ti tim ti yɛli Lɛbanɔn sida tia, ‘Zaŋm’ a bipuɣiŋga ŋɔ ti ma ka n ti n dapal’ ŋɔ ka o niŋ o paɣa. Ka Lɛbanɔn mɔɣu ni biŋkɔbigu daa garita n-no goo maa sɔŋ tiŋa.’

¹⁹Nyama, a yɛri ni a nyaŋ Ɛdomnima, ka duh’ amaŋa nyuri bara. Ʒi a yiŋ’ baalim. Bɔ n-niŋ ka a yɛn bo yɛla ti amaŋ’ tabili Judanima?”

²⁰Amaa ka Amazia daa zaɣisi wumbu, dama Naawuni n-daa niŋ lala ni o zaŋ ba niŋ Jɛhɔash nuu ni bɛ ni daa jɛmdi Ɛdomnim’ buɣa la zuɣu.

²¹Dinzuɣu ka Izraɛl naa Jɔash daa chaŋ ka o mini Juda naa Amazia ti zaŋ bɛ nyɔri yo taba Juda tin’ shɛli din yuli booni Bɛtishɛmɛshi la ni.

²²Ka Izraɛlnim’ daa tuhi nyaŋ Judanim’ maa, ka sokam zo n-kul’ o yiŋa.

²³Ka Izraɛl Naa Jɛhɔash daa gbaai Juda Naa Amazia ŋun daa nyɛ Jɛhɔash bia, ka nyɛ Ahazia yaaŋa la Bɛtishɛmɛshi n-zaŋ o chaŋ Jɛrusalɛm nti daai Jɛrusalɛm goondaa luhi hal ti miri mita kɔbisiyi wɔɣilim tariga. O daa pilila Ifriim dunɔdal’ la shee n-daai li luhi hal ti paai goon’ gɔŋ dunɔdal’ la shee.

²⁴O daa va salima mini anzinfa n-tabili Naawuni jɛmbu duu neen’ shɛŋa din daa beni ka Obɛdɛdom bihi gul’ li la zaa, ka va nayili daazichi zaa, ka gbahi ninvuɣ’ shɛb’ daba n-lab kuli Samaria.

²⁵Izraɛl Naa Jɛhɔash ŋun daa nyɛ Jɛhɔahaz bia la kalinsi nyaaŋa, Juda Naa Amazia ŋun daa nyɛ Jɔash bia la daa niŋla yuun’ pinaanu pahi dunia yili.

²⁶Amazia ni daa tum tuun’ shɛŋa o piligu ni hal ni o bahigu ni, bɛ sabi di yɛla niŋ Juda nanim’ mini Izraɛl nanim’ litaafi ni.

²⁷Saha shɛli Amazia ni daa chɛ Yawɛ jɛmbu maa, ka bɛ daa lo ni bɛ ku o Jɛrusalɛm, ka o daa zo n-kuli Lakishi. Amaa ka bɛ daa chɛ ka shɛb’ chaŋ Lakishi maa nti ku o nimaani.

²⁸Ka bɛ daa zaŋ o pa yuri zuɣu na ti sɔɣ’ o pah’ o yaannim’ zuɣu Dauda tiŋ’ la ni.