Read Dagbani 2 Yɛlikura 26 Bible Online

2 Yɛlikura 26 - Dagbani bible

2 Yɛlikura 26

¹Ka Judanim’ zaa daa zaŋ Uzia ŋun daa nyɛ yuun’ pinaayɔbu bia la leei naa zal’ o ba Amazia zaani.

²Ka o daa mali Ɛlat me n-ti Judanima, Naa Amazia kalinsi maa nyaaŋa.

³Uzia yuma daa nyɛla yuun’ pinaayɔbu saha shɛl’ o ni daa di nam maa. O daa di nam ʒini Jɛrusalɛm la yuun’ pihinunaayi. O ma yuli n-daa booni Jɛkolia. O ya n-daa nyɛ Jɛrusalɛm.

⁴O daa tum din tuhi Yawɛ sani kaman o ba Amazia ni daa tum shɛm la.

⁵O daa jɛm Naawuni Zakaria ŋun daa wuh’ o Naawuni jɛmbu sol’ la ʒiɛman’ ni. O ni daa jɛmdi Yawɛ saha shɛli maa zaa, Naawuni daa niŋ alibarika niŋ o ni.

⁶Ka Naa Uzia daa lo tɔbu chaŋ ti tuhi nyaŋ Filistianima, ka daai Gaat mini Jamnia[9] ni Ashidɔd goondahi zaa luhi, ka me fɔntinsi miri Ashidɔd mini Filistia tiŋgbɔŋ maa ni luɣ’ shɛŋa polo.

⁷Naawuni daa sɔŋ o ka o tuhi nyaŋ Filistianim’ maa mini Laribunim’ bɛn daa be Guribaal la ni Miunnima.

⁸Ka Ammɔnnim’ daa yɔri farigu Naa Uzia sani, ka o yuli daa du hal ka Ijipti tiŋgbɔŋ nim’ ti wum o yɛla, dama o daa niŋ yaa pam.

⁹Uzia daa lan me du’ wɔɣila zali Jɛrusalɛm goon’ gɔŋ dunɔdal’ la polo mini vinvamli dunɔdali ni malaika dunɔdal’ la polo zaa, ka mal’ li ka di niŋ yaa.

¹⁰O daa lan me du’ wɔɣila din du pam zali mɔɣu ni, ka gbi kɔbilisi pam, dama o daa mali niɣi pam ka bɛ be zolɔna ni mini bɔpiɛligu ni. O daa lan mali pukpariba mini wain tihi kpariba ka bɛ be zoya ni mini tiŋgban’ shɛŋa din daa mali vuhim shee, dama o daa yuri kɔbu pam.

¹¹M-pahi, Uzia daa lan mali tɔbbihi bɛn ni tooi chaŋ tɔbu, ka bɛ piripiri ba ka bɛ kalinli dolila Hanania ŋun daa nyɛ naa sapashin’ kpɛm’ la ni daa wuhi Jɛiɛl ŋun daa nyɛ gbaŋŋmar’ la mini Maasɛya ŋun daa nyɛ naa sapashin’ kpamba ni yino la shɛm.

¹²Daŋ kam ni zuɣulaannim’ bɛn daa nyɛ tɔbutuhiri’ biinsi kalinli daa nyɛla niriba tusaayi ni kɔbisiyɔbu.

¹³Ka bɛ ni daa su tɔbbi’ shɛb’ kalinli nyɛ tɔbbihi tuhi’ kɔbisita ni tusaayopɔin ni kɔbisinu bɛn daa mali kpiɔŋ din ni tooi sɔŋ naa ka o tuhi o dimnima.

¹⁴Ka Uzia daa chɛ ka bɛ kuri nyɔtaɣirisi mini kpana ni kuriti woliɣisi ni kuriti gbaɣinɔnima ni tɔbiri ni kuɣilɔŋ kuɣa n-ti tɔbbihi maa zaa.

¹⁵Ka o daa chɛ ka baŋdiba bɛn be Jɛrusalɛm mali maʒin’ shɛŋa tamtam binwɔɣila zuɣu mini tiŋ’ maa gooni gɔŋbu shee kam, ka bɛ mal’ li tɔri piɛma, ka labiri kuɣ’ kara, ka o yuli daa du n-chaŋ katiŋa, dama o daa nya sɔŋsim pam hal ka o yaa ti kirisi.

¹⁶Amaa o ni daa nya yaa saha shɛli maa, ka o daa zaŋ karimbaani kpɛh’ o kɔbili ni, ka di daa luh’ o. Dama o daa bi niŋdi din tuhi Yawɛ ŋun nyɛ o Naawuni maa sani, ka daa kpe Yawɛ jɛmbu duu ni o ti tuɣili tulaale zim tulaale zim tuɣilibu bimbini zuɣu.

¹⁷Amaa ka maligumaana Azaria daa zaŋ Yawɛ maligumaaniba pihinii bɛn mali suhukpeeni m-pa omaŋ’ zuɣu, ka bɛ doli Naa Uzia kpe

¹⁸ nti taɣ’ o zali, ka yɛl’ o, “Nyin’ Uzia ka soli ni a tuɣili tulaale zim ti Yawɛ naɣila maligumaaniba bɛn nyɛ Aduna bidib’ shɛb’ bɛ ni pii ni bɛ tuɣindi tulaale zim la. Yim’ luɣ’ kasi shee ŋɔ, dama a niŋ din bi tuhi, ka dimbɔŋɔ ku ti a jilima Yawɛ ŋun nyɛ Naawuni ŋɔ sani.”

¹⁹Di saha ka Uzia suhu daa yiɣisi. O daa gbibila tulaale zim laa o nuu ni ni o tuɣili tulaale zim maa. Ka o suhu ni daa yiɣisi bahi maligumaaniba maa zuɣu saha shɛli maa, ka kɔŋ daa wulig’ o gbɛɣu zuɣu maligumaaniba maa tooni Yawɛ jɛmbu duu maa ni tulaale zim tuɣilibu bimbini maa gbini.

²⁰Ka Azaria ŋun daa nyɛ maligumaaniba zuɣulan’ maa min’ o maligumaanitab’ maa daa lihi nya ka kɔŋ wulig’ o gbɛɣu zuɣu. Ka bɛ daa daag’ o yihi yomyom, ka o gba maŋmaŋ’ daa niŋ yomyom yi, dama Yawɛ n-daa chɛ ka kɔŋ maa wulig’ o maa.

²¹Kɔŋ maa daa kul malila naa Uzia hal ni o nyɛvili tariga. Ka o ni daa nyɛ kɔŋlan’ maa zuɣu, o daa kul bela o kɔŋko yili ni ka ku lan tooi kpe Yawɛ jɛmbu duu maa ni. Ka o bia Jɔtam daa be nayili maa n-su nayili maa mini tiŋgbɔŋ maa niriba.

²²Naa Uzia ni daa niŋ binshɛŋa pahi o piligu ni hal ni o bahigu ni, anabi Aizaia ŋun daa nyɛ Amɔz bia la daa sab’ li.

²³ Ka Uzia daa ti faai siɣ’ o yaannim’ sani, ka bɛ sɔɣ’ o nanim’ gbala ni m-baɣil’ o yaannima, dama bɛ daa yɛlimi ni o nyɛla kɔŋlana. Ka o bia Jɔtam daa di nam zan’ o zaani.