Read Dagbani 2 Yɛlikura 31 Bible Online

2 Yɛlikura 31 - Dagbani bible

2 Yɛlikura 31

¹Dimbɔŋɔnim’ zaa ni daa naai, ka Izraɛlnim’ bɛn daa be nimaani maa daa dii cheei kpe Juda fɔntinsi ni nti ŋme n-wurim bɛ ni daa me binwɔɣili shɛŋa la, ka ŋme ŋ-ŋma buɣili Ashɛra, ka wurim buɣa jɛmbu shee mini bɛ maligu bimbina din daa be Juda zuliya tiŋgbani maa ni mini Bɛnjamin zuliya tiŋgban’ ni zaa ni Ifriim zuliya tiŋgban’ ni mini Manaasa zuliya tiŋgban’ ni n-daa wurim di zaa, di nyaaŋa ka Izraɛlnim’ maa zaa daa lab’ kuli bɛ ya, ka sokam ti be o biɛhigu shee.

²Ka Hɛzɛkia daa zali ni bɛ pirigim’ maligumaaniba mini Lɛvinim’ maa. Ka bɛ daa pirigi ba kaman sokam ni o tuma ni nyɛ shɛm. Maligumaaniba mini Lɛvinim’ n-daa su bɛ ni zaŋdi sara shɛli nyɔri buɣim la mini suhudoo sara maligu fukumsi, ka tumdi tuma Yawɛ sansani dunoya ni, ka paɣiri Naawuni ka tibigir’ o.

³ Ka Naa daa bo omaŋmaŋ’ dahalali biŋkɔbiri ti ka bɛ kɔriti maani bɛ ni zaŋdi sara shɛli nyɔri buɣim asiba mini zaawuni ni vuhim dabisa dali ni goli palli chuɣu puhibu ni ni bɛ ni daa zali chu’ shɛŋa puhibu ni kaman di ni daa sab’ shɛm Yawɛ zaligu ni.

⁴Ka naa daa zali Jɛrusalɛmnima ni bɛ tim’ maligumaaniba mini Lɛvinim’ bɛ tarili kaman di ni simdi shɛm din ni chɛ ka bɛ zaŋ bɛ zaŋsim zaa niŋ Yawɛ zaligu tuma ni.

⁵ Zaligu ŋɔ ni daa kul moli gili, Izraɛlnim’ daa zaŋla bɛ puri atam din daŋ niŋbu ka nyɛ kawana mini wain palli ni kpam ni shiri pam ni bɛ puri ni bindira zaa na. Bɛ daa lan zaŋ binshɛɣukam pirigibu bupia kam puuni yim zuɣu pam na.

⁶Ka Izraɛlnim’ mini Judanim’ bɛn daa be Juda tiŋgbani maa ni fɔntinsi ni daa zaŋ bɛ naɣ’ pia kam puuni naɣ’ yino na mini piɛri pia kam puuni piɛ’ yino m-pahi bɛ ni daa zaŋ pin’ kasi shɛŋa zaa ti Yawɛ ŋun nyɛ bɛ Naawuni la na nti zaŋ li sɔŋsɔŋ gbilligbilli.

⁷Gol’ so ŋun daa pahir’ ata ni ka bɛ daa piligi li gbilligbilli sɔŋbu, zaŋ chaŋ gol’ so ŋun pahir’ ayopɔin ni ka bɛ daa sɔŋ li gbilligbilli maa naai.

⁸Hɛzɛkia mini kpambaliba ni daa kana ti nya di ni doya gbilligbilli shɛm maa, ka bɛ paɣi Yawɛ min’ o niriba Izraɛlnim’ di zuɣu.

⁹Ka Hɛzɛkia daa bɔhi maligumaaniba mini Lɛvinim’ maa bɔhigu zaŋ chaŋ bɛ ni zaŋ binyar’ shɛŋa sɔŋ gbilligbilli maa polo.

¹⁰Ka Azaria ŋun daa nyɛ maligumaaniba kpɛma, ka nyɛ Zadok daŋ ni nir’ la daa garigi yɛl’ o, “Bɛ ni daa kul piligi zaŋdi binyara ŋɔ tahiri Yawɛ jɛmbu duu ŋɔ ni na, ti kul dir’ li mi tiɣiri ka guuri li pam, dama Naawuni ni niŋ alibarika niŋ o niriba maa ni zuɣu n-chɛ ka dimbɔŋɔ zaa guui doya pam maa.”

¹¹Di saha ka Hɛzɛkia daa bahi ba noli ni bɛ malimi Yawɛ jɛmbu duu maa puuni nɛma niŋbu duri; ka bɛ daa mal’ li.

¹²Ka bɛ daa zaŋ niriba maa ni daa tɔhi bindir’ shɛŋa mini pirigibu bupia kam puuni yim la ni bɛ ni daa zaŋ pin’ kasi shɛŋa na ni bɛ suhuri zaa la niŋdi ni ni ʒiɛyimtali. Kɔnania ŋun daa nyɛ Lɛvi zuliya ni nir’ la n-daa nyɛ bɛ kpɛma, ka o tizo Shimɛi pa o zuɣu.

¹³Ka Jɛhiɛl mini Azazia ni Nahat ni Asahɛl ni Jɛrimɔt ni Jɔzabad ni Ɛliɛl ni Ishimakia ni Mahat ni Bɛnaaya daa nyɛ ninvuɣ’ shɛb’ bɛn yuuni tuma maa sɔŋdi Kɔnania min’ o tizo Shimɛi. Naa Hɛzɛkia mini Azaria ŋun daa nyɛ Naawuni jɛmbu duu zuɣulan’ la n-daa zali ba ni bɛ niŋ lala.

¹⁴Imna bia Kɔre ŋun daa nyɛ Lɛvi zuliya ni ninvuɣ’ so ŋun guli wulimpuhili polo dunɔdal’ la n-daa nyɛ ŋun su bɛnkam daa zaŋ bɛ suhuyubu sara na ni bɛ ti ti Naawuni la fukumsi; ŋuna n-daa pirigiri din nyɛ Yawɛ dini mini sara shɛŋa din be kasi zaa la tarita.

¹⁵Ka Idɛn mini Miniamin ni Jɛshua ni Shɛmiya ni Amaria ni Shɛkania daa nyɛ bɛn pah’ o zuɣu n-sɔŋd’ o ni ʒiɛyimtali maligumaaniba tinsi ni m-pirigiri nɛma maa tiri bɛ dɔɣiriba bɛn nyɛ ninkura mini bihi zaa kaman bɛ ni daa piripiri ba shɛm.

¹⁶Din pahi, bɛ daa lan tariti bidibbihi bɛn paai yuma ata zaŋ chana, ka bɛ ni sabi shɛb’ yuya doli bɛ daŋ ni nyɛ shɛm, ka bɛ nyɛ bɛn zaa ni kpe Yawɛ jɛmbu duu ti tum bɛ dabisili kam tuma kaman bɛ tuma ni nyɛ shɛm ni bɛ ni daa piripiri ba ka di doli shɛm.

¹⁷Bɛ daa sabi maligumaaniba maa yuya dolila bɛ daŋ ni nyɛ shɛm. Ka Lɛvinim’ mi bɛn daa paai yuun’ pisi zaŋ chana, bɛ yuya ka bɛ daa sabira kaman bɛ tuma ni nyɛ shɛm ni kaman bɛ ni daa piripiri ba shɛm.

¹⁸Bɛ daa sabirila maligumaaniba mini bɛ paɣiba ni bɛ bidibisi mini bɛ bipuɣinsi ni bɛ bibihi ni bɛ ninvuɣ’ gbaliŋ maa zaa yuya, dama bɛna n-daa ʒe yim ka mali bɛmaŋ’ kasi.

¹⁹Ka Aduna bidibisi bɛn daa nyɛ Maligumaaniba ka be bɛ fɔntinsi ni biŋkɔbiri mɔri ŋubbu shee la, bɛ daa piila ninvuɣ’ shɛba fɔŋ kam ni ni bɛ tariti maligumaaniba doo kam o tarili ni nyɛ shɛli, ka lan tariti bɛ ni sabi Lɛvi ninvuɣ’ shɛb’ zaa yuya bɛ tarili ni nyɛ shɛli.

²⁰Lala ka Naa Hɛzɛkia daa niŋ Juda tiŋgbani maa ni zaa, ka o ni daa niŋ shɛm maa daa nyɛ din viɛla ni din tuhi ka lan wuh’ o ʒiɛyimtali ni nyɛ shɛm Yawɛ ŋun nyɛ o Naawuni ŋɔ sani.

²¹Ka o ni daa kul tum tuun’ shɛlikam Naawuni jɛmbu duu maa ni min’ o ni daa gbibi Naawuni zaligu shɛm ni o ni daa bo Naawuni shɛm, o daa niŋ li mi ni o suhu zaa, ka di zuɣu daa chɛ ka o di nasara.