Read Dagbani 2 Yɛlikura 32 Bible Online

2 Yɛlikura 32 - Dagbani bible

2 Yɛlikura 32

¹Hɛzɛkia ni daa tum ʒiɛyimtali tuun’ shɛŋa ŋɔ zaa nyaaŋa, ka Asiria Naa Sɛnachɛrib daa kana ti liri Judanima n-teei gili bɛ ni daa me goondahi gili fɔntiŋ’ shɛŋa la, ka tɛhiri ni o ni di nasara ka zaŋ ba leeg’ o niriba.

²Hɛzɛkia ni daa baŋ ni Naa Sɛnachɛrib loya ni o tuhi Jɛrusalɛmnim’ maa,

³ka o min’ o kpamba ni tɔbbihi daa niŋ tab’ saawara n-saɣi ni bɛ ŋarim’ bɛ ya maa kɔbilisi din be tiŋ’ maa kpaŋa, ka bɛ daa sɔŋ o.

⁴Ka niriba pam daa laɣim ŋari kɔbilisi, ka taɣi kulibɔna din kom daa zɔri yiri tiŋgban’ maa ni zaa kom zali ka yɛra, “Ti ku chɛ ka Asiria nanim’ maa ti kana ti nya kom pam.”

⁵Ka Hɛzɛkia daa kpaŋ omaŋa n-lan me goondaa din daa wurim la zaa, ka me dufahira din du pam tam di zuɣu, ka lan me goonda’ shɛli zali kpaŋ’ pahi din pun beni maa zuɣu, ka daa chɛ ka Dauda tiŋ’ la ni Millo polo niŋ yaa, ka daa lan mali bidibbina mini nyɔtaɣirisi pam.

⁶O daa zaŋla niriba niŋ sapashin’ kpamba nuu ni, ka daa chɛ ka bɛ zaa laɣim fɔŋ maa dunɔdali palo ni, ka o daa tɔɣisi ba suhukpaŋsibo yɛtɔɣa yɛli,

⁷“Maliya yaa ni suhukpeeni. Di zɔriya dabiɛm bee n-chɛ ka yi suhuri zɔhiri Asiria naa min’ o tɔbbihi bɛn be o sani ŋɔ zuɣu. Dama ŋun be ti sani yiko gari ŋun be o sani yiko.

⁸Ninsalinima m-be o sani maa, amaa Yawɛ ŋun nyɛ ti Naawuni ŋɔ m-be ti sani ni o sɔŋ ti ka tuhi ti tɔb’ kam ti ti.” Ka Juda Naa Hɛzɛkia yɛtɔɣa maa daa kpaŋsi niriba maa suhuri pam.

⁹Dimbɔŋɔ nyaaŋa, saha shɛli Asiria Naa Sɛnachɛrib min’ o tɔbbihi zaa ni daa do Lakishi la ka o daa tim o tuumba Jɛrusalɛm Juda Naa Hɛzɛkia mini Judanim’ zaa bɛn daa be Jɛrusalɛm la sani nti yɛli ba,

¹⁰“Asiria Naa Sɛnachɛrib ni yɛli shɛm m-bɔŋɔ, ‘Bɔ ka yi lee du m-ba ka na kul be ti ni teei gili Jɛrusalɛm shɛli ŋɔ puuni maa?’

¹¹Hɛzɛkia ni yɛri ya, ‘Yawɛ ŋun nyɛ yi Naawuni ni fan ya Asiria naa nuu ni bahi la, yi bi mi ni o yɔhindi ya mi ni kum ni kɔnyuri kun ya maa?’

¹²Pa ŋun’ Hɛzɛkia n-daa wurim o buɣa maligu shee min’ o sara maligu bimbina zaa, ka zali Judanim’ mini Jɛrusalɛmnima yɛli ‘Bimbini yini kɔŋko gbini ka yi ni jɛmdi Naawuni ka maani sara di zuɣu la?’

¹³Yi bi mi m mini n yaannim’ ni daa niŋ tiŋgbɔn shɛŋa niriba zaa shɛm la yɛla? Tiŋgbɔna maa buɣa daa tooi tiligi di niriba n nuu ni?

¹⁴N yaannim’ ni daa ku tiŋ’ shɛŋa ninvuɣ’ shɛb’ zaa la, buɣ’ dini n-daa lee tooi fa di niriba n nuu ni, ka yinim’ Naawuni ni ti tooi tiligi ya n nuu ni?

¹⁵Dinzuɣu pumpɔŋɔ, di chɛnya ka Naa Hɛzɛkia yɔhim ya bee m-birigi ya yɛlli ŋɔ puuni, yi mi di niŋ’ o naani, dama zuliya shɛli buɣili bee na’ so buɣili daa bi tooi tiligi di niriba n yaannim’ nuu ni bee n-tiligi di niriba n nuu ni, ka yinim’ Naawuni ŋɔ ŋun’ ni ti tooi tiligi ya n nuu ni.”

¹⁶Ka o kpamba daa yɛli yɛtɔɣ’ biɛri din gari lala n-jɛndi ti Duuma NAAWUNI min’ o dabili Hɛzɛkia.

¹⁷Ka o daa lan sabi gbana n-ta Yawɛ ŋun nyɛ Izraɛlnim’ Naawuni ŋɔ daɣiri, ka tɔɣisi yɛtɔɣ’ yoya pam jɛnd’ o yɛra, “Tiŋgbɔn shɛŋa niriba buɣa ni daa bi tooi tiligi bɛ niriba n nuu ni shɛm, lala ka Hɛzɛkia Naawuni ŋɔ gba ku tooi tilig’ o niriba n nuu ni.”

¹⁸Ka o kpamba maa daa kuhi pam yɛl’ li Judanim’ yɛligu ni bahi Jɛrusalɛmnim’ bɛn daa tam goondaa zuɣu la ha ni bɛ varisi ba kpɛhi ba dabiɛm, ka ŋme n-deei bɛ tiŋ’ maa.

¹⁹Bɛ daa tɔɣisiri Jɛrusalɛmnim’ Naawuni maa yɛla mi kaman dunianim’ buɣ’ shɛŋa niriba ni zaŋ bɛ nuhi mali la.

²⁰Di saha ka Naa Hɛzɛkia mini Amɔz bia anabi Aizaia daa kuhi pam suhi Naawuni yɛlli ŋɔ zuɣu.

²¹Ka Yawɛ daa tim malaika Asiria naa sansani maa ni, ka o chaŋ ti ku Asiria naa maa tɔbutuhiri’ biinsi mini bɛ sapashin’ kpamba ni naa maa kpamba zaa. Ka o di vi pam n-lab’ kul’ o ya. Ka o daa ti kpe o buɣili duu, ka omaŋmaŋ’ bi’ shɛb’ daa zaŋ takɔbi ku o sɔŋ nimaani.

²²Yawɛ ni daa zaŋ so’ shɛli tiligi Hɛzɛkia mini Jɛrusalɛmnim’ Asiria Naa Sɛnachɛrib nuu ni m-bala. O daa lan tiligi Hɛzɛkia o dimnim’ zaa nuu ni, ka chɛ ka bɛ nya nyee vuhi luɣilikam zaa.

²³Ka niriba pam daa ʒiri pina kani Jɛrusalɛm na nti tiri Yawɛ, ka tiri Juda Naa Hɛzɛkia neen’ viɛla ka di daa chɛ ka zuliya kam tibig’ o di saha maa zaŋ chana.

²⁴Di saha maa ka dɔro daa gbaai Hɛzɛkia ka di ti chɛ biɛla ni o kpi, ka o daa suhu Yawɛ, ka o deeg’ o suhigu maa, ka wuh’ o shihirili.

²⁵Amaa ka Naa Hɛzɛkia daa niŋ karimbaani, ka bi wuh’ o wumpaɣibo ni nyɛ shɛm zaŋ chaŋ Naawuni ni daa niŋ shɛm ti o maa polo. Dinzuɣu ka Naawuni suhu daa yiɣisi pam bah’ o mini Judanim’ ni Jɛrusalɛmnim’ zuɣu.

²⁶Di saha ka Hɛzɛkia mini Jɛrusalɛmnim’ daa siɣisi bɛmaŋa o karimbaani maa zuɣu, ka Yawɛ suhuyiɣisili maa daa bi lu bɛ zuɣu Hɛzɛkia ʒiɛmani maa ni.

²⁷Naa Hɛzɛkia daa mali buni pam ka niriba daa tir’ o jilima. O daa mɛla omaŋmaŋ’ nɛma zalibu shee duri, n-zaŋdi o da anzinfa min’ o salima ni o kuɣ’ viɛla ni o tulaale ni o nyɔtaɣirisi ni o binshɛɣukam din mali shaara pam.

²⁸O daa lan me bindira mini wain palli ni kpama zaashee duri, ka daa lan me o niɣi balibu kam duri ni o biŋkɔbbaligu buzɔna.

²⁹Lala ka o daa lan me omaŋmaŋ’ fɔntinsi zali. O daa mali niɣi mini piɛri pam, dama Naawuni daa ti o buni pam.

³⁰Hɛzɛkia ŋɔ n-daa nyɛ ŋun taɣi Gihɔn zuɣusaa polo kulibɔŋ la kom zali ka ŋmaligi li ka di zɔri chani Dauda tiŋ’ la wulinluhili polo. Hɛzɛkia daa di nasara o tuuni kam puuni.

³¹Hal Babilɔn naa kpambaliba tuumba ni daa kana ni bɛ ti bɔhi baŋ shihirili shɛli din niŋ o tiŋgbɔŋ ni la, Naawuni daa chɛ o mi ni o niŋ o ni bɔri shɛm, ka di chɛ ka o zahim’ o baŋ dinkam zaa be o suhu ni.

³²Hɛzɛkia ni daa tum tuun’ shɛŋa pahi min’ o tuun’ suma, bɛ sab’ li niŋla Amɔz bia anabi Aizaia ni daa nya ʒii shɛli ka di be Juda mini Izraɛl nanim’ litaafi puuni la.

³³Hɛzɛkia ni daa ti faai siɣ’ o yaannim’ sani, ka bɛ sɔɣ’ o Dauda daŋ silisi la zuɣusaa polo. Ka Judanim’ mini Jɛrusalɛmnim’ zaa daa sɔɣ’ o jilima sɔɣibu. Ka o bia Manaasa daa di nam zan’ o zaani.