Read Dagbani 2 Yɛlikura 33 Bible Online

2 Yɛlikura 33 - Dagbani bible

2 Yɛlikura 33

¹Manaasa yuma daa nyɛla yuun’ pinaayi saha shɛl’ o ni daa di nam. O daa di nam n-ʒini Jɛrusalɛm la yuun’ pihinunaanu.

² Ka o daa kpuɣi Yawɛ ni daa kari ninvuɣ’ shɛb’ tiŋgbɔŋ maa ni ka chɛ ka Izraɛlnim’ ʒini la biɛr’ yoli n-daa tum tuumbiɛri pam Yawɛ sani.

³Dama o daa lab’ mɛla o ba Hɛzɛkia ni daa wurim buɣa jɛmbu shee luɣ’ shɛŋa la zaa, ka me maligu bimbina zali Baalnima, ka lan lab’ me Ashɛranim’ ŋmahima zali, ka daa gbaani tiŋ’ jɛmdi saŋmarisi zaa.

⁴ O daa lan me bimbina zali Yawɛ jɛmbu duu puuni, Yawɛ ni daa yɛli, “Jɛrusalɛm n-nyɛ luɣ’ shɛli n yuli ni yɛn be sahakam la.”

⁵O daa lan me bimbina zali saŋmarisi zaa Yawɛ jɛmbu duu dundɔna ayi ni.

⁶O daa zaŋdila o bidibisi nyɔri buɣim maani sara Hinnom Bidibisi Vinvamli la ni, ka daa buɣiri baɣisi, ka niŋdi laasabu, ka chani jinwariba mini timanim’ sani. O daa tum alahichi pam Yawɛ sani n-chɛ ka o suhu yiɣisi pam.

⁷Ka o daa mali buɣili kɔtomsi n-zaŋ li zali Naawuni jɛmbu duu maa puuni, du’ shɛli Naawuni ni daa yɛli Dauda min’ o bia Sulemaana, “Duu ŋɔ ni mini Jɛrusalɛm ka m pii Izraɛl zuliya zaa ni n-lee n jɛmbu shee saha shɛlikam la.

⁸ Ka Izraɛlnim’ yi ni tum n ni zali ba ni bɛ tum shɛm, ka gbibi n ni daa zaŋ n zaligu shɛŋa zaa ti Musa ni o ti ba la, dindina n ku lan chɛ ka bɛ vuui bɛ napɔŋ yi n ni daa zaŋ tiŋgban’ shɛli ti bɛ yaannim’ la ni.”

⁹Ka Manaasa daa chɛ ka Judanim’ mini Jɛrusalɛmnim’ birigi n-tum alahichi pam gari Yawɛ ni daa ku zuliya shɛb’ ka chɛ ka Izraɛlnim’ ʒini nimaani la ni daa tum alahichi shɛŋa.

¹⁰Yawɛ daa tɔɣisi Manaasa min’ o niriba yɛtɔɣa, amaa ka bɛ zaɣisi wumbu.

¹¹Dinzuɣu ka Yawɛ daa chɛ ka Asiria naa sapashin’ kpamba kana ti tuhi nyaŋ ba, ka gbaai Manaasa n-zaŋ mii tu o nyee ni, ka lo o daanya zoligɔnima n-zaŋ o kuli Babilɔn.

¹²O ni daa ti be muɣisigu ni maa, ka o daa naanyi bo sɔŋsim Yawɛ ŋun nyɛ o Naawuni ŋɔ sani, ka siɣis’ omaŋ’ pam o yaannim’ Naawuni sani.

¹³O daa suhi Naawuni, ka Naawuni daa wum o fabila ka deeg’ o suhigu maa, ka daa lan zaŋ o labisi Jɛrusalɛm nti niŋ o nam maa ni yaha. Di saha ka Manaasa daa baŋ ni Yawɛ n-shiri nyɛ Naawuni.

¹⁴Di nyaaŋa ka o daa me goon’ shɛli zali kpaŋa Dauda tiŋ’ la ni Gihɔn wulinluhili polo vinvamli la ni ka di du pam, m-mali hal ti paai zahim dunɔdal’ la ni n-zaŋ gili hal ti paai Ofɛl; o daa zali sapashin’ kpamba bɛ ni daa me goma gili Juda fɔntin’ shɛŋa zaa ni.

¹⁵O daa yihi tinzun’ buɣa mini binnana zaa Yawɛ jɛmbu duu maa ni, ka lan wurim o ni daa me bimbin’ shɛŋa zaa zali Yawɛ jɛmbu duu zoli zuɣu mini Jɛrusalɛm la n-zaŋ li ti bahi tiŋ’ maa tariga.

¹⁶O daa lan chɛ ka bɛ lab’ mali Yawɛ sara maligu bimbin’ la, ka o daa mali suhudoo mini wumpaɣibo sara di zuɣu, ka daa zali Judanima ni bɛ jɛmmi Yawɛ ŋun nyɛ Izraɛl Naawuni maa.

¹⁷Niriba maa daa na kul maanila sara buɣa jɛmbu shee maa, amaa bɛ daa maani li n-tirila Yawɛ ŋun nyɛ bɛ Naawuni maa.

¹⁸Manaasa ni daa tum tuun’ shɛŋa pahi min’ o ni daa suhi Naawuni shɛm ni anab’ shɛb’ bɛn daa zaŋ Yawɛ ŋun nyɛ Izraɛlnim’ Naawuni yuli tɔɣis’ o yɛtɔɣa la zaa, bɛ sab’ li niŋ Izraɛl nanim’ yɛlikura litaafi ni.

¹⁹O ni daa suhi Naawuni ka Naawuni deeg’ o suhigu shɛm min’ o ni daa tum alahichi shɛŋa zaa ni o ni daa bi ʒe Naawuni yim shɛm ni o ni daa me buɣa jɛmbu shee luɣ’ shɛŋa n-zaŋ buɣili Ashɛrim min’ o binnana zali saha shɛl’ o ni daa na bi niŋ tuuba la, bɛ sabi di zaa niŋ anabinim’ yɛlikura litaafi ni.

²⁰Ka Manaasa daa ti faai siɣ’ o o yaannim’ sani, ka bɛ sɔɣ’ o o yiŋa, ka o bia Amɔn daa di nam zan’ o zaani.

²¹Amɔn yuma daa nyɛla yuun’ pisinaayi saha shɛl’ o ni daa di nam, o daa di nam maa ʒini Jɛrusalɛm la yuma ayi.

²²O daa tum tuumbiɛri Yawɛ sani kaman o ba Manaasa ni daa tum shɛm la. Amɔn daa kɔri biŋkɔbiri m-mali binnan’ shɛŋa zaa o ba Manaasa ni daa mali zal’ la, ka jɛmdi li.

²³O daa bi siɣis’ omaŋa Yawɛ tooni kaman o ba Manaasa ni daa siɣis’ omaŋ’ shɛm la, amaa Amɔn ŋɔ ŋun’ daa kul tumdila tuumbiɛri pahira.

²⁴Ka o kpamba daa yi o nyaaŋa n-ku o o yiŋa.

²⁵Amaa ka tiŋgbɔŋ maa nim’ daa ku ninvuɣ’ shɛb’ bɛn daa yi Naa Amɔn nyaaŋa maa zaa, ka zaŋ o bia Jɔsia leei naa zal’ o zaani.