Read Dagbani 2 Yɛlikura 35 Bible Online

2 Yɛlikura 35 - Dagbani bible

2 Yɛlikura 35

¹Ka Naa Jɔsia daa puhi Yaɣigari chuɣu Jɛrusalɛm n-jɛm Yawɛ, ka bɛ daa kɔri Yaɣigari chuɣu biŋkɔbiri gol’ so ŋun daŋ tooni biɛɣu pinaanahi dali.

²O daa zali maligumaaniba ka ti ba bɛ tuma ni nyɛ shɛli Naawuni jɛmbu duu maa puuni, ka kpaŋsi ba bɛ tuma maa ni.

³O daa yɛli Lɛvinim’ bɛn daa wuhiri Izraɛlnim’ zaa ka nyɛ bɛn be kasi Yawɛ san’ la, “Zaŋmiya Naawuni Daalikauli Adaka kasi la zali Dauda bia Sulemaana ŋun daa nyɛ Izraɛl naa la ni daa me Naawuni jɛmbu du’ shɛl’ la puuni. Di bi simdi ni yi lan zaŋ li buɣiri yi bɔɣusapima zuɣu. Pumpɔŋɔ tummiya Yawɛ ŋun nyɛ yi Naawuni ŋɔ min’ o niriba Izraɛlnim’ tuma.

⁴ Malimiya shili kaman yi daŋ ni nyɛ shɛm ka di doli bɛ ni daa piripiri ya kaman Izraɛl Naa Dauda ni daa sabi wuhi shɛm la ni kaman o bia Sulemaana ni daa sabi wuhi shɛm la.

⁵Zanimiya luɣ’ kasi shee kaman yi daŋ niriba ni nyɛ shɛm, ka chɛ ka Lɛvinim’ be bɛ ni piripiri yi zuliya daŋ niriba maa pirigibu kam puuni.

⁶Malimiya yimaŋ’ kasi n-kɔrigi Yaɣigari chuɣu piɛɣu ka mali yi zuliya niriba kaman Yawɛ ni daa chɛ ka Musa zali shɛm la.”

⁷Di saha ka Jɔsia daa bo o dahalali piɛbihi pola mini bubihi pola, ka bɛ zaa kalinli daa yiɣisi tuhi’ pihita ni naɣilahi tusaata n-zaŋ ba ti ninvuɣ’ shɛb’ bɛn zaa daa be nimaani ni bɛ mali Yaɣigari chuɣu sara.

⁸Ka o kpambaliba gba daa tɔhi bɛ suhu yubu pina ti niriba maa mini maligumaaniba ni Lɛvinima. Ka Hilikia mini Zakaria ni Jɛhiɛl bɛn daa nyɛ Naawuni jɛmbu duu kpamba la daa ti maligumaaniba maa piɛbihi pola mini bubihi pola ka bɛ zaa kalinli yiɣisi tusaayi ni kɔbisiyɔbu ni naɣilahi kɔbisita ni bɛ mali Yaɣigari chuɣu sara.

⁹Ka Kɔnania min’ o mabihi Shɛmaya ni Nɛtanɛl ni Hashabia ni Jɛiɛl ni Jɔzabad bɛn daa nyɛ Lɛvinim’ kpamba la gba daa ti Lɛvinim’ piɛbihi pola mini bubihi pola ka bɛ zaa kalinli daa yiɣisi tusaanu ni naɣilahi kɔbisinu ni bɛ zaŋ puhi Yaɣigari chuɣu.

¹⁰Bɛ ni daa ti mali jɛma shili, di saha ka maligumaaniba maa daa zani bɛ zaashɛhi, ka Lɛvinim’ mi daa piripiri taba zani kaman naa ni daa zali ba shɛm.

¹¹Ka bɛ daa kɔri Yaɣigari chuɣu piɛbihi, ka maligumaaniba maa daa taɣi bɛ ʒim n-zaŋ li mihi sara maligu bimbini maa, ka Lɛvinim’ mi shiri biŋkɔbiri maa.

¹²Ka bɛ daa yihi bɛ ni yɛn zaŋ sara shɛli nyo buɣim la zali di ko, ka daa tar’ li ka di doli bɛ daŋ niriba ni nyɛ shɛm, ka bɛ daa zaŋ li mali sara ti Yawɛ kaman di ni sabi shɛm Musa litaafi ni la, ka bɛ daa lan niŋ naɣilahi la gba lala.

¹³ Ka bɛ daa she Yaɣigari chuɣu piɛri maa kaman zaligu ni wuhi shɛm, ka duɣi sara maligu kasi biŋkɔbiri nimdi mi duɣuri ni mini ankɔraŋmahi ni ni taha ni n-zaŋ li yomyom ti tari niriba maa zaa.

¹⁴Di nyaaŋa ka Lɛvinim’ daa naanyi bo bɛmaŋmaŋ’ nimdi mini maligumaaniba nimdi, dama maligumaaniba bɛn daa nyɛ Aduna zuliya la daa kul moola bɛ nini m-maani sara shɛli bɛ ni zaŋdi nyɔri buɣim la, ka nyɔri sara maligu biŋkɔbiri kpama buɣim ni hal ka yuŋ ti zibi. Dinzuɣu ka Lɛvinim’ maa daa bo bɛ mini maligumaaniba shɛb’ bɛn daa nyɛ Aduna bihi maa nimdi maa.

¹⁵ Ka Asaf bidibisi bɛn daa nyɛ baansi la daa ʒe bɛ zaashee kaman Dauda mini Asaf ni Hɛman ni Jɛdutun ŋun daa nyɛ naa nyara la ni daa zali shɛm. Ka dunɔguliba gba daa ʒe dunɔdali kam ni guli. Bɛ daa bi simdi ni bɛ miligi nimaani, dama bɛ mabihi Lɛvinima n-daa nyɛ bɛn yɛn bo bɛ nimdi ti ba.

¹⁶Ka bɛ daa mali Yawɛ jɛmbu shili zaa dindali maa. Bɛ daa puhi Yaɣigari chuɣu ka mali sara shɛli bɛ ni zaŋdi nyɔri buɣim la Yawɛ sara maligu bimbini zuɣu kaman Naa Jɔsia ni daa zali shɛm la.

¹⁷ Ka Izraɛlnim’ bɛn daa be nimaani maa daa puhi Yaɣigari chuɣu di saha maa, ka puhi Bɔrɔbɔro Din ka Dabindi chuɣu daba ayopɔin.

¹⁸Anabi Samuɛl ʒiɛman’ la nyaaŋa, bɛ daa na ʒi n-lan puhi Yaɣigari chuɣu lala tatabo Izraɛl tiŋgbɔŋ ni, Izraɛl nanim’ so daa bi lan puhi Yaɣigari chuɣu maa kaman Jɔsia mini maligumaaniba ni Lɛvinim’ ni Judanim’ ni Izraɛlnim’ zaa bɛn daa be nimaani ni Jɛrusalɛmnim’ ni daa puhi li shɛm maa.

¹⁹Jɔsia nam dibu yuun’ pisaayika ni ka bɛ daa puhi Yaɣigari chuɣu maa.

²⁰Jɔsia ni daa tum Naawuni jɛmbu duu tuma ŋɔ zaa naai nyaaŋa, ka Ijipti Naa Nɛko daa chaŋ Karikɛmish din daa be Yufretiiz Mɔɣili dul’ la ni o ti tuhi tɔbu; ka Jɔsia gba daa lo tɔbu chaŋ ni o ti tuhi Naa Nɛko.

²¹Amaa ka Nɛko daa tim tuumba ti yɛl’ o, “Nyin’ Juda naa, taali bɔ n-lee be m min’ a sunsuuni? Pa nyini ka n lo tɔb’ na ni n ti tuhi, amaa n yɛn tuhila m mini ninvuɣ’ shɛb’ bɛn mali zabili. Naawuni zali ma ni n niŋmi lala yomyom, dinzuɣu chɛl’ Naawuni ŋun ʒe n nyaaŋa maa mɔbu, di yi pa lala o ni ku a.”

²²Amaa ka Jɔsia daa zaɣisi ni o ku chɛ o, ka daa bo binyara niŋ omaŋa n-taɣ’ o biɛhigu chaŋ ni o ti tuh’ o. O daa zaɣisiya ni o ku wum Naawuni ni daa chɛ ka Nɛko yɛl’ o shɛm maa; ka daa zaŋ o tɔbbihi chaŋ ti lir’ o Mɛgido bɔpiɛligu ni.

²³Ka peentɔriba daa to Naa Jɔsia piɛm ka di gbaag’ o, ka o daa yɛl’ o kpambaliba bɛn be o sani, “Zaŋmiya ma yi kpaŋa, dama n nya daŋ’ pam.”

²⁴Ka kpamba maa daa yih’ o o ni daa be chɛchɛbun’ shɛli ni maa n-zaŋ o niŋ o chɛchɛbun’ shɛli din daa pahir’ ayi ni n-zaŋ o kuli Jɛrusalɛm. Ka o daa ti kpi ka bɛ sɔɣ’ o o yaannim’ siliga ni. Ka Judanim’ mini Jɛrusalɛmnim’ zaa daa kum o kuli.

²⁵Ka Jɛrimia daa ŋma kuyila n-yili niŋ Naa Jɔsia. Ka baansi bɛn nyɛ dɔbba mini paɣiba zaa na kul yiini kuyila yɛri Jɔsia yɛla hal ni zuŋɔ. Ka bɛ daa zaŋ li leei kali Izraɛl tiŋgbɔŋ ni, ka sab’ li niŋ fabila litaafi ni.

²⁶Jɔsia ni daa tum tuun’ shɛŋa pahi min’ o ni daa tum tuun’ viɛl’ shɛŋa kaman bɛ ni sab’ li shɛm Yawɛ zaligu kundi ni la

²⁷min’ o ni daa tum tuun’ shɛŋa piligu ni hal ni bahigu ni, nyama, bɛ sab’ li niŋ Izraɛl mini Juda nanim’ litaafi ni.