Read Dagbani 2 Yɛlikura 4 Bible Online

2 Yɛlikura 4 - Dagbani bible

2 Yɛlikura 4

¹ Ka Naa Sulemaana daa chɛ ka bɛ mali daanya sara maligu bimbini ka di wɔɣilim nyɛ mita awɛi, ka di yɛliŋ nyɛ mita awɛi, ka di dubu mi nyɛ mita anahi ni pirigili.

²Ka o daa lan chɛ ka bɛ mali daanya kɔniŋdi bini ka di nyɛ zaɣ’ kpilli, ka di naŋgbanyɛra zaŋ ti tuui tab’ nyɛ mita pinaata ni biɛla, ka di dubu nyɛ mita ayi ni biɛla, ka di yɛliŋ mi nyɛ mita anahi ni biɛla.

³Ka o daa lan chɛ ka bɛ zaŋ daanya mali gaɣa kɔtomsi m-pie taba ʒiibuyi zuɣu n-zaŋ li zali kɔniŋdi bini maa lɔŋni, ka di wɔɣilim nyɛ mita pinaata ni pirigili, ka di daa tuɣituɣi taba.

⁴Kɔniŋdi bini maa daa tamla daanya naɣilahi pinaayi zuɣu, bɛ naɣilah’ ata nina daa kpala nuzaa polo, ka bɛba ata nina kpa wulinluhili polo, ka bɛba ata nina kpa nudirigu polo, ka bɛba ata mi nina kpa wulimpuhili polo. Daanya kɔniŋdi bini maa daa tamla naɣilahi maa yaansi zuɣu, ka bɛ nyaaŋa gbaya daa be kɔniŋdi bini maa lɔŋni.

⁵Daanya kɔniŋdi bini maa yaɣimɛri mii barilim daa nyɛla sɛntimita ayopɔin ni pirigili, ka di noli daa be kaman pipia nol’ la, ka be kaman paɣiviɛligakushihikom pum la. Di daa deerila kom lita tuhi’ pihiyɔbu.

⁶ Bɛ daa lan mali taha pia, din nyɛ bɛ ni paɣiri binyɛra tah’ shɛŋa puuni. Bɛ daa zaŋla taha anu zali nudirigu polo, ka zaŋ taha anu din’ la mi zali nuzaa polo. Taha maa puuni ka bɛ daa yi paɣiri bɛ ni yɛn zaŋ binshɛŋa nyo buɣim mali sara la, ka maligumaaniba mi daa yi toori kɔniŋdi bini maa ni kom paɣiri bɛ ni.

⁷ O daa lan mali salima firilatamdisi pia kaman di ni daa wuhi shɛm n-zaŋ li zali Naawuni jɛmbu duu maa ni, diba anu nudirigu polo, diba anu din’ la mi nuzaa polo.

⁸ O daa lan mali teebuya pia n-zali Naawuni jɛmbu duu maa ni, diba anu nudirigu polo, diba anu din’ la mi nuzaa polo, ka mali salima taha kɔbiga.

⁹Ka o daa mali dundombila ti maligumaaniba, ka lan mali dundɔn titali, ka mali pundi niŋ li, ka dooi daanya pa di pundi maa zuɣu.

¹⁰Ka o daa chɛ ka bɛ zaŋ kɔniŋdi bini maa zali Naawuni jɛmbu duu maa nudirigu polo zaŋ labi wulimpuhili polo lɔrigi ni.

¹¹Hiram daa lan me duɣuri, ka mali soobuya mini taha pahi. Lala ka Hiram daa niŋ tum Naa Sulemaana ni daa puh’ o Naawuni jɛmbu duu tuun’ shɛŋa maa zaa naai.

¹²O ni daa tum tuun’ shɛŋa maa m-bɔŋɔ: Daanya daantalis’ ayi mini zuɣuri ayi din daa tam daantalis’ ayi maa zuɣu la mini zoligɔnim’ din daa lo biŋkpila maa la.

¹³O daa lan zaŋ daanya mali pumpɔrinchihi kɔtomsi kɔbisinahi n-zaŋ gɔhigɔhi zoligɔnim’ zaŋ lo zuɣuri ayi la kulis’ ayi.

¹⁴O daa lan mali bintamdisi, ka mali taha tam di zuɣu,

¹⁵ka daa lan mali kɔniŋdi bini ni naɣilahi pinaayi shɛb’ zuɣu di ni daa tamya la.

¹⁶Huramabi daa lan zaŋ daanya viɛlli mali duɣuri mini soobuya ni dirijaba ni nɛma balibu kam zaa ti Naa Sulemaana ni o zaŋ niŋ Yawɛ jɛmbu duu maa ni.

¹⁷Jɔɔdɛn Mɔɣili bɔpiɛligu ni yaɣiri tiŋgbani din daa be Sukɔt mini Zɛrɛda sunsuuni la ni ka Naa daa chɛ ka bɛ mali nɛma maa.

¹⁸Sulemaana daa chɛ ka bɛ mali nɛma maa zaa ka di galisi pam, di zuɣu n-daa chɛ ka bɛ bi tooi zahim baŋ bɛ ni zaŋ daanya shɛm tariga mal’ li.

¹⁹Lala ka Sulemaana daa mali Naawuni jɛmbu duu maa puuni nɛma zaa din nyɛ: salima sara maligu bimbini mini teebu’ shɛŋa zuɣu bɛ ni daa zaŋdi bɔrɔbɔro m-pari zaani Naawuni tooni la

²⁰ni salima alali firilatamdisi mini di firilanima ni bɛ nyɔri li zaani luɣ’ kasi zaa kasi shee la kaman di ni daa wuhi shɛm.

²¹Ka o daa lan zaŋ salima alali mali tipuma kɔtomsi mini firilanima ni gbabɔnima

²²ni bɛ ni mali binshɛŋa kpihiri firilanima ni taha ni chɛrisi. O daa lan zaŋ salima alali mali buɣim moori lahi. Naawuni jɛmbu duu maa dunoli pundi mini luɣ’ kasi zaa kasi shee dunoli pundi zaa daa nyɛla salima.