Read Dagbani 2 Yɛlikura 7 Bible Online

2 Yɛlikura 7 - Dagbani bible

2 Yɛlikura 7

¹ Sulemaana ni daa naag’ o wunsuhigu ŋɔ zaa saha shɛli, ka buɣim daa yi zuɣusaa na ti taai bɛ ni zaŋdi sara shɛli nyɔri buɣim la mini sara shɛŋa, ka Yawɛ jilima daa pali duu maa.

²Ka maligumaaniba daa kɔŋ Yawɛ jɛmbu duu maa puuni kpɛbu, o jilima ni daa pal’ o jɛmbu duu maa puuni maa zuɣu.

³ Izraɛlnim’ maa zaa ni daa nya buɣim maa ni yi zuɣusaa na ka lan nya Yawɛ jilima ni pali jɛmbu duu maa shɛm maa, ka bɛ gbani bɛ ni zaŋ kuɣa mali luɣ’ shɛli n-zaŋ bɛ nina kpa tiŋa m-paɣ’ o pam ka yɛra, “O nyɛla Naawuni suŋ, ka o yurilim kul ni beni sahakam.”

⁴Di saha ka naa mini niriba maa zaa daa mali sara maligunim’ Yawɛ tooni.

⁵Naa Sulemaana daa zaŋla naɣilahi tuhi’ pisinaayi mini piɛri tuhi’ kɔbiga ni tuhi’ pisi mali sara. Naa min’ o niriba maa zaa ni daa zaŋ Naawuni jɛmbu duu maa ti Naawuni shɛm m-bala.

⁶Di saha ka maligumaaniba daa zani bɛ zaashɛhi, ka Lɛvinim’ gba daa zani bɛ zaashɛhi ka gbibi Naawuni jɛmbu biŋkumdi shɛŋa Naa Dauda ni daa mali ni bɛ ŋmɛri paɣiri Yawɛ o yurilim din galisi ka kul beni sahakam la zuɣu. Kurimbuni ha, Naa Dauda daa yi yɛn mali wumpaɣibo sara maligu saha shɛli, Lɛvinim’ maa zaanimi tuhi maligumaaniba bɛn daa su tuma di saha maa m-piɛbiri bɛ kikahi maa, ka Izraɛlnim’ zaa yiɣisi zani.

⁷Ka Naa Sulemaana daa mali dundɔŋ din daa be Yawɛ jɛmbu duu tooni la sunsuuni ka di be kasi, dama nimaani ka o daa mali bɛ ni zaŋdi sara shɛli nyɔri buɣim la, ka nyo suhudoo sara maligu biŋkpam zaa buɣim. Dama bɛ ni daa yi zaŋdi sara shɛli nyɔri buɣim la mini suhudoo sara maligu biŋkpam la ni sara maligu la zaa daa naan ku tooi be Sulemaana ni daa zaŋ daanya mali sara maligu bimbini shɛl’ la zuɣu.

⁸Di saha maa Naa Sulemaana mini Izraɛlnim’ bɛn daa be o sani daa zaŋla daba ayopɔin puhi chuɣu. Ka niriba pam daa yi Lɛbɔhamat mini Ijipti kulibɔŋ polo kana,

⁹dama bɛ daa zaŋla daba ayopɔin n-zaŋ sara maligu bimbini maa ti Naawuni, ka zaŋ daba ayopɔin mi m-puhi chuɣu, ka daa laɣim dabisi’ shɛli din pah’ anii dali jɛm Naawuni.

¹⁰Ka o daa chɛ ka niriba maa lab’ kuli bɛ ya gol’ so ŋun daa pahir’ ayopɔin maa biɛɣu pisinaata dali, ka di niŋ ba nyaɣisim ka bɛ mali suhupiɛlli, Yawɛ ni daa wuh’ o nirilim ni nyɛ shɛm zaŋ chaŋ Dauda mini Sulemaana ni o niriba Izraɛlnim’ zaa san’ la zuɣu.

¹¹Ka Sulemaana daa naai Yawɛ jɛmbu duu maa min’ omaŋmaŋ’ yili maa tuma zaa. Naa Sulemaana ni daa lo nia ni o tum tuun’ shɛlikam zaa Yawɛ jɛmbu duu maa ni min’ omaŋmaŋ’ yili maa ni maa daa tum naai zaa.

¹²Di saha ka Yawɛ daa yi Sulemaana zuɣu yuŋ yɛl’ o, “N wum a suhigu maa, ka pii kpe ŋɔ ni di nyɛ n sara maligu duu.

¹³N yi ti ŋari zuɣusaa kɔsoya ka saa bi lan mira bee toli yi ti ŋubiri yi bimbilima bee n-chɛ ka alɔbo lu n niriba maa zuɣu,

¹⁴ka n niriba bɛn nyɛ n ni su shɛb’ maa yi siɣisi bɛmaŋa n-suhi ma, ka niŋ tuuba, ka bo sɔŋsim n sani, ka zo n-yi bɛ ninvuɣ’ biɛtali ni, n ni be alizanda ni ka wum bɛ suhigu maa, ka chɛ bɛ daalahichi maa, ka tibi bɛ tiŋgbani maa.

¹⁵N ni chɛ ka n zaŋsim be jɛmbu duu ŋɔ ni, ka n gbilisiri tibili wumdi bɛ ni yɛn suhiri suhigu shɛli kpe ŋɔ.

¹⁶Dama pumpɔŋɔ mani m-pii duu ŋɔ m-mal’ li ka di be kasi ni di chɛ ka yi jɛmdi ma di puuni ʒiɛmani kam ni, ka n ni chɛ ka n zaɣa be di ni ka lan yuuni li sahakam.

¹⁷Ka a yi ni doli ma kaman a ba Dauda ni daa doli ma shɛm la, ka niŋdi n ni zal’ a ni a niŋ shɛlikam zaa, ka doli n zaligunim’ zaa,

¹⁸ n ni chɛ ka a nam kul beni sahakam kaman n ni daa lo a ba Dauda alikauli n-yɛli ni so kul ku kɔŋ o daŋ ni ŋun ni di nam su Izraɛlnim’ la.

¹⁹Amaa a min’ a niriba yi lɛbi yi nyaaŋa biri ma, ka zaɣisi n zalikpana la mini n zaligu shɛŋa n ni zali ya ŋɔ, ka chaŋ ti gbani wun’ shɛŋa tiŋa n-jɛmdi li,

²⁰dindina n ni yihi ya n ni zaŋ tiŋgbɔn shɛli tin ya ŋɔ ni, ka zaɣisi n ni daa pii jɛmbu du’ shɛli ni yi jɛmdi ma di puuni ŋɔ gba, ka chɛ ka zuliya kam mal’ li ansarisi ka ʒiɛm li.

²¹Ka bɛnkam ti lan gariti du’ shɛli din yuli du pam ŋɔ gbini, di ni gari ba, ka bɛ bɔhira, ‘Ka bɔ n-niŋ ka Yawɛ niŋ tiŋgbani ŋɔ mini jɛmbu duu ŋɔ lala?’

²²Di saha bɛ ni ti lan yɛli, ‘Bɛ ni zaɣisi Yawɛ ŋun nyɛ bɛ yaannim’ Naawuni ŋun daa yihi ba Ijipti tiŋgbɔŋ ni na la jɛmbu, ka taɣi deela wuna n-gbaani tiŋ’ jɛmdi li la zuɣu ka o chɛ ka yɛlibiɛri ŋɔ zaa paai ba maa.’ ”