Read Dagbani 2 Yɛlikura 8 Bible Online

2 Yɛlikura 8 - Dagbani bible

2 Yɛlikura 8

¹Naa Sulemaana daa zaŋla yuun’ pisi m-me Yawɛ jɛmbu duu mini ŋun Sulemaana nam yili.

²O daa lan lab’ me Naa Hiram ni daa zaŋ fɔntin’ shɛŋa ti o la, ka chɛ ka Izraɛlnim’ ʒini nimaani.

³Ka Sulemaana daa ti tuhi deei Hamatizɔba,

⁴ka me Tadimɔr din daa be tiŋgban’ nɛli ni la mini tin’ shɛŋa din daa be Hamat ka nɛma be di ni la zaa.

⁵O daa lan mali me Bɛtihɔrɔn din daa be zoli zuɣu la mini Bɛtihɔrɔn din daa be zolɔŋni la, ka me goondahi gil’ li, ka niŋ dunɔdaya mini binyara din kpariti dunɔdaya maa niŋ di ni.

⁶O daa lan me Baalat mini ŋun’ Sulemaana nɛma ni daa be tin’ shɛŋa ni zaa, ni o wɔribariba chɛchɛbunsi min’ o ni daa be tin’ shɛŋa ni. O daa lan me ŋun’ Sulemaana ni daa bɔri ni o me binshɛŋa zaa Jɛrusalɛm mini Lɛbanɔn ni o ni daa su tin’ shɛŋa zaa la ni.

⁷Ninvuɣ’ shɛb’ bɛn zaa daa nyɛ Hitinim’ mini Amɔrinim’ ni Pɛrizinim’ ni Hivinim’ ni Jɛbusinim’ bɛn daa pa Izraɛlnim’

⁸ka nyɛ bɛn daa kpalim be tiŋgbɔŋ maa ni ka Izraɛlnim’ daa bi ku ba la zuliya ka Sulemaana daa zaŋ leeg’ o daba ka bɛ tumdi tuun’ kpɛma hal ni zuŋɔ dabisili ŋɔ.

⁹Amaa Sulemaana daa bi zaŋ Izraɛlnim’ leeg’ o daba ni bɛ tumd’ o tuma, bɛna n-daa nyɛ o tɔbbihi min’ o sapashin’ kpamba ni kpamba bɛn daa su o chɛchɛbunsi mini wɔribariba fukumsi.

¹⁰Naa Sulemaana daa malila kpambaliba kɔbisiyi ni pihinu ka bɛ su niriba fukumsi.

¹¹Ka Sulemaana daa yihi Firawuna bipuɣiŋga la Dauda tiŋ’ la ni n-zaŋ o ti niŋ o ni daa me yili shɛli ti o la ni, dama o daa yɛlimi, “Di bi simdi ka m paɣ’ maa be Naa Dauda ŋun daa nyɛ Izraɛlnim’ naa ŋɔ yiŋa, dama Yawɛ Alikauli Adaka maa ni daa chaŋ luɣ’ shɛŋa zaa nyɛla luɣ’ kasi shee.”

¹²Di saha ka Sulemaana daa mali bɛ ni zaŋdi sara shɛli nyɔri buɣim la n-ti Yawɛ o ni daa me Yawɛ sara maligu bimbin’ shɛli zali Naawuni jɛmbu duu maa varanda tooni la zuɣu.

¹³ O daa malila sara maa kaman di ni daa kpa ni bɛ maani sara shɛm dabisili kam mini vuhim dabisa dali ni gol’ paliga churi dabisa dali ni yuuni puuni chur’ ata din nyɛ Bɔrɔbɔro Din ka Dabindi chuɣu la mini Dakulɔdakulo chuɣu la ni Suɣa Tibu chuɣu la dali kaman Musa ni daa zali shɛm.

¹⁴Sulemaana daa pirigi maligumaaniba dabisili kam tuma ti ba, ka ti Lɛvinim’ bɛn yɛn sɔŋdi ba la bɛ tuma din nyɛ wumpaɣibo yila ni bɛ tuun’ shɛŋa din pahi la kaman o ba Dauda ni daa wuhi shɛm la. O daa lan pirigi dunɔguliba zali dunoya zaa ni kaman Dauda ŋun daa nyɛ Naawuni nir’ la ni daa wuhi shɛm.

¹⁵Bɛ daa bi ŋmaligi ka chɛ naa ni daa zali maligumaaniba mini Lɛvinim’ zaligu shɛŋa zaŋ chaŋ shɛlikam polo bee zaŋ chaŋ nɛma duri polo la.

¹⁶Sulemaana ni daa sɔŋ Yawɛ jɛmbu duu maa tampuɣili dahin’ shɛli ka tum tuun’ shɛŋa m-mali hal ti me Yawɛ jɛmbu duu maa naai zaa shɛm m-bala.

¹⁷Di nyaaŋa ka Sulemaana daa chaŋ Ɛziɔngɛba mini Ɛlat tin’ shɛŋa din daa be teeku noli Ɛdom tiŋgbɔŋ ni la.

¹⁸Ka Hiram daa chɛ ka o kpambaliba zaŋ ŋarima mini tumtumdiba bɛn mili teeku nti ti o, ka bɛ mini Sulemaana tumtumdiba daa chaŋ Ofiri nti ʒi salima din tibisim nyɛ kilɔgiram tuhi’ pinaanu na ti ti Naa Sulemaana.