Read Dagbani Ɛzra 1 Bible Online

Ɛzra 1 - Dagbani bible

Ɛzra 1

¹ Pɛriʒia Naa Sairus ni daa deei nam sulinsi yuun’ tuuli la saha ka Yawɛ daa lo ni o chɛ ka o ni daa chɛ ka Jɛrimia yɛli shɛm la niŋ pali. Dinzuɣu ka Yawɛ daa zaŋ li niŋ Pɛriʒia Naa Sairus suhu ni ka o daa chɛ ka bɛ moli molo o nam sulinsi ni zaa, ka chɛ ka bɛ sab’ li niŋ gbana ni yɛli:

² “Pɛriʒia Naa Sairus ni yɛli shɛm m-bɔŋɔ: Yawɛ ŋun nyɛ alizanda Naawuni ŋɔ n-zaŋ ma leei dunia ŋɔ zaa naa, ka zali ma ni m me duu ti o Jɛrusalɛm, Juda tiŋgbɔŋ ni.

³Bɛnkam be yi ni n-nyɛ o niriba, bɛ Naawuni maa ŋun be bɛ sani, ka chɛ ka bɛ yiɣisi kuli Jɛrusalɛm, Juda tiŋgbɔŋ ni nti lab’ me Yawɛ ŋun nyɛ Izraɛl Naawuni ŋɔ duu, ŋuna n-nyɛ Naawuni ŋun be Jɛrusalɛm.

⁴Bɛnkam zaa na kpalim be bɛ nyɛviya ni ka be luɣ’ shɛlikam, nimaani niriba bɛn’ sɔŋmi ba n-ti ba anzinfa mini salima ni nɛma m-pahi biŋkɔbiri ni bɛ suhuyubu pina, ka bɛ zaŋ ti tum Naawuni duu maa tuma Jɛrusalɛm.”

⁵Di saha ka Juda zuliya daŋ kam ninvuɣ’ zuɣuri mini Bɛnjamin zuliya daŋ kam ninvuɣ’ zuɣuri ni maligumaaniba mini Lɛvinim’ ni sokam bɛn nyɛ Naawuni ni daa neei shɛb’ suhuri daa mali shili ni bɛ kuli nti lab’ me Yawɛ duu maa Jɛrusalɛm.

⁶Ka bɛ ʒiʒiinitab’ zaa daa sɔŋ ba n-ti ba anzinfa nɛma mini salima ni nɛma ni biŋkɔbiri ni binshɛŋa din mali bukaata m-pahi niriba suhu ni daa yu ka bɛ ti binshɛlikam zaa.

⁷Ka Naa Sairus maŋmaŋ’ daa zaŋ neen’ shɛŋa Naa Nɛbukadnɛza ni daa kpuɣi Yawɛ jɛmbu duu din be Jɛrusalɛm la nti niŋ o buɣa duu la na.

⁸Pɛriʒia Naa Sairus daa zaŋ li n-tila Mitrɛdat ŋun daa nyɛ laɣiguliba kpɛm’ ŋun daa niŋ di laasabu n-ti Juda gomna Shɛshibaza la.

⁹Di kalinli ni daa nyɛ shɛm m-bɔŋɔ: Salima taha pihita min’ anzinfa taha tuhili ni tahi’ shɛŋa pihitayinika

¹⁰ni salima lahi pihita ni anzinfa la’ shɛŋa kɔbisinahi ni pia ni la’ shɛŋa yaha, ka di gba nyɛ tuhili.

¹¹Salima min’ anzinfa nɛma zaa kalinli daa nyɛla tusaanu ni kɔbisinahi. Ka Shɛshibaza daa zaŋ dimbɔŋɔ zaa yi Babilɔn kuli Jɛrusalɛm saha shɛli bɛ ni daa yi tinduli n-labi kuni la.