Read Dagbani Ɛzra 3 Bible Online

Ɛzra 3 - Dagbani bible

Ɛzra 3

¹Izraɛlnim’ ni daa ʒini bɛ tinsi ni naai nyaaŋa, gol’ so ŋun pahir’ ayopɔin ni ka niriba maa daa laɣim Jɛrusalɛm naŋgban’ yini.

² Di saha ka Jɛshua ŋun daa nyɛ Jɔzadak bia la min’ o maligumaanitaba ni Zɛrubabɛl ŋun daa nyɛ Shialtiɛl bia la min’ o dɔɣiriba daa laɣim me Izraɛl Naawuni sara maligu bimbini la zali ni bɛ maani sara shɛli bɛ ni zaŋdi nyɔri buɣim la di zuɣu. Bɛ daa me li mi kaman di ni daa sabi Musa ŋun nyɛ Naawuni nir’ la zaligu ni shɛm.

³ Bɛ daa me li tamla bimbin’ kurili la tanzaa zuɣu, hal bɛ ni daa kul zɔri bɛ ʒiʒiinitab’ dabiɛm la zaa yoli. Ka bɛ daa maani sara shɛli bɛ ni zaŋdi nyɔri buɣim la di zuɣu tiri Yawɛ asiba ni zaawuni.

⁴ Ka bɛ daa puhi suɣa tibu chuɣu kaman di ni daa sabi shɛm; ka daa maani sara shɛŋa bɛ ni zaŋdi nyɔri buɣim la. Maligunim’ maa kalinli daa dolila zaligu ni wuhi ni bɛ maani li dabisili kam shɛm.

⁵ Di nyaaŋa bɛ daa lan maani sara shɛŋa bɛ ni zaŋdi nyɔri buɣim sahakam mini bɛ ni daa maani sara shɛŋa gol’ palli dali. Bɛ daa lan maani sara shɛŋa Yawɛ churi din be kasi la zaa puhibu ni m-pahi pin’ shɛŋa sokam ni daa mali tiri Yawɛ ka di yiri suhuyubu ni la na.

⁶Gol’ so ŋun pahir’ ayopɔin dahin yini dali ka bɛ daa piligi maani sara shɛli bɛ ni zaŋdi nyɔri buɣim tiri Yawɛ la. Amaa bɛ daa na bi sɔŋ Yawɛ jɛmbu duu maa tanzaa tampuɣili.

⁷Ka bɛ daa ti liɣiri ni bɛ zaŋ yo tammɛriba mini kapintanima, ka daa lan ti bindira mini binnyura ni kpam ka bɛ zaŋ li ti Sidɔnnim’ mini Taainima. Di nyaaŋa ka bɛ gba daa zaŋ Sida dakuɣiri yi Lɛbanɔn tahi teeku ni na nti zaŋ li tahi Jɔpa kaman Pɛriʒia Naa Sairus ni daa bahi noli ni bɛ niŋ shɛm.

⁸Bɛ ni daa paai Naawuni duu maa gbini Jɛrusalɛm la nyaaŋa, yuun’ shɛli din pahir’ ayi gol’ so ŋun pahir’ ayi ni ka Shialtiɛl bia Zɛrubabɛl mini Jɔzadak bia Jɛshua ni bɛ dɔɣiriba bɛn daa kpalim ni maligumaaniba ni Lɛvinima ni bɛnkam zaa daa yi dabitim ni lab’ Jɛrusalɛm na maa daa gbaai tuma maa tumbu. Bɛ daa piila Lɛvinim’ bɛn yuma nyɛ yuun’ pisi zaŋ chana leei Yawɛ duu maa mɛbu tuma zuɣulaannima.

⁹Jɛshua min’ o bidibisi ni o dɔɣiriba ni Kadimiɛl min’ o bidibisi ni Binnui mini Hɔdavia nti pahi Hɛnadad bidibisi ni Lɛvinim’ mini bɛ bidibisi ni bɛ dɔɣiriba n-daa laɣim su Naawuni jɛmbu duu maa ni tumtumdiba fukumsi.

¹⁰ Tammɛriba ni daa sɔŋ Yawɛ jɛmbu duu maa tampuɣili, maligumaaniba daa yɛla bɛ kpariti n-zani bɛ zaashɛhi ka gbib’ kikahi ni bɛ paɣi Yawɛ, ka Lɛvinim’ bɛn daa nyɛ Asaf bidibisi la gba daa gbib’ chaɣisa kaman Izraɛl Naa Dauda ni daa wuhi shɛm.

¹¹ Ka bɛ daa yiini yila paɣiri ka puhiri Yawɛ yɛra: “Dama o viɛla ka o yurilim zaŋ chaŋ Izraɛlnim’ polo kul beni sahakam.” Ka niriba maa zaa daa kul tahiri pampam paɣiri Yawɛ, bɛ ni daa sɔŋ Yawɛ duu maa tampuɣili maa zuɣu.

¹²Amaa ninkura pam bɛn daa nyɛ maligumaaniba mini Lɛvinim’ ni daŋ kam ni zuɣulaannima bɛn nini daa pun nya tuuli Naawuni jɛmbu duu la ni daa nya bɛ ni sɔŋ jɛmbu duu maa tampuɣili maa, bɛ daa duhila bɛ yee kuhira, niriba pam ni daa kul tahiri ni suhupiɛlli maa zaa yoli.

¹³So daa naan ku tooi woligi suhupiɛlli tahigu vuri ka chɛ kuhigu vuri maa, dama niriba maa daa kul tahirila pampam, ka di vuri maa daa chaŋ katiŋ’ pam.