Read Dagbani Ɛzra 4 Bible Online

Ɛzra 4 - Dagbani bible

Ɛzra 4

¹Juda zuliya niriba mini Bɛnjamin zuliya niriba dimnim’ ni daa wum ni bɛn labina maa mɛrila Yawɛ ŋun nyɛ Izraɛl Naawuni ŋɔ duu la,

² ka bɛ daa kana ni bɛ ti nya Zɛrubabɛl mini daŋ kam ni zuɣulaannim’ la. Bɛ daa yɛli ba mi, “Chɛliya ka ti pahi yi zuɣu m-me duu maa. Yi ni jɛmdi Naawuni so maa ka ti gba jɛmda, ti pun maanila sara maligunima n-tir’ o saha shɛli Asiria Naa Ɛsarihadɔn ni daa chɛ ka ti kana ti ʒini kpe la hal ni woyo.”

³Amaa ka Zɛrubabɛl mini Jɛshua ni Izraɛl daŋ kam ni zuɣulaannim’ maa daa yɛli ba, “Yi ka soli ni yi pahi ti zuɣu me ti Naawuni duu maa ti o, amaa ti kɔŋko ni me Yawɛ ŋun nyɛ Izraɛl Naawuni ŋɔ duu maa kaman Pɛriʒia Naa Sairus ni bahi ti noli ni ti me li shɛm.”

⁴Di saha ka tiŋgbɔŋ maa ni niriba daa kpɛhi Juda zuliya niriba maa dabiɛm, ka gbarigi ba zaŋ chaŋ mɛbu maa polo.

⁵Bɛ daa tila Pɛriʒia gomnanti tuma zuɣulaannim’ birapu ni bɛ gbarigi bɛ ni daa lo nia ni bɛ niŋ shɛm maa Pɛriʒia Naa Sairus ʒiɛman’ ni zaŋ hal ti paai Pɛriʒia Naa Darius ʒiɛman’ ni.

⁶ Naa Ahasivɛrɔs nam dibu piligu ni, ka bɛ daa ŋma gbaŋ fiɣisi Judanim’ mini Jɛrusalɛmnima.

⁷Pɛriʒia Naa Atazɛrikisɛs ʒiɛman’ ni, Bishilam mini Mitrɛdat ni Tabiil ni bɛ tab’ bɛn kpalim daa sabila gbaŋ ti Pɛriʒia Naa Atazɛrikisɛs Aramaik yɛtɔɣa ni, ka daa lɛbigi li.

⁸Ka gomna Rɛhum gba mini Shimshai ŋun daa nyɛ bɛ yaɣili maa polo gbaŋŋmar’ la daa sab’ gbaŋ ti Naa Atazɛrikisɛs zaŋ chaŋ Jɛrusalɛm yɛla polo. Bɛ ni daa sab’ yɛli shɛm m-bɔŋɔ:

⁹Gbaŋ ŋɔ yila gomna Rɛhum mini Shimshai ŋun nyɛ bɛ yaɣili polo gbaŋŋmar’ la ni bɛ taba bɛn kpalim ni sariakaritiba ni tuma zuɣulaannim’ ni kpamba ni Pɛriʒianim’ ni Ɛrɛknim’ ni Babilɔnnim’ ni Susa din be Ɛlam tiŋgbɔŋ ni la nima

¹⁰zaŋ tabili zuliya shɛb’ Naa Ashuribanipal ŋun mali kpiɔŋ pam la ni daa yiɣisina nti ʒili Samaria tiŋ’ puuni mini luɣ’ shɛŋa din pahi m-be Yufretiiz Mɔɣili duli wulinluhili polo la nim’ sanna.

¹¹Bɛ ni daa yɛli shɛm gbaŋ maa ni m-bɔŋɔ: “Naa Atazɛrikisɛs, a bihi bɛn be Yufretiiz Mɔɣili wulinluhili polo la n-sabi gbaŋ ŋɔ ti a.

¹²“Naa, baŋmi ni Yɛhudianim’ bɛn yi a sani n-kuli ti sanna la chaŋ ti ʒinila Jɛrusalɛm. Bɛ lab’ mɛrila di tiŋ’ din nyɛ tin’ biɛɣu ni duŋtaabo tiŋ’ maa yaha. Bɛ pun sɔŋ di tanzahi, ka me di goma maa miri naabu.

¹³Naa, baŋmi ni bɛ yi me tiŋ’ la mini di goma maa naai, bɛ ku lan yo farigu balibu kam ti a, ka lala zuɣu ni chɛ ka a nam farigu liɣiri filim.

¹⁴Naa, ti gba ni nyar’ a nam daanfaani la zuɣu n-chɛ ka ti bi bɔri ni ti nya a filiŋ, dinzuɣu ka ti timna ti yɛl’ a

¹⁵ka a bahi noli ka bɛ vihi litaafi shɛŋa a yaannim’ ni daa chɛ ka bɛ sabi zal’ la ni. A yi chɛ ka bɛ vihi li, a ni nya ka lala tiŋ’ maa bi zani tuhi nanim’ mini tiŋgbɔna yaɣa, ka duŋtaabo pun be nimaani ka di wɔɣa. Dina n-chɛ ka bɛ daa wurim li maa.

¹⁶Dinzuɣu ti mi ni bɛ yi lab’ me tiŋ’ maa ka me di goma maa gba naai, Naa, nyin’ baŋmi ni a ku lan tooi su Yufretiiz Mɔɣili duli wulinluhili polo yaɣili maa nima.”

¹⁷Naa maa ni daa garigi yɛli shɛm m-bɔŋɔ: “Man’ Naa n-sab’ gbaŋ ŋɔ puhiri gomna Rɛhum mini yaɣili maa polo gbaŋŋmara Shimshai ni yi tab’ bɛn kpalim be Samaria zaŋ tabili bɛn zaa be Yufretiiz Mɔɣili duli wulinluhili polɔnima.

¹⁸“Yi ni sab’ gbaŋ shɛli ti ma la, bɛ lɛbigi li karim wuhi ma.

¹⁹Ka n daa bahi noli ni bɛ vihim’ yɛlli maa, ka bɛ daa vihi n-nya ka kurimbuni ha zaŋ kana zuŋɔ tiŋ’ maa shiri nyɛla tin’ shɛli din bi zani tuhi nam fukumsi, ka duŋtaariba mini gadamanima n-kul’ pali di ni.

²⁰Ka na’ shɛb’ bɛn mali yiko pam gba pun di n-ʒini nimaani, ka daa su Yufretiiz Mɔɣili duli wulinluhili polo yaɣilinim’ zaa, ka deeri ba farigu.

²¹Dinzuɣu zalimiya zaligu n-yɛli ni niriba maa na chɛli bɛ tiŋ’ maa mɛbu, ka naɣila n ti lan zali zaligu yaha.

²²Din pahi nyɛla, miriya ka yi niŋ fawɔɣili zaŋ chaŋ yɛlli maa polo, ka di chɛ ka bɛ ni niŋdi shɛm maa ku tum naa barina.”

²³Bɛ ni daa kul karim gbaŋ shɛli din yi Naa Atazɛrikisɛs sanna maa n-wuhi Rɛhum mini Shimshai ni bɛ tab’ la, bɛ daa dii zola yomyom chaŋ Jɛrusalɛm nti zaŋ kpiɔŋ muɣisi Yɛhudianim’ maa ka bɛ chɛ mɛbu

²⁴ Di saha ka bɛ daa chɛ Naawuni jɛmbu duu din be Jɛrusalɛm maa mɛbu tuma, di daa kul kpalim ʒiɛla lala hal ti paai Pɛriʒia Naa Darius nam dibu yuma ayi saha.