Read Dagbani Ɛzra 5 Bible Online

Ɛzra 5 - Dagbani bible

Ɛzra 5

¹ Di saha maa ka anabinima ayi bɛn daa nyɛ Hagai mini Zakaria ŋun daa nyɛ Iddo bia la daa piligi m-mali Izraɛl Naawuni yuli n-tɔɣisiri anabitali yɛtɔɣa tiri Yɛhudianim’ bɛn daa be Juda mini Jɛrusalɛm ka nyɛ o ni su shɛb’ la.

² Ka Shialtiɛl bia Zɛrubabɛl mini Jɔzadak bia Jɛshua daa piligi n-lab’ mɛri Naawuni jɛmbu duu maa Jɛrusalɛm, ka Naawuni daanabinim’ daa be bɛ sani sɔŋdi ba.

³Di saha ka Yufretiiz Mɔɣili wulinluhili polo gomna Tatɛnai mini Shɛtaribɔzɛnai ni bɛ zuɣulaantab’ daa ka Jɛrusalɛm na nti bɔhi Yɛhudianim’ maa: “Ŋuni n-lee bahi ya noli ni yi mɛm’ duu ŋɔ hal ka yi me li ti naai?”

⁴Bɛ daa lan bɔhi ba, “Ninvuɣ’ shɛb’ bɛn mɛri duu maa yuya lee booni bɔ?”

⁵Amaa ka Naawuni nini daa kul kpa Yɛhudia zuɣulaannim’ maa ka bɛ daa bi tooi chɛ ka bɛ chɛ mɛbu hal ka di lahibali daa ti ti nti to Darius ka o daa sab’ o zilinkom gbaŋ ti na.

⁶Yufretiiz Mɔɣili duli yaɣili gomna Tatɛnai mini Shɛtaribɔzɛnai ni o zuɣulaantab’ bɛn daa nyɛ tuumba, ka be Yufretiiz Mɔɣili wulinluhili polo yaɣili ni la daa sabi gbaŋ tim Naa Darius sani.

⁷Bɛ ni daa sabi gbaŋ maa n-yɛl’ o shɛm m-bɔŋɔ: “Naa Darius ka ti sabi gbaŋ ŋɔ tira. Naawuni ti ma suhudoo zaa!

⁸“Naa, baŋmi ni ti daa chaŋla Juda yaɣili Naawuni ŋun galisi ŋɔ duu la ni. Bɛ zaŋla bɛ ni kpe kuɣ’ shɛŋa mɛri li, ka zaŋ dapaɣa kpɛhi di goma ni. Bɛ tumdi tuma maa viɛnyɛliŋga pam, ka di kul chani tooni.

⁹“Di saha ka ti daa tɔɣisi bɛ zuɣulaannim’ maa yɛtɔɣa ka bɔhi ba, ‘Ŋuni n-lee bahi ya noli ni yi mɛm’ duu maa hal ka yi ti me li naai?’

¹⁰Ka ti daa lan bɔhi ba bɛ yuya ni di chɛ ka ti sabi bɛ yuya, ka wuh’ a bɛn nyɛ tuma maa zuɣulaannima.

¹¹“Bɛ ni daa garigi yɛli ti shɛm m-bɔŋɔ: ‘Ti nyɛla Naawuni ŋun su zuɣusaa mini tiŋgbani ŋɔ daba, ka lab’ mɛri du’ shɛli Izraɛl na’ so ŋun mali yiko pam ni daa pun me n-naai zali yuun’ gbaliŋ din gari la ni ha.

¹² Amaa ka ti yaannim’ ni daa ku Naawuni ŋun be alizanda ni ŋɔ sul’ la zuɣu daa chɛ ka o chɛ ka Babilɔn Naa Nɛbukadnɛza ŋun daa nyɛ Kalidia nir’ la daa kana ti tuhi nyaŋ ba; ka wurim Naawuni jɛmbu duu maa, ka gbahi niriba maa n-ʒi ba kuli Babilɔn.

¹³ Ka Babilɔn Naa Sairus daa ti zali zaligu o nam dibu yuun’ yini saha ni bɛ lab’ me Naawuni jɛmbu duu maa zali.

¹⁴Din pahi nyɛla, Naa Sairus daa lan labisi salima min’ anzinfa nɛma din daa nyɛ Naawuni jɛmbu duu maa ni neen’ shɛŋa Naa Nɛbukadnɛza ni daa kpuɣi Naawuni jɛmbu duu Jɛrusalɛm n-zaŋ ti zal’ o buɣa duu Babilɔn la na. O daa zaŋ li tila do’ so ŋun yuli daa booni Shɛshibaza o ni daa zaŋ so n-leei Juda gomna la.

¹⁵O daa yɛl’ o mi, Zaŋm’ nɛma maa chaŋ Jɛrusalɛm ti zali Naawuni jɛmbu duu la ni, ka lab’ me Naawuni jɛmbu duu maa n-zali di zaashe’ kurili ni.

¹⁶Ka Shɛshibaza daa kana nti sɔŋ Naawuni jɛmbu duu maa tampuɣili Jɛrusalɛm ŋɔ; ka mɛbu maa tuma kul tumdi di saha maa zaŋ kana pumpɔŋɔ, amaa ka di na lee bi me n-naai.’

¹⁷“Naa, ka di yi luhi a sani pumpɔŋɔ, nyin’ bahim’ noli ka bɛ vihi Babilɔn nam litaafinim’ ni n-nya Naa Sairus daa shiri bahi noli ni bɛ lab’ me Naawuni jɛmbu duu maa zali Jɛrusalɛm, ka labisi a ni yu shɛm zaŋ chaŋ yɛlli maa polo zilinli ti ti na.”