Read Dagbani Ɛzra 6 Bible Online

Ɛzra 6 - Dagbani bible

Ɛzra 6

¹Di saha ka Naa Darius daa bahi noli, ka bɛ daa vihi luɣ’ shɛŋa litaafinim’ ni daa be Babilɔn.

²Amaa tin’ shɛli din yuli daa booni Ɛkibatana ka di be Miidia tiŋgbɔŋ yaɣili la ni ka bɛ daa ti nya litaafi shɛli ka sabbu ŋɔ be di ni:

³“Naa Sairus nam dibu yuun’ yini ni ka o daa zali zaligu zaŋ chaŋ Naawuni jɛmbu duu din be Jɛrusalɛm la polo, ka wuhi ni bɛ labimi me duu maa zali ka me bɛ ni maani sara luɣ’ shɛli, ka zaŋdi sara shɛŋa bɛ ni zaŋdi nyɔri buɣim na. Di daa wuhiya ni bɛ niŋm’ duu maa ka di dubu nyɛ mita pisinaayopɔin, ka chɛ ka di yɛliŋ gba nyɛ mita pisinaayopɔin.

⁴Di daa lan wuhi ni bɛ yi yɛn me duu maa dikili, bɛn’ zaŋm’ kuɣa me kulis’ ata, ka zaŋ dari mi n-niŋ kuliga zaɣ’ yini n-tam di zuɣu. Ka yihi nam fukumsi kpanjɔɣu ni liɣiri n-yo duu maa mɛbu tuma samli.

⁵Din pahi nyɛla, chɛ ka bɛ zaŋ salima min’ anzinfa neen’ shɛŋa Naa Nɛbukadnɛza ni daa kpuɣi Naawuni jɛmbu duu Jɛrusalɛm n-kuli Babilɔn na la n-labisi li ti zali di zaashe’ kura ni Naawuni jɛmbu duu maa ni Jɛrusalɛm.”

⁶Di saha ka Naa Darius daa labisi yɛtɔɣ’ shɛŋa din dolina ŋɔ n-ti ba: “Pumpɔŋɔ nyin’ Tatɛnai ŋun nyɛ Yufretiiz Mɔɣili duli wulinluhili polo yaɣili gomna mini Shɛtaribɔzɛnai ni yi tuma zuɣulaantab’ bɛn be Yufretiiz Mɔɣili duli wulinluhili polo yaɣili ni la, gbaamiya yimaŋa.

⁷Chɛliya Naawuni jɛmbu duu tuma maa baalim. Chɛliya Juda gomna mini Yɛhudia zuɣulaannim’ maa baalim ka bɛ lab’ me Naawuni jɛmbu duu maa n-zali di zaashe’ kurili la ni.

⁸Din pahi nyɛla n zali zaligu zaŋ chaŋ yi ni yɛn niŋ Yɛhudia kpamba maa shɛm ka bɛ lab’ me Naawuni jɛmbu duu maa zali. Piimiya farigu laɣ’ shɛli yi ni deeri Yufretiiz Mɔɣili wulinluhili polo yaɣili maa n-niŋdi nam fukumsi kpanjɔɣu ni la n-yɔri niriba maa kaliŋkaliŋ ka shɛli ku taɣi tuma maa zali.

⁹Ka timiya maligumaaniba bɛn be Jɛrusalɛm maa bɛ ni kul bɔri shɛlikam dabisili kam puuni, ka di chɛliya ka shɛli pooi ba. Dina n-nyɛ: naɣila pola mini piɛlahi bee piɛbihi ka bɛ zaŋdi ba maani sara nyɔri buɣim tiri Naawuni ŋun be alizanda ni ŋɔ m-pahi alikama mini yalim ni wain bee kpam.

¹⁰Dina n-ni chɛ ka bɛ tooi mali sara din ni tiɣi Naawuni ŋun be alizanda ni ŋɔ nini, ka suh’ o naa min’ o bihi nyɛviya zuɣu.

¹¹N lan zali zaligu ni so yi taɣi zaligu ŋɔ, bɛn’ darigim’ ŋooi ŋun tum taali maa yiŋ’ yɔɣirili n-zaŋ li sa n-zaŋ o yil’ li, ka o yiŋ’ zani dabɔɣu.

¹²Ka na’ so bee zuliya shɛb’ yi lo ni bɛ yiɣisi zaligu ŋɔ ka saɣim Naawuni jɛmbu duu din be Jɛrusalɛm maa, ŋun’ Naawuni ŋun pii nimaani n-leeg’ o jɛmbu shee ŋɔ ŋun’ vuum’ ba bahi. Man’ Naa Darius n-zali zaligu ŋɔ. Ka di kpa talahi ni sokam dol’ li.”

¹³Di saha ka Yufretiiz Mɔɣili duli wulinluhili polo yaɣili gomna Tatɛnai mini Shɛtaribɔzɛnai ni bɛ tuma zuɣulaantab’ la daa niŋ kaman Naa Darius ni zali ba ni bɛ niŋ shɛm maa zaa.

¹⁴ Ka Yɛhudia zuɣulaannim’ maa daa tumdi Naawuni jɛmbu duu maa mɛbu tuma maa ka di chani tooni ka viɛla. Ka anabi Hagai min’ anabi Zakaria ŋun daa nyɛ Iddo bia la daa tɔɣisiri anabitali yɛtɔɣa. Ka bɛ daa mali hal ti me Naawuni jɛmbu duu maa naai kaman Izraɛl Naawuni ni daa zali ba shɛm ni kaman Pɛriʒia nanima, Sairus mini Darius ni Atazɛrikisɛs gba ni daa zali ba shɛm.

¹⁵Bɛ daa me duu maa naala gol’ so bɛ ni daa booni Ada[2] la daba ata dali, yuun’ shɛli din daa pahiri Naa Darius nam dibu yuma ayɔbu la ni.

¹⁶Ka Izraɛlnim’ mini maligumaaniba ni Lɛvinim’ ni bɛnkam zaa kpalim ka nyɛ bɛn daa yi Babilɔn labina maa daa yooi Naawuni jɛmbu duu maa ni suhupiɛlli.

¹⁷Naawuni jɛmbu duu maa yoobu maa ni, bɛ daa zaŋla naɣilahi kɔbiga mini piɛlahi kɔbisiyi ni piɛbihi kɔbisinahi mali sara, ka lan zaŋ bulahi pinaayi mali sara Izraɛlnim’ zaa daalahichi zuɣu; kaman bɛ zuliya maa kalinli ni nyɛ shɛm.

¹⁸Ka bɛ daa lan pirigi maligumaaniba zalizali bɛ zaashɛhi, ka pirigi Lɛvinima zalizali bɛ zaashɛhi ni bɛ tumdi Naawuni tuma Jɛrusalɛm kaman di ni sabi shɛm Musa litaafi ni la.

¹⁹ Ka bɛn daa lab’ kulina maa daa puhi Yaɣigari chuɣu gol’ so ŋun daŋ tooni biɛɣu pinaanahi dali.

²⁰Dama maligumaaniba mini Lɛvinim’ daa malila bɛmaŋa m-be kasi. Ka bɛ daa kɔrigi Yaɣigari chuɣu piɛbila bɛn zaa daa labina maa mini bɛ maligumaanitaba ni bɛmaŋmaŋ’ zuɣu.

²¹Ka Izraɛlnim’ bɛn daa lab’ kulina maa mini bɛnkam zaa daa zaŋ bɛmaŋ’ bali bɛ ni, ka woligi bɛmaŋ’ ka chɛ zuliya shɛb’ bɛn daa be nimaani daɣiri tuma ni bɛ jɛmdi Yawɛ ŋun nyɛ Izraɛlnim’ Naawuni la zaa daa laɣim di li.

²²Ka bɛ daa zaŋ daba ayopɔin m-puhi bɔrɔbɔro din ka dabindi chuɣu ni suhupiɛlli. Yawɛ n-daa chɛ ka bɛ mali suhupiɛlli maa. O ni daa lɛbigi Asiria naa suhu ti ba ka o sɔŋ ba Izraɛl Naawuni jɛmbu duu mɛbu tuma ni la.