Read Dagbani Ɛzra 9 Bible Online

Ɛzra 9 - Dagbani bible

Ɛzra 9

¹Dimbɔŋɔnim’ zaa niŋbu nyaaŋa, ka kpamba daa kana ti yɛli ma, “Izraɛlnim’ mini maligumaaniba ni Lɛvinim’ bi woligi bɛmaŋ’ ka chɛ tiŋgbɔn shɛŋa din baɣi ba nima ni bɛ ni tumdi din chihiri shɛŋa. Di tiŋgbɔna maa nima n-nyɛ Ammɔnnim’ mini Mɔabnim’ ni Ijiptinim’ ni Keenannim’ mini Hitinim’ ni Pɛrizinim’ ni Jɛbusinim’ ni Amɔrinima.

²Dama bɛ daa kpuɣirila bɛ bipuɣin’ shɛba n-niŋdi bɛmaŋmaŋ’ paɣiba, ka kpuɣiri bɛ bipuɣinsi maa tiri bɛ bidibisi gba, ka lala zuɣu chɛ ka Naawuni niriba bɛn be kasi maa leei bɛn zaŋ bɛmaŋ’ gari tiŋgbɔŋ maa niriba ni. Bɛn daa nyɛ kpamba mini tuma zuɣulaannim’ la n-daa gari tooni n-chɛ ka bɛ tum yɛda kalinsi tuma maa.”

³N ni daa wum yɛlli ŋɔ, n daa dari tɔhila m binyɛra, ka dari sibi n zabiri mini n teeŋa ka teei ʒini tiŋa, ka kɔŋ suhukpeeni.

⁴Di saha ka bɛnkam zaa daa wum Izraɛl Naawuni yɛtɔɣa ka bɛ ni sɔhiri la daa laɣim gili ma zaŋ chaŋ ninvuɣ’ shɛb’ bɛn daa lab’ kulina maa yɛda kalinsi maa zuɣu. N daa kul ʒimi ka kɔŋ suhukpeeni hal ti paai zaawuni sara maligu saha.

⁵Zaawuni sara maligu maa saha ka n daa yiɣisi n nolɔbo maa puuni ni m binyɛr’ tɔhima la. Ka n daa gbani n-teei n nuhi niŋ Yawɛ ŋun nyɛ n Naawuni ŋɔ,

⁶ka yɛli, “Yaa n Naawuni, vi mali ma pam ni n kpuɣi n zuɣu zuɣusaa a tooni. Dama n Naawuni, ti daalahichi dumi hal ti yaɣi ti zuɣuri zuɣu; ka ti taali du hal ti tɔri sagbana.

⁷Ti yaannim’ saha la zaŋna hal ni zuŋɔ, ti tum alahichi pam. Ti daalahichi maa zuɣu ka ti mini ti nanim’ ni ti maligumaaniba daa kpe tinzun nanim’ nuu ni, ka bɛ zaŋ takɔbi ku ti ni shɛba, ka fa ti binyara, ka gbahi ti chaŋ ti leei daba, ka ti di vi kaman di ni na kul nyɛ shɛm pumpɔŋɔ ŋɔ.

⁸Amaa Yawɛ ŋun nyɛ ti Naawuni ŋɔ, kulla pumpɔŋɔ ka a niŋ ti nirilim n-yihi tinim’ bɛn kpalim ŋɔ dabitim ni, ka ti ti biɛhigu shee din ka muɣisigu a luɣ’ kasi shee ŋɔ. Yaa ti Naawuni, a neei ti nini ka ti ti sɔŋsim shɛli ti ni bɔra saha shɛli ti ni daa be dabitim ni maa.

⁹Dama ti nyɛla daba, amaa ti Naawuni, a bi chɛ ti bahi ti dabitim maa ni, amaa a wuhi a yurilim ni nyɛ shɛm zaŋ chaŋ ti polo Pɛriʒia nanim’ sani, ka ti ti nyɛvili palli ka ti me ti Naawuni jɛmbu duu, ka mali din daa wurim la, ka ti ti gooni Juda mini Jɛrusalɛm puuni.

¹⁰Ti Naawuni, ka pumpɔŋɔ wula ka ti lee yɛn yɛli dimbɔŋɔ nyaaŋa? Dama ti lan zaɣisi a zaligu shɛŋa

¹¹a ni daa zaŋ ti a daba bɛn nyɛ anabinima ka bɛ zaŋ ti ti ka yɛra, ‘Yi ni kuni tiŋgbɔn shɛl’ ni ni yi ti deei li su maa nyɛla tiŋgbɔŋ maa niriba ni zaŋ bɛ din chihiri tumbu saɣim tiŋgbɔn shɛli. Bɛ chɛ ka tuumbiɛri maa yɛligi gili di luɣ’ shɛlikam zaa.

¹² Dinzuɣu miriya ka yi zaŋdi yi bipuɣinsi tiri bɛ bidibisi, yi mi miri ka yi kpuɣiri bɛ bipuɣinsi tiri yi bidibisi. Yi mi miri ka yi bɔri bɛ suhudoo nyabu bee bɛ tɔŋbu sahakam, dina n-ni chɛ ka yi mali yaa, ka di tiŋgbɔŋ maa binsuma ka chɛ li zali yi bihi fali sahakam.’

¹³Yaa ti Naawuni, hal binshɛlikam din niŋ ti ti daalahichi mini ti taali zuɣu ŋɔ ti mi ni a bi darigi ti tibili kaman ti tuumbiɛri ni simdi shɛm, ka chɛ ka ti ni shɛb’ tiligi ŋɔ,

¹⁴ti lan zaɣisim’ a zaligunim’ maa yaha ka chaŋ ti kpuɣi ninvuɣ shɛb’ bɛn tumdi din chihiri ŋɔ bipuɣinsi n-niŋ ti paɣiba? A ku je suli m-bahi ti yoli zaa kahikahi, ka chɛ ka ti ni so ku lan tiligi?

¹⁵Yawɛ ŋun nyɛ Izraɛlnim’ Naawuni ŋɔ, a nyɛla Yɛlimaŋlilana, amaa ti nyɛla bɛn tiligi ka kpalim kaman di ni nyɛ shɛm pumpɔŋɔ ŋɔ. Tinima n-ʒe a tooni ni ti taali maa hal so ni ku tooi zani a tooni lala maa zaa yoli.”