Read Dagbani Nɛhimia 2 Bible Online

Nɛhimia 2 - Dagbani bible

Nɛhimia 2

¹Naa Atazɛrikisɛs nam dibu yuun’ pisi saha gol’ so bɛ ni booni Nisan[2] la puuni, Naa wain nyubu saha ni daa ti paai, ka n daa zaŋ li ti ti o. N daa na ʒi m-mali suhugarigu o tooni.

²Dinzuɣu ka naa daa bɔhi ma, “Bɔ n-niŋ ka a ninni ti lihiri suhugarigu lihigu lala? A mi bi biɛra, di nyɛla a suhu ni yɛlimuɣisira suhugarigu.” Ka dabiɛm daa gbaai ma pam.

³ Ka n daa yɛli naa, “Naawuni dolim’ a nyɛvili! Wula ka n yaannim’ gbala ni do tin’ shɛl’ ni lu n-dahim, ka buɣim di di dunɔdaya, ka n ku lihiri suhugarigu lihigu?”

⁴Di saha ka Naa maa daa bɔhi ma, “Ka sɔŋsim bɔ ka a leei bɔra?” Ka n daa suhi Naawuni ŋun su alizanda ŋɔ.

⁵Di saha ka n daa yɛli Naa. “Di yi niŋ nyin’ Naa nyaɣisim, ka a yu ni a niŋ man’ ŋun nyɛ a dabili ŋɔ nirilim, n suhir’ a ni a timmi ma Juda tiŋgbɔŋ ni n yaannim’ gbala ni do tin’ shɛli ni la ka n ti lab’ me li zali.”

⁶Ka naa maa daa bɔhi ma, “Yuma ala ka a yɛn niŋ nimaani, ka bɔ saha ka a yɛn labina?” Di saha o paani daa ʒimi baɣ’ o. Ka di daa niŋ naa nyaɣisim ni o tim ma, ka n daa yɛl’ o n ni yɛn labina saha shɛli.

⁷Di saha ka n daa yɛli naa, “Di yi niŋ nyin’ naa nyaɣisim, nyin’ tim’ ma gbana ka n ti ti gomnanim’ bɛn be Yufretiiz Mɔɣili duli yaɣili polo la din ni chɛ ka bɛ ti ma soli ka n gari hal ti paai Juda.”

⁸Ka n daa lan chɛ ka o sabi gban’ shɛli ti ma ka n ti ti Asaf ŋun guli ŋun’ Naa tihi din nyɛ nyɔŋ la n-yɛl’ o ka o ti ma dakuɣiri ka n ti mali dasara n-kpɛhi birini shɛli din gili Naawuni jɛmbu duu la mini tiŋ’ maa goma ni mmaŋmaŋ’ ni yɛn be yil’ shɛl’ ni la. Ka naa maa daa shiri ti ma n ni suh’ o binshɛli maa, dama n Naawuni daalibarika nuu daa pa n zuɣu.

⁹Ka naa maa daa bo tɔbbihi zuɣulaannim’ mini tɔbbi’ wɔribariba pa n zuɣu, ka n daa lu soli m-mali hal ti paai Yufretiiz Mɔɣili duli yaɣili polo maa gomnanim’ sani n-daa zaŋ naa gbana maa ti ba.

¹⁰Amaa ka Sanbalat ŋun daa nyɛ Bɛtihɔrɔn nir’ la mini Tɔbaya ŋun mi daa nyɛ Ammɔnnim’ tumtumdiba zuɣulan’ la daa wum ni ninvuɣ’ so kana ni o ti tum tuun’ shɛli din ni sɔŋ Izraɛlnima, ka di daa bi niŋ ba nyaɣisim zaa.

¹¹Ka n daa paai Jɛrusalɛm m-be nimaani dabisi’ muna ata.

¹²Ka m mini niriba biɛla bɛn daa be n sani daa ti yiɣisi yuŋ. N daa bi yɛli so n Naawuni ni daa zaŋ shɛli niŋ n suhu ni ni n tum ti Jɛrusalɛm. Biŋkɔb’ so daa ka n sani m-pahi n ni daa bari biŋkɔb’ so la.

¹³N daa dolila Vinvamli Dunɔdal’ la yi yuŋ chaŋ ti gari Wɔɣ’ Kurili kɔbilinini la shee n-chaŋ Saɣiri Dunɔdal’ la ni. N daa chanimi n-kaari ni n nya Jɛrusalɛm goma maa ni lunlu shɛm mini buɣim ni daa di n-saɣimsaɣim di dunɔdaya la shɛm.

¹⁴Ka n daa kul mali lala hal ti paai Kɔbilinini Dunɔdal’ la mini Naa Kosubo bɔɣili la polo. Ka n ni daa bari biŋkɔb’ so maa daa bi tooi nya soli gari.

¹⁵Dinzuɣu ka n daa doli vinvamli ni yuŋ maa n-yuuni nimaani polo chani ka yuuni gooni maa. Ka n daa lan ŋmaligi doli Vinvamli Dunɔdal’ la labi.

¹⁶Tiŋ’ maa ni zuɣulaannim’ daa bi mi n ni chaŋ luɣ’ shɛli bee n ni niŋ shɛli. N daa na bi yɛli Yɛhudianim’ mini maligumaaniba ni kpamba ni tuma zuɣulaannim’ ni ninvuɣ’ shɛb’ bɛn daa yɛn tum tuma maa ni so shɛli.

¹⁷Di saha maa ka n daa yɛli ba, “Yi nya ti ni be yɛlimuɣisir’ shɛl’ ni. Jɛrusalɛm lu n-dahim, ka buɣim di n-saɣim di dunɔdaya. Dinzuɣu kamiyana ka ti lan lab’ me di gooni maa din ni chɛ ka ti yi vi shɛl’ ni ti ni be maa.”

¹⁸Ka n daa lan yɛli ba n Naawuni nuu ni pa n zuɣu shɛm mini naa ni daa yɛli ma shɛm yɛla. Ka bɛ daa yɛli ma, “Chɛliya ka ti yiɣisi piligi di mɛbu.” Ka bɛ daa zaŋ bɛ kpalanzuya gbini taba.

¹⁹Amaa ka Sanbalat ŋun daa nyɛ Bɛtihɔrɔn nir’ la mini Tɔbaya ŋun daa nyɛ Ammɔnnim’ tumtumdiba zuɣulan’ la ni Laribu do’ so ŋun yuli daa booni Gɛshɛm la daa wum ti ni lo nia ni ti tum shɛm maa, ka maani ti ansarisi, ka lari ti ka yɛli, “Yi lee tɛhiya ni bɔ ka yi niŋdi maa? Yi yɛn zaɣisila naa noli?”

²⁰Ka n daa garigi yɛli ba, “Naawuni ŋun su alizanda ŋɔ n-nyɛ ŋun yɛn ti ti nasara. Tinim’ bɛn nyɛ o daba ŋɔ ni piligi mɛbu maa. Amaa yinima nyɛla ninvuɣ’ shɛb’ bɛn ka tarili bee n-su shɛli bee ka so ti teei yi yɛla Jɛrusalɛm.”