Read Dagbani Nɛhimia 4 Bible Online

Nɛhimia 4 - Dagbani bible

Nɛhimia 4

¹Sanbalat ni daa wum ni ti lan piligi mɛri gooni maa, o suhu daa yiɣisiya pam, ka o puuni zaa diri buɣim ka o piligi maani Yɛhudianim’ ansarisi.

²O daa yɛl’ o tab’ mini Samaria tɔbbihi sani, “Bɔ ka Yɛhudianim’ bɛn nyɛ ninvuɣ’ chɔɣima ŋɔ lee niŋdi maa? Bɛ ni tooi lab’ me tiŋ’ maa zali yaha? Bɛ ni lan maani sara? Bɛ ni zaŋ dahin yini naai li? Bɛ ni yihi kuɣa din daa di buɣim tampuya saɣiri la ni me?”

³Tɔbaya ŋun daa nyɛ Ammɔn nir’ la daa ʒiɛmi tab’ o, ka gba daa yɛli, “Kuɣa goon’ shɛli bɛ ni mɛri maa, hal ŋɔɣu yi du n-tam di zuɣu, o ni daai li luhi!”

⁴“Ti Naawuni, wumma, bɛ ʒiɛm ti; chɛ ka bɛ daansarisi maa ŋmaligi lu bɛ zuɣu, ka chɛ ka bɛ gbahi ba kuli tinzun tiŋgbɔn shɛli kaman bɛ ni ŋme tɔbu di neen’ shɛŋa.

⁵Di sɔɣi bɛ taali maa, a mi di kpihim bɛ daalahichi maa a sani, dama bɛ yɛli zilima pam tammɛriba maa ninni.”

⁶Ka ti daa kul be gooni maa mɛbu ni, ka gooni maa zaa daa me n-tuɣi taba hal ti paai di dubu pirigili, dama niriba maa suhuri daa be tuma maa ni.

⁷Amaa Sanbalat mini Tɔbaya ni Laribunim’ ni Ammɔnnim’ ni Ashidɔdnim’ ni daa wum ni Jɛrusalɛm goma maa mali me tuma chani tooni hal ka di voya piligi ŋaribu la, ka bɛ suhuri daa yiɣisi pam.

⁸Dinzuɣu ka bɛ zaa daa laɣim lo nia ni bɛ kana nti liri Jɛrusalɛmnima n-tahi girigiri niŋbu na.

⁹Amaa ka ti daa suhi ti Naawuni maa, ka bo niriba zali gu ba wuntaŋ’ ni ni yuŋ zaa.

¹⁰Ka Judanim’ daa yɛli, “Ʒiʒiriba gbarigiya; ka saɣiri pam mi beni, ka di zuɣu chɛ ka ti kɔŋ gooni maa mɛbu.”

¹¹Ka ti dimnim’ maa daa yɛli, “Bɛ ku baŋ bee n-nya binshɛli pɔi, ka ti kana ti liri ba ku ba, ka tuma maa zani tariga.”

¹²Yɛhudianim’ bɛn mini ba daa be m-miri taba ni daa kana, bɛ daa yɛli ti siɣimsiɣim bupia, “Ti dimnim’ maa ni yi bɛ ni be luɣ’ shɛlikam zaa kana ti liri ti.”

¹³Dinzuɣu ka n daa pii niriba maa zuliyazuliya n-zali gooni maa nyaaŋa Palɔni naɣilima ni mini paliyari ni, ka bɛ gbibi takɔbiri mini kpana ni tɔbiri.

¹⁴N ni daa lihi binyɛra maa zaa nyaaŋa, ka n daa yiɣisi zani yɛli nanim’ mini zuɣulaannim’ ni niriba bɛn pahi, “Di zɔriya ba. Teemiya Yawɛ ŋun galisi ka mali dabiɛm ŋɔ yɛla, ka zabi yi dɔɣiriba mini yi bidibisi ni yi bipuɣinsi ni yi paɣiba ni yi yiŋnim’ zuɣu.”

¹⁵Ti dimnim’ maa ni daa wum ni ti baŋ bɛ ni lɔri nia shɛli maa yɛla, ka baŋ ni Naawuni nyaŋ ba bɛ ni lo nia shɛli maa ni, ka ti zaa daa lan lab’ gooni maa gbini, ka sokam ti tumd’ o tuma.

¹⁶Dindali maa zaŋ chana, n niriba maa pirigili n-daa tumdi mɛbu maa tuma, ka pirigili mi ye gbaɣinɔnima ka gbib’ kpana mini nyɔtaɣirisi ni tɔbiri. Ka zuɣulaannim’ la daa kul ʒe Judanim’ zaa bɛn’ mɛri gooni maa nyaaŋa.

¹⁷Hal ninvuɣ’ shɛb’ bɛn daa kahiri tandi nɛma n-tiri daa zaŋla bɛ nu’ yiniyini tumdi tuma, ka zaŋ nu’ yiniyini mi gbib’ bidibbina.

¹⁸Ka ŋunkam daa mɛri tandi mi daa zaŋla takɔbi n-so o shee ni ka mɛra. Ka ninvuɣ’ so ŋun daa piɛbiri kikaa gba daa kul baɣi ma.

¹⁹Ka n daa yɛli nanim’ mini zuɣulaannim’ ni niriba bɛn pahi, “Tuma maa galisiya ka di shɛhi wɔɣ’ ni taba, ka ti woliwoli taba gooni maa gbini.

²⁰Yi yi ti wum kikaa kumsi luɣ’ shɛli polo, yin’ laɣimmiya ti sanna. Ti Naawuni maa ni tuhi ti ti.”

²¹Dinzuɣu ti daa yi tumdi tuma maa, bɛ ni pirigili gbibila kpana asibaasi ŋaraŋara saha zaŋ hal ti paai yuŋ saŋmarisi peebu saha.

²²Di saha maa n daa lan yɛli niriba maa, “Yi mini sɔŋdiba zaa kpalimmi gbɛm’ Jɛrusalɛm din ni chɛ ka bɛ guli ti yuŋ ka tumdi tuma wuntaŋ’ ni.”

²³Dinzuɣu mmaŋmaŋ’ bee m mabihi bee n sɔŋdiba bee ninvuɣ’ shɛb’ bɛn daa nyɛ guliba bɛn doli ma la ni so daa bi yeei ti situra. Ti zaɣ’ yino kam daa kul gbibila o bidibbini o nudirigu ni.