Read Dagbani Nɛhimia 6 Bible Online

Nɛhimia 6 - Dagbani bible

Nɛhimia 6

¹Sanbalat mini Tɔbaya ni Gɛshɛm ŋun daa nyɛ Laribu la ni ti dimnim’ bɛn pahi la daa wumya ni ti me gooni maa naai hal ka voya lan ka di ni, amaa di saha maa n daa na bi zaŋ pundi kpɛhi di dunoya la.

²Di saha ka Sanbalat mini Gɛshɛm daa tim na ti yɛli ma ni n chirigim’ ba tiŋkpan’ shɛli din be Ono Bɔpiɛligu ni la. Amaa bɛ daa lomi ni bɛ niŋ ma zaɣ’ biɛɣu.

³Ka n daa tim tuumba ni bɛ ti yɛli ba, “N tumdila tuun’ shɛli din niŋ kamaata, n ku tooi kana. Bɔzuɣu ka n yɛn chɛ tuma maa ka di kpalim zani, ka ka yi sanna?”

⁴Bɛ daa tim na nti yɛli ma la zilin yini maa siɣimsiɣim bunahi, ka n gba daa labisi garigibu yini maa ti ba.

⁵Di saha ka Sanbalat daa tim o tumtumda na m-pahi bunu ni o zilin yini maa. O daa sabila gbaŋ din bi kpabi[3] ka o gbibi li o nuu ni na.

⁶Di ni daa yɛli shɛm m-bɔŋɔ: “Zuliya shɛb’ yɛri ŋumaŋuma, ka Gɛshɛm gba yɛli ni di nyɛla yɛlimaŋli ni a mini Yɛhudianim’ lola nia ni yi taai duŋ ni dizuɣu n-chɛ ka yi lab’ mɛri gooni maa. O lan yɛli ma ni a loya ni a zaŋla amaŋ’ leei naa.

⁷O lan yɛli ni a lɔri nia ni a chɛ ka anabinim’ moli gili Jɛrusalɛm puuni zaŋ chaŋ a polo n-yɛri ni a nyɛla Juda naa. Ka pumpɔŋɔ bɛ ni zaŋ yɛtɔɣa ŋɔ yɛli Pɛriʒia naa. Di zuɣu n-chɛ ka n yɛli ni a chirigim’ ma ka ti tɔɣisi di yɛla maa.”

⁸Ka n daa labisi n garigibu zilinkom ti o ha yɛli: “A ni yɛli yɛl’ shɛŋa yɛla ŋɔ zaa shɛli pa yɛlimaŋli, nyini n-kul ʒini tɛhi n-yɛli lala maa.”

⁹Dama bɛ zaa daa bɔrimi ni bɛ kpɛhi ti dabiɛm ka tɛhira, “Bɛ kɔba ni ni chɔɣisi, ka bɛ kɔŋ tuma tumbu.” Ka n daa suhi Naawuni yɛli, “N Naawuni, kpaŋsim n kɔba ni pumpɔŋɔ!”

¹⁰Dahin shɛli ka n daa chaŋ Dɛlaiya bia Shɛmaya ŋun daa nyɛ Mɛhɛtabɛl yaaŋa la yiŋa. O daa kul kpalim bela o yiŋa ka o daa yɛli, “Chɛ ka ti chaŋ ti sɔɣi luɣ’ kasi shee din be Naawuni jɛmbu duu puuni la, ka gbaai duu maa dunoya kpari, dama bɛ yɛn kamina ti ku a. Yɛlimaŋli, bɛ ni kana yuŋ ŋɔ ti ku a.”

¹¹Amaa ka n daa yɛli, “Ka mani ŋɔ tatabo zo? Mani ŋɔ tatabo ni zo nti kpe Naawuni jɛmbu duu ni n tiligi? N ku niŋ lala.”

¹²Ka n daa kpahim yɛlli maa nti baŋ ni di pala Naawuni n-wuh’ o ni o yɛli lala, amaa ka daa baŋ ni Tɔbaya mini Sanbalat n-daa ti o liɣiri m-puh’ o ni o tɔɣisi anabitali yɛtɔɣa ŋɔ jɛndi ma.

¹³Bɛ daa bu o la paa ni o kpɛhi ma dabiɛm n-chɛ ka n tum alahichi lala niŋbu ni, ka di zuɣu chɛ ka bɛ saɣim n yuli, ka mali ma ansarisi.

¹⁴“N Naawuni, teemi Tɔbaya mini Sanbalat ni tum shɛm ŋɔ yɛla, ka teei Nɔadia ŋun nyɛ anab’ paɣ’ la mini anab’ shɛb’ bɛn zaa pahi m-bɔri ni bɛ kpɛhi ma dabiɛm la gba yɛla.”

¹⁵Biɛɣ’ pihinunaayi ka ti daa zaŋ tum gooni maa mɛbu tuma zaa n-naai li gol’ so bɛ ni booni Ɛlul la biɛɣ’ pisinaanu dali.

¹⁶Ti dimnim’ zaa ni daa wum li, ka tinzunnim’ bɛn gili ti zaa daa nya li, ka bɛ kɔba ni chɔɣisi, dama bɛ daa baŋya ni ti Naawuni sɔŋsim ni ka tuma maa tum naai maa.

¹⁷Din pahi nyɛla, di saha maa Juda ninvuɣ’ zuɣuri daa sabila gbana pam ti Tɔbaya, ka Tɔbaya gba daa sabi gbana ti ba.

¹⁸Judanim’ pam daa pola pɔri n-zaŋ bɛmaŋ’ tabil’ o, o deemba ŋun daa nyɛ Ara bia Shɛkania ŋun nyɛ Yɛhudia nir’ la zuɣu. O bia Jɛhɔhanan daa kpuɣila Bɛrɛkia bia Mɛshulam bipuɣiŋga.

¹⁹Bɛ daa lan yɛli o tuun’ viɛla yɛla n-sani, ka daa zaŋ n yɛtɔɣa tɔɣis’ o. Ka Tɔbaya daa kul sabiri gbana tiri ma na ni o kpɛhi ma dabiɛm.