Read Dagbani Nɛhimia 9 Bible Online

Nɛhimia 9 - Dagbani bible

Nɛhimia 9

¹Gol’ maa biɛɣ’ pisinaanahi dali ka Izraɛlnim’ daa laɣimna ti lo noli, ka pili buri ka niŋ taŋkpaɣu puɣi bɛ zuɣuri.

²Di saha ka bɛn daa nyɛ Izraɛl tiŋbihi daa woligi bɛmaŋ’ ka chɛ tinzunnima n-zani kahigi bɛ daalahichi mini bɛ yaannim’ daalahichi wuhi.

³Ka bɛ daa yiɣisi zani bɛ zaashɛhi n-zaŋ awa muna ata karim Yawɛ ŋun nyɛ bɛ Naawuni ŋɔ litaafi dabisili maa puuni, ka zaŋ awa muna ata kahigi bɛ daalahichi wuhi, ka jɛm Yawɛ ŋun nyɛ bɛ Naawuni ŋɔ.

⁴Di saha ka Jɛshua mini Bani ni Kadimiɛl ni Shɛbania ni Bunni ni Shɛrɛbia ni Bani so mi ni Kɛnani daa yiɣisi zani Lɛvinim’ ni daa ʒe bimbin’ shɛli zuɣu ka duhi bɛ yee n-suhi Yawɛ ŋun nyɛ bɛ Naawuni ŋɔ.

⁵Ka Lɛvinim’ bɛn daa nyɛ Jɛshua mini Kadimiɛl ni Bani ni Hashabinɛya ni Shɛrɛbia ni Hɔdia ni Shɛbania ni Pɛtahia daa yɛli, “Yiɣisimiya zani m-paɣi Yawɛ ŋun nyɛ yi Naawuni ŋɔ hal ni saha din ka bahigu. Ti paɣir’ a yuli din mali jilima ka gari alibarika mini paɣibu kam ŋɔ.”

⁶Ka Ɛzra daa yɛli, “A kɔŋko n-nyɛ Yawɛ; nyini n-nam zuɣusaa mini zuɣusaa ha ni di tɔbbihi. Nyini n-nam tiŋgbani mini binshɛɣukam zaa din be di ni; ka nam teeku ni binshɛɣukam zaa din be di ni. Nyini n-ti di zaa nyɛvili, ka zuɣusaa tɔbbihi zaa jɛmd’ a.

⁷ Nyini n-nyɛ Yawɛ, nyini n-nyɛ Naawuni ŋun daa pii Ibram ka yih’ o Ur din nyɛ Kalidianim’ tiŋgbɔŋ ni na; ka daa taɣ’ o yuli m-bol’ o Ibrahimma.

⁸ A daa nyaya ka o suhu ʒe a yim, ka a daa lo o alikauli ni a ni zaŋ Keenanim’ mini Hitinim’ ni Amɔrinim’ ni Pɛrizinim’ ni Jɛbusinim’ ni Gɛrigashinim’ tiŋgbɔŋ ti o, ka a daa shiri pali a daalikauli maa, dama a nyɛla wuntialana.

⁹ “A daa nya ti yaannim’ ni diri wahala shɛm Ijipti; ka daa wum bɛ fabila Teeku Ʒiɛɣu ni.

¹⁰ A daa tum alahiziba tumtumsa ka wuhi shihira Firawuna min’ o tumtumdiba zaa ni o tiŋgbɔŋ maa ni niriba zaa sani, a ni mi bɛ ni daa niŋ ti fitiina shɛm la zuɣu. A daa zali yuli ti amaŋa, ka di kul beni hal ni zuŋɔ.

¹¹ A daa pirigi teeku buyi ka chɛ ka a niriba doli tiŋgban’ kuŋ zuɣu du, amaa ka a daai bɛn daa doli ba maa niŋ teeku maa bulli ni, kaman kuɣili ni lu kɔtitali ni shɛm la.

¹² Ka din pahi nyɛla a daa chɛ ka sagbani wuhiri ba soli wuntaŋ’ ni, ka chɛ ka buɣim ne yuŋ n-wuhiri ba bɛ ni yɛn doli shɛli polo.

¹³A daa yi alizanda ni n-siɣi Sinai Zoli zuɣu na nti tɔɣisi ba yɛtɔɣa, ka ti ba zaligu maŋa mini zaligu shɛŋa din pahi.

¹⁴ A daa wuhi ba a Vuhim Dabisili din be kasi yɛla, ka daa zaŋ a zalikpana mini zaligu shɛŋa din pahi n-ti a dabili Musa ka o ti ba.

¹⁵ “Ka kum daa ti mali ba, ka a ti ba bindiri’ shɛli din yi alizanda ni na. Ka kɔnyuri daa ti mali ba, ka a ti ba kom din yi tampiŋ ni na. Ka a daa yɛli ba ni bɛ cham’ ti deei tiŋgbɔn shɛli a ni daa po pɔri ni a ni zaŋ ti ba fali la su.

¹⁶ Amaa ka bɛna bɛn nyɛ ti yaannim’ maa daa ti niŋ karimbaani mini tipawumli n-zaɣis’ a zaligunim’ maa dolibu.

¹⁷ Bɛ daa zaɣis’ a noli deebu; ka tam a ni daa tum alahiziba tumtumsa shɛŋa bɛ san’ la yɛla; ka daa niŋ tipawumli, bɛ duŋ taabo maa ni bɛ daa pii toondana ni bɛ labi dabitim ni Ijipti tiŋgbɔŋ ni. Amaa a nyɛla Naawuni ŋun chɛri niriba taali. A nyɛla nirilimlana ni nambɔzɔra, ka mi bi jɛri suli yomyom. A yurilim din galisi la zuɣu, a daa bi zaɣisi ba.

¹⁸ Hal bɛ ni daa dooi bini mali naɣibil’ zali ka daa yɛli, ‘Yi Naawuni ŋun daa yihi ya Ijipti na la m-bɔŋɔ!’ la, bɛ daa mo nyin’ Naawuni pam.

¹⁹ Amaa a nambɔzɔbo din galisi la zuɣu, a daa bi chɛ ba bahi mɔɣu maa ni. Sagban’ shɛli din daa wuhiri ba sol’ la daa bi vuui ka chɛ ba wuntaŋ’ ni, ka buɣim din daa ne yuŋ n-wuhiri ba soli la gba daa bi chɛ ba.

²⁰A daa zaŋ a shia suŋ ti ba ka o wuhi ba baŋsim, a daa bi mɔŋ ba manna, ka daa ti ba kom ka bɛ nyu.

²¹Bɛ ni daa be yɔɣu maa ni yuun’ pihinahi la, a daa dihi ba, ka binshɛli daa bi pooi ba; bɛ situra daa bi kpi, ka bɛ naba mi daa bi mɔri.

²² “A daa zaŋ nam tiŋgbana mini niriba ti ba, ka daa zaŋ luɣ’ shɛlikam zaa ti ba, ka bɛ daa deei Hɛshibɔn din daa nyɛ Naa Sihɔn tiŋgbɔŋ la mini Bashan din daa nyɛ Naa Ogi tiŋgbɔŋ la su.

²³ A daa chɛ ka bɛ zuliya nabi n-galisi kaman saŋmarisi bɛn be zuɣusaa ŋɔ, ka a daa zaŋ ba na ti niŋ tiŋgbɔn shɛli a ni daa lo bɛ yaannim’ alikauli ni a ni zaŋ li ti ba ka bɛ su li la ni.

²⁴ Ka bɛ zuliya maa daa shiri chaŋ ti deei tiŋgbɔŋ maa su, ka a daa chɛ ka bɛ su Keenannim’ bɛn daa nyɛ tiŋgbɔŋ maa ni nim’ la, ka daa zaŋ bɛ nanim’ mini bɛ niriba ni bɛ tiŋgbɔŋ maa niŋ bɛ nuu ni, ni bɛ niŋ ba bɛ suhu ni yu shɛm.

²⁵ Ka bɛ daa ŋme n-fa bɛ ni me birini gili tin’ shɛŋa mini tiŋgban’ shɛli din mali kulim ni yiya shɛŋa din pal’ azichi ni kɔbil’ shɛŋa din pun gbi n-doya ni wain tihi puri ni olivi tihi puri ni tihi din wandi wala pam. Ka bɛ daa di n-tiɣi ŋmɛlim, ka daa nya nyaɣisim a nirilim din galisi pam maa ni.

²⁶“Amaa ka bɛ daa ti taai duŋ niŋ a n-zaɣis’ a noli; ka daa lɛb’ bɛ nyaaŋa bir’ a fukumsi zaligu la. Bɛ daa ku a daanabinim’ shɛb’ bɛn kpahi bɛ zuɣu ni din ni chɛ ka bɛ lab’ a sanna la. Bɛ daa mo a pam.

²⁷Dinzuɣu ka a daa zaŋ ba niŋ bɛ dimnim’ nuu ni, ka chɛ ka bɛ di wahala. Ka bɛ daa kuhi niŋ a bɛ wahala saha, ka a daa be alizanda ni ka wum bɛ kuhigu maa. A nambɔzɔbo din galisi pam la zuɣu ka a daa ti ba ninvuɣ’ faariba, ka bɛ fa ba bɛ dimnim’ maa nuu ni bahi.

²⁸ Amaa bɛ ni daa ti nya nyee vuhi saha shɛli, ka bɛ daa lan tum tuumbiɛri zaŋ chaŋ a sani yaha, ka a daa lan zaŋ ba niŋ bɛ dimnim’ nuu ni ka bɛ su ba yaha. Amaa bɛ ni daa ti niŋ tuuba ka kuhi niŋ a, a daa be alizanda ni ka wum bɛ kuhigu maa, ka daa tiligi ba siɣimsiɣim bushɛm a nambɔzɔbo zuɣu.

²⁹ A daa kpahi bɛ zuɣu ni ni bɛ labina ti dol’ a zaligu, amaa ka bɛ daa niŋ karimbaani zaɣis’ a fukumsi zaligunim’ maa dolibu, ka daa tum alahichi zaŋ chaŋ a zaligu shɛŋa din pahi la polo, hal a fukumsi zaligunim’ maa dolibu ni nyɛ din ni chɛ ka nir’ be maa zaa yoli. Bɛ daa zuɣisi bɛ bɔɣusapima, ka niŋ tipawumli zaɣis’ a noli deebu.

³⁰ Ka a daa zaŋ yuma pam di ba suɣilo, ka daa zaŋ a shia niŋ a daanabinim’ ni, ka bɛ kpahi bɛ zuɣu ni, amaa ka bɛ daa zaɣisi wumbu. Dinzuɣu ka a daa zaŋ ba niŋ tiŋgbɔn shɛŋa nim’ nuu ni.

³¹Amaa a nambɔzɔbo din galisi la zuɣu, a daa bi zaɣisi ba bee m-bahi ba yoli. A nyɛla nirilimlana ni nambɔzɔbo Naawuni!

³² “Dinzuɣu pumpɔŋɔ, ti Naawuni, a nyɛla Naawuni ŋun galisi, ka mali yiko, ka mali dabiɛm pam. A nyɛla ŋun gbibi alikauli mini ʒiɛyimtali. Asiria nanim’ ni daa nahindi ti saha shɛl’ la hal zaŋ kana pumpɔŋɔ, ti di wahala pam! Ti nanim’ mini ti zuɣulaannim’ ni ti maligumaaniba ni ti daanabinim’ ni ti yaannim’ zaŋ tabili a niriba zaa di wahala pam. Di lihi li yɛlibila.

³³Binshɛɣukam din niŋ ti maa puuni, a ka taali, dama a nyɛla ŋun ʒe ti yim, ka tinim’ lee tum din bie.

³⁴Ti yaannim’ mini ti nanim’ ni ti zuɣulaannim’ ni ti maligumaaniba daa zaɣis’ a fukumsi zaligu la dolibu, ka daa lan zaɣisi a zaligu shɛŋa din pahi la mini zuɣu ni kpahibu yɛtɔɣ’ shɛŋa a ni daa zaŋ ti ba la.

³⁵Hal bɛmaŋmaŋ’ nam puuni min’ a ni niŋ ba zaɣ’ viɛlli pam shɛl’ la puuni ni a ni zaŋ tiŋgbɔn tital’ shɛli din mali kulim ti ba la zaa yoli, bɛ daa zaɣis’ a jɛmbu, ka daa bi ŋmaligi ka chɛ bɛ tuumbiɛri.

³⁶Ka pumpɔŋɔ, ti nyɛla daba m-be tiŋgbɔn shɛli a ni daa zaŋ ti ti yaannim’ maa ni hal ni zuŋɔ. A daa zaŋ li ti ba ni bɛ diri di tiwala, ka nyari di pin’ suma daanfaani.

³⁷Tiŋgbani maa ni yihiri bindiri sun shɛŋa zaa na nyɛla a ni chɛ ka na’ shɛb’ su ti maa dini ti daalahichi zuɣu. Bɛna n-lan su ti niŋgbuna yiko zaŋ tabili ti binnɛma n-niŋdi bɛ suhuyubu, ka ti be nandahima pam ni!”

³⁸Binshɛɣukam din niŋ ti maa zuɣu ka ti lɔri alikauli ŋɔ, ka sabi li sɔŋ, ka ti zuɣulaannim’ mini ti Lɛvinim’ ni ti maligumaaniba yuya sabi pa bɛ ni zaŋ binshɛŋa tabili alikauli gbaŋ maa zuɣu.