Read Dagbani Ɛsta 2 Bible Online

Ɛsta 2 - Dagbani bible

Ɛsta 2

¹Dimbɔŋɔ nyaaŋa, Naa Ahasivɛrɔs suhuyiɣisili la ni daa ti maai, di saha ka o daa teei Vashiti yɛla min’ o ni daa niŋ shɛm ni bɛ ni daa zali zaligu shɛli ka di di o la gba yɛla.

²Di saha ka naazɔnim’ bɛn daa kul be o san’ la yɛl’ o, “Naa, chɛ ka bɛ vihi nya paɣisara bɛn nyɛ paɣipiɛl’ viɛla na ti ti a.

³Piim’ tuma zuɣulaannima a tiŋgbɔŋ ŋɔ yaɣili kam ni n-yɛli ba ni bɛ laɣimmi paɣisara bɛn nyɛ paɣipiɛl’ viɛla na nti niŋ a paɣiba yili din be Susa din nyɛ tinzuɣu ŋɔ la ni. Ka a zaŋ ba niŋ Hɛgai ŋun nyɛ namɔɣili so ŋun su a paɣiba lihibu fukumsi la nuu ni, ka chɛ ka bɛ ti ba binshɛŋa din yɛn chɛ ka bɛ mali bɛmaŋ’ viɛla.

⁴Ka a lihi bɛ ni m-piig’ a nin’ ni tiɣi paɣisar’ so n-zaŋ o leei napaɣa n-zali Vashiti zaashee.” Ka dimbɔŋɔ daa tiɣi naa nini ka o shiri niŋ lala.

⁵Yɛhudia do’ so daa be Susa din nyɛ tinzuɣu maa ni ka o yuli booni Mɔdɛkai. O daa nyɛla Bɛnjamin zuliya ni nira. Mɔdɛkai ba n-daa nyɛ Jair. O yaba n-daa nyɛ Shimɛi, ka o yab’ do’ kurili mi nyɛ Kish.

⁶ Mɔdɛkai daa nyɛla Babilɔn Naa Nɛbukadnɛza ni daa gbahi ninvuɣ’ shɛb’ leei daba n-ʒi n-yi Jɛrusalɛm kuli Babilɔn la ni yino. Di saha maa, Jɛhoyachin n-daa nyɛ Juda naa.

⁷Mɔdɛkai bapir’ so bipuɣiŋga daa beni ka o yuli booni Ɛsta. O Hiburu yuli mi daa nyɛla Hadasa. O daa viɛli pam. O ba min’ o ma zaa daa kpimi ka chɛ o, ka Mɔdɛkai zaŋ o n-wums’ o kaman omaŋmaŋ’ bipuɣiŋga la.

⁸Naa Ahasivɛrɔs zaligu maa ni daa moli gili, bɛ daa laɣim paɣisara pam tahi Susa din daa nyɛ tinzuɣu maa ni na, ka Ɛsta gba daa be bɛ ni. Bɛ daa zaŋ ba kpɛhila nayili maa puuni nti zaŋ ba niŋ Hɛgai ŋun daa su napaɣiba fukumsi la nuu ni ni o lihiri ba.

⁹Hɛgai nini daa tiɣi Ɛsta, ka o bɔr’ o yɛla pam. Di daa bi yuui ka o pun bo kpaʒiɛrima na ti ti Ɛsta, ka daa wuhi ni bɛ tim’ o bindir’ suma. O daa lan ti o la luɣ’ viɛlli shee napaɣiba yili maa ni, ka pii nayili maa puuni paɣisara ayopɔin ti o ni bɛ nyɛ o duu bihi n-tumd’ o tuma tir’ o.

¹⁰Mɔdɛkai ni daa pun yɛli Ɛsta shɛm zuɣu daa chɛ ka o bi saɣi wuh’ o ni nyɛ zuliya shɛli bee o niriba ni nyɛ shɛba.

¹¹Mɔdɛkai daa yi kul chanimi nti be luɣ’ shɛli din miri napaɣiba yili maa dundɔŋ dabisili kam. O daa chanimi gindi ni o baŋ Ɛsta nimaani benibu yɛla ni nyɛ shɛm ni din yɛn niŋ o.

¹²Yuun’ muni ka paɣisara maa daa zaŋ ni bɛ mali bɛmaŋ’ niŋ viɛlim. Bɛ daa yi zaŋdila tulaale shɛli bɛ ni booni mɛɛr la kpam n-ʒe li chira ayɔbu, ka lan zaŋ tulaale shɛŋa mini paɣiba kpaʒiɛrima mi n-ʒe di gba chira ayɔbu pahi. Dimbɔŋɔ nyaaŋa ka bɛ daa naanyi zaŋdi paɣisara maa yinoyino kpɛhiri Naa Ahasivɛrɔs sani.

¹³Paɣisarili mi daa yi yɛn yi paɣiba yili maa ni kpe nayili maa, o ni yɛli ni o bɔri shɛlikam, dina ka bɛ tir’ o ka o zaŋdi mali kpɛra.

¹⁴Yuŋ mi ka bɛ daa yi zaŋd’ o kpɛhira, ka biɛɣ’ neei ka bɛ lan zaŋ o tahi paɣiba yil’ shɛli mi ni nti niŋ Shaashigaz ŋun daa nyɛ namɔɣili so ŋun su napaɣ’ bihi fukumsi la nuu ni. Ka ŋun’ ku lan kpe naa maa sani yaha, naɣila naa maa n-yur’ o pam ka wuh’ o yuli ka yɛli ni bɛ bolim’ o ti o na.

¹⁵Ka Ɛsta saha daa ti paai ni bɛ zaŋ o kpɛhi naa sani. Ɛsta daa nyɛla Mɔdɛkai bapir’ Abiheel bipuɣin’ so ŋun’ Mɔdɛkai ni daa zaŋ wumsi kaman omaŋmaŋ’ bia la. Ka ŋunkam daa nya Ɛsta nini daa tiɣ’ o pam. Di ni daa paag’ o saha ni o kpe naa sani maa, O daa bi bɔhi shɛli yɛla m-pahila Hɛgai ŋun daa nyɛ namɔɣili so ŋun su paɣiba yili maa fukumsi la ni daa kul wuh’ o ni o zaŋm’ situr’ shɛli niŋ omaŋa.

¹⁶Naa Ahasivɛrɔs nam dibu yuun’ shɛli din daa pahir’ ayopɔin gol’ so ŋun pahi chir’ pia ka bɛ boon’ o Tɛbɛt[2] la ni ka bɛ daa zaŋ Ɛsta kpɛh’ o sani nayili maa.

¹⁷Ka Naa Ahasivɛrɔs daa yu Ɛsta gari paɣiba maa zaa. Hal o nini daa tiɣ’ o ka o yur’ o gari paɣisar’ bɛn’ la zaa. Dinzuɣu ka o daa dii zaŋ nam zuɣupiligu pil’ o n-zaŋ o leei napaɣa n-zali Vashiti zaashee.

¹⁸Di saha ka Naa Ahasivɛrɔs daa zali bindira dibu mini binnyura nyubu chuɣu ni o puhi li Ɛsta zuɣu, ka daa laɣim’ o tuma zuɣulaannim’ min’ o kpambaliba na. Di zuɣu o daa tila o tiŋgbɔŋ sulinsi maa zaa tumtumdiba dabisi’ muni ni bɛ chɛ tuma ka vuhi, ka daa tari pina din saɣi naa ni ni ti pin’ shɛŋa.

¹⁹Paɣisara maa ni daa laɣimna m-pahi buyi saha shɛli, Mɔdɛkai daa ʒila nayili dunol’ ni.

²⁰Ka Ɛsta daa na kul bi saɣi wuh’ o ni nyɛ zuliya shɛli bee o niriba ni nyɛ shɛba kaman Mɔdɛkai ni daa pun yɛl’ o shɛm la. Ɛsta daa deei Mɔdɛkai noli yɛlli ŋɔ ni kaman o ni daa yi pun deer’ o noli shɛm saha shɛl’ o ni daa nyɛ bia be o sani ka o wumsir’ o la.

²¹Saha shɛli Mɔdɛkai ni daa ʒe n-guli nayili dunoli, ka Bigitan mini Tɛrɛsh bɛn daa nyɛ namɔɣilis’ ayi n-ʒe n-guli naa zɔntua dunoli daa ti je suli niŋ Naa Ahasivɛrɔs ka lo ni bɛ sɔɣi ku o.

²²Ka Mɔdɛkai daa baŋ bɛ ni lo shɛm maa ka zaŋ li yɛli Napaɣ’ Ɛsta, ka o mi yɛli Naa Ahasivɛrɔs Mɔdɛkai ni wum shɛm ka yɛl’ o.

²³Ka bɛ daa vihi yɛlli maa n-nya ka bɛ ni wum shɛm maa shiri nyɛla yɛlimaŋli, ka bɛ daa gbahi bɛ niriba ayi maa n-zaŋ ba yili dasara. Ka naa maa daa chɛ ka bɛ sab’ yɛlli maa yɛla niŋ bɛ tiŋgbɔŋ maa yɛlikura litaafi ni o ninni.