Read Dagbani Ɛsta 3 Bible Online

Ɛsta 3 - Dagbani bible

Ɛsta 3

¹Dimbɔŋɔ nyaaŋa ka Naa Ahasivɛrɔs daa ti duhi do’ so ŋun yuli booni Haman n-zaŋ o leei zuɣulaampaa. Haman daa nyɛla Hamɛdata bia, ka lan nyɛ ŋun yi Agag[3] zuliya ni na.

²Ka naa maa daa zal’ o tumtumdiba zaa bɛn ʒe o dunol’ ni ni bɛ tim’ Haman jilima n-damdir’ o tiŋa. Amaa ka Mɔdɛkai ŋun’ daa zaɣisi ni o ku damd’ o tiŋa bee n-ti o jilima.

³Di saha ka naa maa tumtumdiba bɛn daa ʒe o yiŋ’ dunol’ ni daa bɔhi Mɔdɛkai, “Bɔ n-niŋ ka a zaɣisi naa zaligu dolibu?”

⁴Ka bɛ daa kul yɛr’ o di yɛla dabisili kam, ka o zaɣisi. Ka bɛ daa zaŋ yɛlli maa yɛli Haman ni bɛ nya Mɔdɛkai yɛligu maa ni zani, dama o daa pun yɛli ba ni o nyɛla Yɛhudia nira.

⁵Haman ni daa nya ka Mɔdɛkai zaɣisi ni o ku ti o jilima bee n-damd’ o tiŋ’ maa, ka o suhu yiɣisi pam.

⁶Ka bɛ ni daa lan yɛl’ o ni Mɔdɛkai nyɛla Yɛhudia nir’ la zuɣu chɛ ka o lo ni pa Mɔdɛkai kɔŋko ka o ni ku. Dinzuɣu ka Haman daa bo soli ni o ku Yɛhudianim’ zaa bɛn nyɛ Mɔdɛkai zuliya m-be Naa Ahasivɛrɔs nam sulinsi maa ni luɣilikam zaa.

⁷Naa Ahasivɛrɔs nam dibu yuun’ pinaayi saha gol’ so ŋun daŋ tooni ka bɛ boon’ o Nisan[4] la ni ka bɛ daa pihi kuɣa sɔŋ Haman tooni n-lihiri ni bɛ nya di ni ti yɛn lu dabisi’ shɛli dali ni gol’ so ni, ka di daa ti lula gol’ so ŋun pahiri pinaayi ka bɛ boon’ o Ada la biɛɣ’ pinaata dali. (Bɛ daa boonila bɛ ni niŋdi shɛm maa, “Purim.”)

⁸Di saha ka Haman daa yɛli Naa Ahasivɛrɔs, “Naa, zuliya shɛli niriba m-beni n-kul yɛrig’ a tiŋgbɔŋ ŋɔ yaɣili kam ni. Bɛ dolila kal’ shɛŋa din bi ŋmani so kali. Ka din pahi nyɛla, bɛ bi dol’ a tiŋgbɔŋ ŋɔ zaligunima, dinzuɣu a yi chɛ ba, di ku sɔŋ a.

⁹Naa, a yi saɣi, nyin’ zalimi zaligu n-chɛ ka bɛ ku ba. A yi ni niŋ lala, n lo alikauli ni n ni tooi zaŋ anzinfa din sania zuɣu tibisim paai kilɔgiram tuhi’ kɔbisita ni pihinahi n-niŋ a liɣiri kpanjɔɣu ni.”

¹⁰Ka naa maa daa pirig’ o nintu’ shɛli o ni daa yi mali dihiri zaligu gbana zuɣu ka di leeri naa ni zali zaligu shɛli ti Haman ŋun daa nyɛ Yɛhudianim’ dim’ maa. Haman daa nyɛla Hamɛdata bia, ka lan nyɛ ŋun yi Agag zuliya ni na.

¹¹Ka naa maa daa yɛli Haman, “Niriba maa mini bɛ liɣiri maa zaa nyɛla a dini, niŋm’ bɛ min’ li a ni yu shɛm.”

¹²Dinzuɣu goli ŋun daŋ tooni biɛɣ’ pinaata dali ka Haman daa boli naa gbaŋŋmariba na nti yɛli ba zaligu maa yɛla, ka yɛli ba ni bɛ lɛbigim’ li zuliya kam yɛtɔɣa ni. O daa yɛli ba ni bɛ sabimi li ka di doli bɛ tiŋgbɔŋ maa sabbu soya n-zaŋ li tim ti ti nanim’ mini gomnanim’ ni tuma zuɣulaannim’ zaa. Naa Ahasivɛrɔs yuli ka bɛ daa zaŋ sab’ zaligu gbaŋ maa, ka zaŋ o nintua dalinli dihi di zuɣu.

¹³Ka tuumba daa zaŋ zaligu gbana maa zo n-tahi bɛ tiŋgbɔŋ maa yaɣili kam ni. Yɛtɔɣ’ shɛŋa din daa be gbaŋ maa puuni daa wuhiya ni bɛ ni booni gol’ so Ada[5] gol’ la biɛɣ’ pinaata dali, bɛ kum’ Yɛhudianim’ zaa. Di daa wuhiya ni bɛ kum’ bipola mini ninkura zaŋ tabili paɣiba ni bihi dahin yini. Di daa lan wuhi ni bɛ kum’ ba ka nambɔɣu zɔbu kani, ka zaŋ bɛ ni su shɛlikam.

¹⁴Di daa lan wuhi ni bɛ chɛ ka sokam baŋ yɛtɔɣ’ shɛŋa din be zaligu gbaŋ maa puuni din ni chɛ ka bɛ mali shili gu dindali maa.

¹⁵Ka bɛ daa zaŋ naa zaligu maa moli gili Susa din nyɛ bɛ tinzuɣu maa ni, ka tuumba daa zaŋ di lahibali zo n-tahi yaɣili kam ni. Di saha maa Haman mini naa daa ʒimi nyuri dam, amaa ka Susa tiŋ’ puuninim’ zaa bɛn’ yɛma ŋma.