Read Dagbani Ɛsta 4 Bible Online

Ɛsta 4 - Dagbani bible

Ɛsta 4

¹Mɔdɛkai ni daa baŋ dinkam zaa niŋ maa, ka o suhu daa saɣim, ka o dar’ tɔh’ o situra, ka zaŋ buɣu pili, ka niŋ tampiligim puɣ’ o zuɣu n-yi n-kpe tiŋ’ puuni chani gindi kuhiri fabila kuhigu pampam ni suhusaɣiŋgu.

²O daa niŋla lala hal ti paai nayili samban’ dunol’ ni. O daa bi kpe nayili maa, dama bɛ daa bi saɣiri ka ninvuɣ’ so ŋun pili buɣu zaŋdi li kpɛri nayili.

³Naa zaligu lahibali maa ni daa paai bɛ tiŋgbɔŋ maa yaɣili kam ni, Yɛhudianim’ daa kul kuhirila fabila kuhigu pampam. Di zuɣu ka bɛ daa lo noli n-kum ka fabili, ka bɛ ni niriba pam daa pili buri n-teei do tampiligim ni.

⁴Napaɣ’ Ɛsta duu bihi mini namɔɣilisi ni daa kana ti yɛl’ o Mɔdɛkai yɛla, di daa niŋ o suhusaɣiŋgu pam. Ka o daa bo binyɛra n-ti ni bɛ zaŋ ti ti Mɔdɛkai ka o ye ka chɛ buɣu maa, ka o daa zaɣisi li.

⁵Di saha ka Ɛsta daa boli Hatak ŋun daa nyɛ nayili namɔɣili so naa ni daa zaŋ ti o ni o sɔŋd’ o la na nti yɛl’ o ni o cham’ ti bɔhi Mɔdɛkai nya din niŋ o ni din tahi lala na.

⁶Ka Hatak daa chaŋ Mɔdɛkai sani tiŋ’ puuni pal’ shɛli din daa miri nayili dunol’ la shee.

⁷Ka Mɔdɛkai daa yɛl’ o dinkam niŋ o mini Haman ni daa yɛli ni o ni yo laɣ’ shɛli tariga ka bɛ zaŋ niŋ naa kpanjɔɣu ni, ka chɛ ka bɛ ku Yɛhudianim’ zaa la yɛla.

⁸Ka Mɔdɛkai daa zaŋ zaligu gban shɛli bɛ ni daa sabi Susa n-wuhi ni bɛ kum’ Yɛhudianim’ maa ti Hatak, ka yɛl’ o ni o zaŋm’ li ti wuhi Ɛsta, ka kahigi di yɛla zaa wuh’ o. O daa yɛl’ o, “Yɛlim’ Ɛsta ni o cham’ naa sani nti suh’ o ni o zom’ ŋun’ Ɛsta zuliya nambɔɣu.”

⁹Ka Hatak daa chaŋ ti yɛli Ɛsta Mɔdɛkai ni yɛl’ o shɛm maa.

¹⁰Ka Ɛsta daa zaŋ o ni mali yɛtɔɣ’ shɛli ti o ni o ti yɛli Mɔdɛkai. Ɛsta ni daa yɛli shɛm m-bɔŋɔ:

¹¹“Naa kpambaliba min’ o niriba zaa bɛn be o tiŋgbɔŋ ŋɔ yaɣili kam ni mi ni doo bee paɣa yi kpe naa sani o zɔntua ni ka pa ni ŋuna m-bol’ o, naa zaligu ni wuhi shɛm nyɛla bɛ kum’ dilana. Naɣila o ni kpuɣ’ o salima nam jaaŋgbee la tiri so n-ni tiligi. Goli muni mi n-kul bɔŋɔ ka naa na bi lan boli ma ni n ka o sanna.”

¹²Ka bɛ daa yɛli Mɔdɛkai Ɛsta ni yɛli shɛm.

¹³Di saha ka Mɔdɛkai daa yɛli ba ni bɛ labimi ti yɛli Ɛsta: “Di tɛhiri ni a ni be nayili maa wuhiya ni a ni yi kum ni gari Yɛhudia nir’ kam.

¹⁴A yi shin’ a noli saha shɛli ti ni be ŋɔ ni, sɔŋsim ni yi luɣ’ shɛl’ polo na nti tiligi Yɛhudianima, amaa ka nyin’ lee kpi ka a ba zuliya kpihim. Bee ŋuni n-ni tooi baŋ ni pa lala zuɣu ka a ʒe a ni ʒe zaashe tital’ shɛl’ ni ŋɔ?”

¹⁵Ka Ɛsta daa yɛli ba ni bɛ labimi ti yɛli Mɔdɛkai:

¹⁶“Cham’ ti laɣim Yɛhudianim’ zaa bɛn be Susa ŋɔ n-chɛ ka yi lo noli n zuɣu. Di dinya bee n-nyu shɛli lala dabisi’ muna ata, wuntaŋ’ ni zaŋ tabili yuŋ zaa. Ka m mini n duu bihi gba ni lo noli maa. Di nyaaŋa n ni chaŋ naa sani hal lala ni kul nyɛ din chih’ o zaligu la zaa yoli. Ka lala niŋbu maa yi ni chɛ ka n kpi, n saɣiya ni n kpi.”

¹⁷Ka Mɔdɛkai daa chaŋ ti niŋ Ɛsta ni yɛl’ o ni o niŋ shɛlikam maa zaa.