Read Dagbani Ɛsta 5 Bible Online

Ɛsta 5 - Dagbani bible

Ɛsta 5

¹Nol’ lɔbu maa daba ata dali ka Ɛsta daa zaŋ o nam binyɛra ye n-chaŋ ti kpe n-ʒe nayili zɔŋ ni tuhi nam ʒiishee duu. Naa maa daa ʒila o nam ʒiishee tuhi dunoli.

²O ni daa ti nya Napaɣ’ Ɛsta ka o ʒe zɔŋ maa ni maa, ka o suhu gbaag’ o, ka o kpuɣ’ o salima nam jaaŋgbee din be o nuu ni maa tir’ o. Ka Ɛsta daa chaŋ ti shihi jaaŋgbee maa zuɣu ni.

³Ka naa bɔh’ o, “Napaɣ’ Ɛsta, wula? Bɔ ka a bɔra? N ni ti a a ni bɔri shɛli maa, hal di yi nyɛla n nam ŋɔ pirigili gba, n ni zaŋ li ti a.”

⁴Ka Ɛsta yɛl’ o, “Naa, a yi saɣi, nyin’ chɛ ka a mini Haman kana yuŋ’ ŋɔ nti di bindira ka nyu binnyur’ shɛŋa n ni pun niŋ zali nyin’ naa ŋɔ.”

⁵Ka naa maa daa tim ti boli Haman na yomyom ni bɛ ti niŋ Ɛsta ni bɔri shɛm maa. Ka naa mini Haman daa chaŋ Ɛsta sani ni bɛ ti di ka nyu binnyura maa.

⁶Ka bɛ daa ti ʒiya nyuri wain, ka naa lan yɛli Ɛsta, “Bɔ ka a lee kul bɔra? N ni zaŋ li ti a, hal di yi nyɛla n nam ŋɔ pirigili gba, n ni zaŋ li ti a.”

⁷Ka Ɛsta yɛl’ o, “N ni bɔri shɛli mini n ni yɛn suh’ a shɛli nyɛla:

⁸Nyin’ naa, a yi shiri ni niŋ ma nirilim ka ti ma n ni bɔri shɛli, dindina m bɔri ni a mini Haman sa labina biɛɣuni nti di ka nyu binnyur’ shɛŋa n ni sa yɛn niŋ zali ya. Yi yi sa kana, n sa ni yɛl’ a n ni bɔri shɛli maa.”

⁹Haman ni daa yi bindira dibu mini binnyura nyubu chuɣu maa ni n-kuni yiŋa, o suhu daa kul piɛlimi ka o tɛha gba doya. Amaa o ni daa ti nya Mɔdɛkai ka o ʒi nayili dunol’ ni, ka Mɔdɛkai bi yiɣisi bee n-lu o sizuura la zuɣu daa chɛ ka o suhu yiɣisi pam bah’ o zuɣu.

¹⁰Ka o daa lee shini, ka ŋmaligi baalim kul’ o yiŋa nti tim bol’ o zɔnim’ na, ka bol’ o paɣa Zɛrɛshi na ti pahi bɛ zuɣu.

¹¹Ka ŋun’ Haman daa nyu bara o daazichi min’ o ni mali bidibisi shɛm zuɣu bɛ sani. O daa lan nyu bara zaŋ chaŋ naa ni duh’ o n-zaŋ o zali zaashe’ shɛl’ ni la min’ o ni nyɛ ninvuɣ’ titali n-gar’ o tab’ bɛn nyɛ naa tuma zuɣulaannim’ la gba zuɣu.

¹²Haman daa lan yɛli, “Ka din gari lala nyɛla, n kɔŋko n-nyɛ Napaɣ’ Ɛsta ni boli so pahi naa zuɣu ni ti kana nti di bindira ka nyu binnyura. Hal o lan bol’ ti ni ti sa labina biɛɣuni yaha.

¹³Amaa dimbɔŋɔnim’ zaa ha na kul bi bahi tiɣi n nini, ka di daliri nyɛla n ni na kul nyari Mɔdɛkai ŋun nyɛ Yɛhudia nir’ la ka o ʒiini nayili dunol’ ni la.”

¹⁴Ka Haman paɣa Zɛrɛshi min’ o zɔnim’ maa daa yɛl’ o, “Chɛ ka bɛ sa gar’ dari ka di dubu nyɛ mita pisinaayi. Biɛɣuni asiba, ka a sa yɛli naa ka o chɛ ka bɛ zaŋ Mɔdɛkai yil’ li; ka a suhu paligi; ka a mini naa sa chaŋ ti di ka nyu.” Ka bɛ ni daa yɛli shɛm maa tiɣi Haman nini, ka o chɛ ka bɛ sa gara maa.