Read Dagbani Ɛsta 8 Bible Online

Ɛsta 8 - Dagbani bible

Ɛsta 8

¹Dindali maa ka Naa Ahasivɛrɔs daa zaŋ Haman ŋun daa nyɛ Yɛhudianim’ dim’ maa yiŋa n-ti Napaɣiba kpɛm’ Ɛsta. Ka Ɛsta daa yɛli naa ni Mɔdɛkai nyɛla o dɔɣim. Ka di zuɣu daa chɛ ka Mɔdɛkai nya soli kpɛri naa sani.

²Ka naa daa pirig’ o nintu’ shɛli zuɣu o dalinli ni daa dihi tabili, ka nyɛ o ni daa deei shɛli Haman san’ la ti Mɔdɛkai. Ka Ɛsta daa zaŋ Haman yili maa ti Mɔdɛkai ni o su di fukumsi.

³Ka Napaɣiba kpɛm’ Ɛsta daa lan chaŋ ti teei dɔni naa naba ni n-kuhiri ka suhir’ o ni o yiɣisim’ Haman ŋun yi Agag zuliya ni na ni daa lo nia biɛ’ shɛli zaŋ chaŋ Yɛhudianim’ polo la.

⁴Ka naa daa kpuɣ’ o salima jaaŋgbee la tir’ o.

⁵Ka Ɛsta yiɣisi zani naa maa tooni yɛl’ o, “Di yi tiɣ’ a nini, ka a lo ni a niŋ ma nirilim, ka lan nya ka di tuh’ a sani, nyin’ zalimi zaligu din ni yiɣisi Hamɛdata ŋun yi Agag zuliya ni na la bia Haman ni daa zali zaligu shɛŋa la. Zaligunim’ maa wuhiya ni bɛ kum’ Yɛhudianim’ zaa bɛn be a sulinsi ŋɔ ni.

⁶Dama wula ka n yɛn tooi niŋ ʒiya lihiri n niriba ka mbusim ŋɔ tatabo paai ba? Bee wula ka n yɛn tooi niŋ ʒiya lihiri n dɔɣiriba ka bɛ kuri ba?”

⁷Ka Naa Ahasivɛrɔs daa yɛli Napaɣ’ Ɛsta mini Mɔdɛkai ŋun nyɛ Yɛhudia nir’ maa, “Nyama, m pun chɛ ka bɛ zaŋ Haman yili gar’ dari, o ni daa lo nia biɛ’ shɛli zaŋ chaŋ Yɛhudianim’ polo la zuɣu, ka zaŋ o yiŋ’ ti Ɛsta.

⁸Amaa bɛ ni zaŋ naa yuli n-sab’ zaligu shɛli ka zaŋ o nam fukumsi dalinli dihi di gbaŋ zuɣu ku tooi lan taɣi. Dinzuɣu yi yi bɔra, yin’ zaŋmi n yuli n-sab’ yi ni bɔri ni yi yɛli shɛm zaŋ chaŋ Yɛhudianim’ polo, ka zaŋ n nam fukumsi dalinli dihi di gbaŋ maa zuɣu.”

⁹Ka bɛ daa boli naa maa gbaŋŋmariba na gol’ so ŋun pah’ ata ka bɛ boon’ o Sivan[6] la biɛɣ’ pisinaata dali nti chɛ ka bɛ sab’ gbana kaman Mɔdɛkai ni wuhi ba shɛm zaŋ chaŋ Yɛhudianim’ polo. Bɛ daa sab’ li tila gomnanim’ mini kpambaliba ni tuma zuɣulaannim’ zaa bɛn be bɛ tiŋgbɔŋ maa yaɣa kɔbiga ni pisinaayopɔin la ni. Bɛ daa tari li la India tiŋgbɔŋ ni zaŋ hal ni Itiɔpia tiŋgbɔŋ ni. Bɛ daa sabila gbana maa yaɣili kam polɔnim’ zuliya yɛtɔɣa ni mini bɛ sabbu soli ni nyɛ shɛm ti ba, ka daa sab’ li Yɛhudianim’ gba yɛtɔɣa ni mini bɛ sabbu soli ni nyɛ shɛm ti ba.

¹⁰Naa Ahasivɛrɔs yuli ka Mɔdɛkai daa zaŋ sab’ gbana maa, ka zaŋ ŋun’ naa nintua dalinli dihi di zuɣu n-zaŋ li tim wɔribariba bɛn daa bari nayili wɔrikpaa ni wɔr’ shɛb’ bɛn zɔri pam, ka bɛ zaŋ li tahi.

¹¹Bɛ ni daa sab’ yɛli shɛm gbana maa puuni daa wuhiya ni naa bahi Yɛhudianim’ bɛn be tiŋ’ kam ni noli ni bɛ laɣimmi tuhi fa bɛmaŋa. Di daa lan wuhi ni bɛ tiŋgbɔŋ maa puuni yaɣ’ shɛlikam ni zuliya shɛli niriba yi zaŋ bidibbina kana ti liri ba, bɛn’ tuhim’ ba n-ku bɛ mini bɛ paɣiba ni bɛ bihi ka di bɛ nɛma.

¹²Gol’ so ŋun pahi pinaayi, ka bɛ boon’ o Ada la biɛɣ’ pinaata dali ka bɛ daa yɛn zaŋ zaligu maa tum tuma Naa Ahasivɛrɔs tiŋgbɔŋ maa zaa ni. Dindali maa ka bɛ daa zali ni bɛ kum Yɛhudianim’ maa.

¹³Di daa lan yɛli ni bɛ zaŋm’ yɛl’ shɛŋa din sab’ gbaŋ maa ni n-wuhi ni di nyɛla zaligu, ka chɛ ka sokam ŋun be bɛ tiŋgbɔŋ maa yaɣili kam ni baŋ di yɛla lala. Ka di daa chɛ ka Yɛhudianim’ mali shili gu ni bɛ ti bɔhi bɛ dimnim’ biɛri di dabisili maa dali.

¹⁴Ka naa daa bahi wɔribariba noli, ka bɛ ba nayili yuri bɛn zɔri pam n-zaŋ gbana maa tahi yomyom. Ka bɛ daa zaŋ zaligu maa ni yɛli shɛm moli Susa din nyɛ bɛ tinzuɣu maa puuni.

¹⁵Ka Mɔdɛkai daa ye nam kpariti din nyɛ zaɣ’ sabilifaa, ka piɛlipiɛla ni kpar’ shɛli din nyɛ tangari, ka pili salima zuɣupil’ titali n-yi nayili kuna. Ka niriba daa kab’ doli Susa tiŋ’ puuni solɔri yɔri vuri ni suhupiɛlli.

¹⁶Ka di daa ti Yɛhudianim’ suhupiɛlli mini tahima din wuhi ni bɛ di nasara.

¹⁷Bɛ ni daa karim naa zaligu maa bɛ tiŋgbɔŋ maa yaɣili kam ni mini tiŋ’ kam ni ni luɣ’ shɛlikam zaa, Yɛhudianim’ daa puhila chuɣu ka vuhi dindali maa. Ka zuliya shɛb’ niriba pam daa zaŋ bɛmaŋ’ leei Yɛhudianima. Dama Yɛhudianim’ maa daa leela niriba ni ŋmaligi zɔri shɛba.