Read Dagbani Yibu 1 Bible Online

Yibu 1 - Dagbani bible

Yibu 1

¹Yaakubu bidibisi bɛn mini bɛ malibu daa kuli Ijipti yuya m-bɔŋɔ:

²Rubin mini Simiɔn ni Lɛvi ni Juda

³ni Isaka ni Zɛbulɔn ni Bɛnjamin

⁴ni Dan ni Naftali ni Gaad ni Asha.

⁵Yaakubu zuliya kalinli daa nyɛla ninvuɣ’ pisopɔin: Yisifu ŋun’ daa pun bela Ijipti.

⁶Di nyaaŋa ka Yisifu min’ o mabihi maa ni bɛ ʒiɛman’ ni niriba zaa daa ti kpi.

⁷ Amaa ka Izraɛlnim’ maa daa dɔɣi bihi n-nabi ka yɛligi pam, ka mali yaa m-pali Ijipti tiŋgbɔŋ maa ni zaa.

⁸ Ka na’ palo daa ti di Ijipti, ŋun’ daa bi mi Yisifu.

⁹Ka ŋun’ daa yɛl’ o niriba, “Nyamiya, Izraɛlnim’ ŋɔ zooya, ka lan mali yaa gari ti.

¹⁰ Chɛliya ka ti bo so’ shɛli din ni chɛ ka bɛ ku lan nabi. Di yi pa lala ti mini ti dimnim’ yi ti yɛn tuhi, bɛ ni pahi ti dimnim’ maa zuɣu tuhi ti ka nya soli zo n-yi ti tiŋgbɔŋ ŋɔ ni.”

¹¹Dinzuɣu ka bɛ daa bo tuma zuɣulaannim’ ti ba ni bɛ chɛ ka bɛ tum tuun’ kpɛma hal ka bɛ shia ti yi bɛmaŋ’ ni, ka daa chɛ ka bɛ me Firawuna nɛma zaashee fɔntinsi ti o Pitom mini Ramɛsis.

¹²Amaa bɛ ni daa kul niŋdi ba fitiina shɛm, lala ka bɛ zuliya maa daa kul nabiri ka yɛligiri pahira. Ka jɛlinsi mini dabiɛm daa kpe Ijiptinim’ maa suhuri ni zaŋ chaŋ bɛ polo.

¹³Ka Ijiptinim’ daa muɣisiri ba ka bɛ tumdi tuun’ kpɛma.

¹⁴Bɛ daa chɛ ka Izraɛlnim’ maa nɔrila tandi, ka ŋmari bilichiisi, ka tumdi bɛ puri ni tuma zaa, ka lan muɣisiri ba ka bɛ tumdi tuun’ kpɛma ni di chɛ ka biɛhigu niŋ ba tom.

¹⁵Ka Ijipti naa maa daa ti lan yɛli Hiburunim’ maa paɣidɔɣisɔtɔɣindiba bɛn yuya daa booni Shifira mini Pua,

¹⁶“Hiburu paɣ’ yi lan yɛn dɔɣi ka yi chaŋ ni yi ti deei bia, ka nya ka bia maa nyɛla bidibiga, yin’ kumiy’ o, amaa di yi nyɛ bipuɣiŋga, yin’ chɛliy’ o.”

¹⁷Amaa ka paɣidɔɣisɔtɔɣindiba maa daa zɔri Naawuni ka bi niŋdi Ijipti naa ni daa yɛli ni bɛ niŋm’ shɛm maa, bɛ daa bi kuri bidibbihi maa.

¹⁸Ka Ijipti naa maa daa ti boli paɣidɔɣisɔtɔɣindiba maa na ti bɔhi ba, “Wula ka yi bi kuri bidibbihi maa ka chɛ ba?”

¹⁹Ka paɣidɔɣisɔtɔɣindiba maa daa yɛli Firawuna, “Hiburu paɣiba bɛn’ bi be kaman Ijipti paɣiba ni be shɛm, bɛ mali yaa pam. Paɣidɔɣisɔtɔɣinda ti yɛn paai ka bɛ pun dɔɣi.”

²⁰Ka Naawuni daa zaŋ o nuu pa paɣidɔɣisɔtɔɣindiba maa zuɣu, ka niriba maa daa lan nab’ pahi ka niŋ yaa.

²¹Paɣidɔɣisɔtɔɣindiba maa ni daa zɔri Naawuni maa zuɣu ka Naawuni daa ti ba bɛ dahalali bihi.

²² Di saha ka Firawuna daa wuh’ o niriba maa zaa, “Hiburunim’ maa yi lan dɔɣi bidibiga, yin’ zaŋm’ o ti lɔhi Nail Mɔɣili ni, amaa chɛliya bipuɣinsi bɛna.”