Read Dagbani Yibu 13 Bible Online

Yibu 13 - Dagbani bible

Yibu 13

¹Ka Yawɛ daa yɛli Musa,

² “Zaŋmiya bidib’ tuuli kam ti ma. Bɛ ni kul tuui dɔɣi binshɛɣukam ka o nyɛ zaɣ’ lɔɣu, ninsal’ bee biŋkɔbigu Izraɛlnim’ sunsuuni nyɛla n dini.”

³Ka Musa daa yɛli niriba maa, “Di simdi ka yi teeri dabisili ŋɔ yɛla, di nyɛla yi ni daa yi Ijipti tiŋgbɔŋ ni dahin’ shɛli ka yi dabitim bandi ni la, dama Yawɛ yiko nuu n-daa yihi ya nimaani maa. Di bi simdi ka yi ŋubi bɔrɔbɔro din mali dabindi.

⁴Zuŋɔ dabisili ŋɔ, Abib goli ŋɔ ni ka yi yɛn yi.

⁵Ka Yawɛ yi ti zaŋ ya tahi Keenannim’ mini Hitinim’ ni Amɔrinim’ ni Hivinim’ ni Jɛbusinim’ tiŋgban’ shɛli o ni daa lo yi yaannim’ alikauli ni o ni zaŋ tin ya, ka di nyɛ tiŋgban’ shɛli din mali bihim mini shiri pam la, yin’ puhimiya di chuɣu maa goli maa ni.

⁶Di simdi ka yi ŋubiri bɔrɔbɔro din ka dabindi hal ni daba ayopɔin dali. Daba ayopɔin maa dali, di simdi ka yi puhiri Yawɛ chuɣu maa.

⁷Yi ni ŋubi bɔrɔbɔro din ka dabindi daba ayopɔin di dabisa maa ni. Di bi simdi ka yi chɛ ka so nya dabindi bɔrɔbɔro yi sani yi biɛhigu shee zaa.

⁸Dindali maa, yɛlimiya yi bihi Yawɛ ni daa niŋ shɛlikam zaa tin ya shɛm saha shɛli yi ni daa yi Ijipti na la, di zuɣu ka yi puhiri di chuɣu maa.

⁹Ka di ti leei shihirili shɛli din yɛn lo yi nuu ni, ka be yi gbɛri zuɣu n-chɛ ka yi teeri di yɛla din ni chɛ ka Yawɛ zaligu maa yɛla kul be yi noya ni, dama Yawɛ yiko nuu ka o daa zaŋ yihi ya Ijipti tiŋgbɔŋ ni.

¹⁰Di simdi ni yi puhiri di chuɣu maa di puhibu saha yuuni kam.”

¹¹“Ka Yawɛ yi ti zaŋ ya tahi Keenannim’ tiŋgbɔŋ maa ni nti zaŋ li tin ya kaman o ni daa lo yi mini yi yaannim’ alikauli shɛm la,

¹² yin’ ti zaŋmiya bɛ ni tuui dɔɣi bi’ shɛba zaa ti Yawɛ. Yi biŋkɔbiri ni tuui dɔɣi zaɣilɔ’ shɛb’ zaa nyɛla Yawɛ dini.

¹³Amaa buŋdibbil’ tuuli kam, yin’ zaŋmiya piɛɣu zal’ o zaani, ka yi yi bi niŋ lala, dindina yin’ ŋmɛlimiya kab’ o nyiŋgoli. Di simdi ni yi zaŋ binshɛli taɣi yi tuuli bidibisi n-tiligi ba.

¹⁴Ka a bia yi ti bɔh’ a daliri shɛli din chɛ ka a doli zaligu maa, nyin’ yɛlim’ o, ‘Ti ni daa nyɛ daba be Ijipti tiŋgbɔŋ ni la, Yawɛ n-daa zaŋ o nuu din mali kpiɔŋ n-yihi ti dabitim ni, lala zuɣu ka ti doli zaligu maa.

¹⁵Dama Firawuna ni daa niŋ tipawumli ka zaɣisi ni o ku chɛ ka ti yi o tiŋgbɔŋ ni chaŋ la, ka Yawɛ daa ku binshɛɣukam ni tuui dɔɣi bi’ shɛb’ zaa, ninsalinim’ zaŋ tabili biŋkɔbiri zaa, o daa ku bɛ ni tuui dɔɣi bi’ shɛba, dinzuɣu ka n zaŋdi binshɛɣukam ni tuui dɔɣi bi’ shɛb’ zaa m-maani sara tir’ o maa. Amaa m bihi bɛna, n zaŋla binshɛli zali bɛ zaani.

¹⁶Di simdi ka di ti leei shihirili be yi nuhi ni mini yi gbɛri zuɣu, dama Yawɛ daa zaŋla o yiko nuu yihi ti Ijipti tiŋgbɔŋ ni na.’ ”

¹⁷Firawuna ni daa chɛ ka Izraɛlnim’ maa yi o tiŋgbɔŋ maa ni, Naawuni daa bi zaŋ ba doli Filistianim’ tiŋgbɔŋ polo, nimaani polo ni daa nyɛ so’ jia maa zaa yoli, dama Naawuni daa yɛlimi, “Tɔbu yi ŋme niriba maa, bɛ tɛha ni taɣi ka bɛ zo n-labi Ijipti.”

¹⁸Dinzuɣu ka o daa zaŋ ba golimgolim tiŋgban’ nɛli ni kpa Teeku Ʒiɛɣu polo. Izraɛlnim’ daa lola tɔbu n-yi Ijipti tiŋgbɔŋ maa ni.

¹⁹ Ka Musa daa zaŋ Yisifu kɔba m-mali chaŋ kaman ŋun’ Yisifu ni daa chɛ ka Izraɛlnim’ po pɔri ni bɛ ni niŋ shɛm la. Dama Yisifu daa yɛli ba, “Naawuni yi ti ka yaŋɔ tiŋgbɔŋ ŋɔ ni na ti tiligi ya, ka yi yɛn chaŋ, yin’ zaŋmiya n kɔba mali chaŋ.”

²⁰Ka bɛ daa yiɣisi Sukɔt n-chaŋ ti dɔni Itam tiŋgban’ nɛl’ naŋgbaŋgbiriŋ.

²¹Biɛɣu daa yi neei, Yawɛ chɛrimi ka sagban’ daantaliga be bɛ tooni n-wuhiri ba soli, yuŋ mi daa yi ti zibi, o chɛrimi ka buɣim daantaliga be bɛ tooni n-ne ba din ni chɛ ka bɛ chani yuŋ ni wuntaŋ’ ni zaa.

²²Ka sagban’ daantaliga din daa be niriba maa tooni wuntaŋ’ ni la mini buɣim daantaliga din daa be bɛ tooni yuŋ la daa na ʒi n-zo bɛ sani.