Read Dagbani Yibu 15 Bible Online

Yibu 15 - Dagbani bible

Yibu 15

¹ Di saha ka Musa mini Izraɛlnim’ maa daa yili yilli ŋɔ m-paɣiri Yawɛ yɛra: “N ni yili yila paɣi Yawɛ, dama o di nasara din mali jilima; o daai wɔribara min’ o wɔhu niŋ teeku ni.

² Yawɛ n-nyɛ n kpiɔŋ ŋuna n-lan nyɛ n yaa. Ŋuna n-nyɛ ŋun ti ma tiliginsim. Ŋuna n-nyɛ n Naawuni, ka n ni paɣir’ o. O nyɛla n yab’ Naawuni, ka n ni duh’ o pam.

³Yawɛ nyɛla ŋun tuhiri tɔbu. O yuli n-shiri nyɛ Yawɛ.

⁴“Firawuna chɛchɛbunsi min’ o tɔbbihi zaa ka o zaŋ niŋ teeku ni, ka o sapashin’ kpɛma zaa shim Teeku Ʒiɛɣu ni.

⁵Teeku bulli vali ba, ka bɛ siɣi kɔtiŋ’ kaman kuɣili la.

⁶“Yawɛ, a nudirigu mali yiko ni jilima. Yawɛ, a nudirigu ka a zaŋ dari tɔh’ a dim’ bahi.

⁷A nam dariza din galisi pam ŋɔ puuni ka a ŋme m-paag’ a dimnima. Nyini n-daa chɛ ka a suhuyiɣisili di ba zaa kaman mɔ’ kuma ka bɛ chɛ n-sɔŋ ka buɣim di li la.

⁸A nyɛvoya ni pɔhim daa kahi kom duhi, ka kɔgbana daa yiɣisi zani zuɣusaa, ka teeku bulli maa sunsuuni daa kpaŋ diɣinli.

⁹Ka dim’ maa daa yɛli, ‘N ni kari gbahi ba; n ni di bɛ nɛma, ka zaŋ n ni bɔri shɛlikam. N ni zaŋ n nuu ŋooi takɔbi n-ku ba.’

¹⁰Amaa ka a daa lan pɔbisi a pɔhim, ka teeku kom lim ba, ka bɛ shim ko’ tiŋa kaman kurigu n-lu kopurim ni la.

¹¹“Yawɛ, wun’ ŋuni n-lee lan ŋman’ a? Ŋun nam dariza min’ o kasitali n-lee ŋman’ a, ka o yɛla mali dabiɛm ni jilima, ka o tumd’ alahiziba tuma?

¹²Nyini n-daa teeg’ a nudirigu tiri, ka tiŋgbani vali ba.

¹³A yurilim din ka bahigu puuni ka a daa zaŋ a ni tiligi ninvuɣ’ shɛb’ maa chaŋ. A yiko ka a daa zaŋ wuhi ba soli ka bɛ chaŋ ti ʒini tiŋgbɔŋ kasi la ni.

¹⁴Ka niriba daa wum di yɛla ka bɛ niŋgbuna sɔhira. Ka dabiɛm daa gbahi Filistianima.

¹⁵Ka di daa gari Ɛdom nanima; ka Mɔab zuɣulaannim’ niŋgbuna sɔhira ka Keenannim’ zaa kɔba ni chɔɣisi.

¹⁶Dabiɛm’ mini suhuchihibo n-daa lu bɛ zuɣu. A nuu din galisi ŋɔ zuɣu, bɛ kul fomi doya chichi kaman kuɣili la hal ka nyin’ Yawɛ niriba ti gari; hal ka a ni daa tiligi ninvuɣ’ shɛb’ la ti gari.

¹⁷Nyini n-daa zaŋ ba na ti ʒil’ amaŋmaŋ’ zoli zuɣu, nyini Yawɛ ni pii luɣ’ shɛli n-leeg’ a biɛhigu shee la. Nyin’ Yawɛ ni zaŋ amaŋmaŋ’ nuhi me a jɛmbu du’ shɛl’ la ni.

¹⁸Nyin’ Yawɛ kul ni su nam hal ni saha din ka bahigu.”

¹⁹Firawuna yuri min’ o chɛchɛbunsi ni o chɛchɛbunduhiriba la ni daa siɣi teeku maa puuni, ka Yawɛ daa chɛ ka teeku maa kom’ lan nahi taba n-lim ba, amaa Izraɛlnim’ maa bɛn’ daa dolila teeku tiŋ’ kuŋ zuɣu ti du.

²⁰Ka Miriam ŋun daa nyɛ anabi ka nyɛ Aduna tizɔpaɣ’ la daa zaŋ guŋgombil’ din mali chaɣisa, ka paɣiba zaa daa zaŋ guŋgombihi din mali chaɣisa n-yi nti pah’ o zuɣu wari waa.

²¹Ka Miriam daa yiini yila yɛra: “Yilimiya yila paɣi Yawɛ, dama o di nasara din mali jilima, ka daai wɔribara min’ o wɔhu zaa niŋ teeku ni.”

²²Di saha ka Musa daa zaŋ Izraɛlnim’ maa Teeku Ʒiɛɣu duli n-chaŋ ti kpe Shur tiŋgban’ nɛli ni, ka bɛ daa chaŋ dabisi muna ata chandi ka bi nya kom.

²³Ka bɛ daa ti paai Mara nti kɔŋ di kom nyubu, dama di daa tomi, di zuɣu ka bɛ daa boli nimaani yuli Mara.[8]

²⁴Ka niriba maa daa ŋumdi bɛ kparima ni niŋdi Musa ka bɔhir’ o, “Bɔ ka ti yɛn nyu?”

²⁵Ka o daa suhi Yawɛ, ka Yawɛ wuh’ o ti’ shɛli wulli ka o daa zaŋ li na ti lɔhi kom maa ni, ka di niŋ nyaɣisim. Nimaani ka Yawɛ daa zali ba zaligu, ka zahim ba,

²⁶ka yɛli ba, “Yi yi taɣi deei man’ Yawɛ ŋun nyɛ yi Naawuni ŋɔ yɛligu, ka gbib’ li viɛnyɛliŋga, ka tumdi din tuhi, ka doli n zaligunim’ mini zaligu shɛŋa dim pahi zaa, dindina n ku chɛ ka alɔbo shɛli din daa lu Ijiptinim’ zuɣu la lu yi zuɣu, dama mani n-nyɛ Yawɛ ŋun tibiri ya.”

²⁷Ka bɛ daa yi nimaani chaŋ Ɛlim, ka kɔbilisi pinaayi mini abie tihi pisopɔin daa be nimaani, ka bɛ daa dɔni nimaani m-miri kom maa.