Read Dagbani Yibu 22 Bible Online

Yibu 22 - Dagbani bible

Yibu 22

¹“Nir’ yi zu nahu bee piɛɣu nti kɔhi bee nti kɔrigi, di simdi ka o yo niɣ’ anu naɣ’ yino maa zuɣu, ka yo piɛr’ anahi piɛ’ yino maa zuɣu. Di simdi ka o yo di samli maa, ka o yi ka binshɛli din ni yo samli maa, dindina bɛn’ kɔhim’ o n-yo o zubu maa samli.

²Ka o ni zu biŋkɔb’ so maa yi na ne m-be o sani, di yi nyɛla nahu bee buŋa bee piɛɣu, dindina di simdi ka o yo biŋkɔbir’ ayi zaɣ’ yino kam zuɣu. “Ka tayiɣ’ yi kabiri so yiŋ’ dunoli yuŋ ni o kpe, ka bɛ nya o n-ŋme n-ku o, dindina o ʒim yihibu ka taali, amaa di yi nyɛla wuntaŋ’ puhibu nyaaŋa, dindina o ʒim yihibu mali taali.

⁵“So yi chɛ ka o biŋkɔbiri ŋub’ so puu ni binyɛra bee o wain tihi puu bee n-chɛ o biŋkɔbigu bahi ka o chaŋ so puu ni nti ŋub’ o bindira, di simdi ka dilan’ zaŋ o puu ni bindira din niŋ viɛnyɛliŋga bee o wain tihi din wali viɛnyɛliŋga yo di samli.

⁶“So yi mali buɣim ka di looi mɔɣu n-chaŋ ti di bɛ ni chɛ bindir’ shɛŋa sɔŋ bee bɛ ni na bi chɛ bindir’ shɛŋa bee n-di so puu zaa, di simdi ni ŋun mali buɣim maa yo di zuɣu zaa.

⁷“So yi zaŋ liɣiri bee binshɛli nti puh’ o kpee sɔŋbu, ka bɛ zu bini maa dilan’ yiŋa, ka bɛ gbaai tayiɣ’ maa, di simdi ka tayiɣ’ maa yo bini maa zuɣu ʒii buyi.

⁸Ka bɛ yi bi gbaai tayiɣ’ maa, dindina di simdi ka yili maa lana chaŋ Naawuni sani nti wuhi kaman o nuu tim o kpee maa daazichi maa ni bee di bi tim.

⁹“Dama naŋgbankpeeni kam zaa puuni, di yi nyɛla nahu bee buŋa bee piɛɣu bee situra bee binshɛli din bɔrigi yɛla, ka yino yɛli, ‘Di nyɛla n dini.’ Di dihi tabili nyɛla, bɛ niriba ayi maa bɛn’ zaŋmi bɛ yɛtɔɣa maa chaŋ Naawuni sani, Naawuni yi ti yɛli ni so ka yɛlimaŋli, dilan’ ni yo o kpee maa bini maa ʒii buyi zuɣu.

¹⁰“So yi zaŋ o buŋa bee o nahu bee o piɛɣu bee o biŋkɔb’ so ti o kpee ni o zali, ka biŋkɔbigu maa ti kpi bee n-nya daŋa bee bɛ taɣ’ o pah’ o tab’ ni chaŋ ka so bi nya o,

¹¹dindina di simdi ka bɛ niriba ayi maa chaŋ Yawɛ sani, ka o ti po pɔri wuhi ni o nuu bi tim o kpee maa azichi maa ni, ka di simdi ni biŋkɔbigu maa lan’ saɣi pɔri maa, ka samli yɔbu lan kani.

¹²Amaa di yi nyɛla bɛ zula biŋkɔbigu maa dilan’ sani, dindina di simdi ni o yo o zuɣu.

¹³Ka mɔɣu ni biŋkɔbiri yi gbaai biŋkɔbigu maa, di simdi ka o zaŋ o chɛra na ti wuhi shɛhira, ka di bi simdi ni o yo mɔɣu ni biŋkɔbiri ni gbaai biŋkɔb’ so maa zuɣu.

¹⁴“Ka so yi paŋ biŋkɔbigu o kpee sani, ka biŋkɔbigu maa ti kpi bee n-nya daŋa, ka bindana maa kani, di simdi ka ŋun paŋ o maa yo o samli zaa;

¹⁵ka bindana maa yi beni, dindina samli yɔbu kani; ka di yi nyɛla o haayila biŋkɔbigu maa, dindina haayibu liɣiri maa ni zani biŋkɔbigu maa zaani.”

¹⁶“Do’ so yi niŋ marisamarisa n-zaŋ paɣipiɛl’ so bɛ ni bi zaŋ ti doo dɔni, di simdi ka o yo paɣ’ maa paɣibɔr’ liɣiri zaa, ka kpuɣ’ o niŋ o paɣa.

¹⁷ Amaa paɣ’ maa ba yi zaɣisi zaa ni o ku zaŋ o bia maa ti doo maa, di simdi ka doo maa yo paɣipiɛliga bɔbu liɣiri ti paɣ’ maa ba.

¹⁸ “Paɣ’ kam ŋun nyɛ sɔnya, yin’ kum’ o.

¹⁹ “Ŋunkam chɛ ka o mini biŋkɔbigu dɔni, yin’ kum’ o.

²⁰ “Ŋunkam mali maligu ti buɣili ka pa ni Yawɛ kɔŋko, yin’ kum dilana.

²¹“Miriya ka yi niŋ sana zaɣ’ biɛɣu bee n-niŋ o fitiina, dama yi gba daa nyɛla saamba be Ijipti tiŋgbɔŋ ni.

²² Di niŋdiya pakoli kam bee kpibiga alaka.

²³Dama yi yi niŋdi ba alaka ka bɛ fabili niŋ ma, biɛhiŋ kani, n ni gbilisi tibili wum bɛ fabila maa,

²⁴ka chɛ ka n suhu yiɣisi bahi yi zuɣu, ka n chɛ ka bɛ zaŋ takɔbi kun ya, ka yi paɣiba kpalim pakoya, ka yi bihi gba leei kpibisi.

²⁵ “Yi yi zaŋ liɣiri paŋ n niriba bɛn be yi ni ŋɔ nandaan’ so, yin’ di zaŋ yimaŋ’ leeg’ o sandihiriba, yi mi miriya ka yi chɛ ka o niŋ ya nyɔri di zuɣu.

²⁶Ka yi yi deei so chinchini sɔŋ pɔi ka naanyi zaŋ o ni bɔr’ shɛli paŋ o, yin’ labisim li ti o pɔi ka wuntaŋ’ naanyi lu,

²⁷ dama di kɔŋko n-nyɛ o ni mali shɛli pinda, ka bɔ ka o ti yɛn zaŋ pili gbihi? O yi fabili niŋ ma, n ni wum o fabila maa, dama n nyɛla nambɔzɔra.

²⁸ “Miriya ka yi yɛli Naawuni yɛtɔɣ’ yoya bee n-tu yi niriba toondana.

²⁹“Zaŋmiya yi puu ni bindir’ tuuli mini yi puu ni tiwala kom na ti ti ma di tibu saha, ka di niŋya zinchili. “Zaŋmiya yi bidib’ tuuli kam ti ma.

³⁰Lala ka di lan simdi ni yi zaŋ yi naɣilabil’ tuuli bee yi biŋkɔbbaligu bi’ tuuli kam ti ma. O ni be o ma sani daba ayopɔin, ka dabisi’ shɛli din pahir’ anii dali, di simdi ka yi zaŋ o ti ma.

³¹ “Yi nyɛla ninvuɣ’ gahinda, ninvuɣ’ shɛb’ bɛn be kasi n sani. Miriya ka yi ŋubi mɔɣu ni biŋkɔbiri ni ku binshɛli, di simdi ni yi zaŋ li tila bahi.”