Read Dagbani Yibu 27 Bible Online

Yibu 27 - Dagbani bible

Yibu 27

¹“Zaŋmiya gɔpiɛliga dari mali sara maligu bimbini, ka di wɔɣilim nyɛ mita ayi ni biɛla, ka di yɛliŋ nyɛ mita ayi ni biɛla, ka di dubu nyɛ mita yini ni biɛla. Malimiya li zaɣ’ mɔɣu,

²ka mali binyila tam di tarisi bunahi zuɣu, ka di mini di binyila maa zaa nyɛ zaɣ’ yini, ka yi ti niŋ daanya pa di zuɣu.

³Mɛmiya duɣuri n-zaŋdi tampiligim niŋdi di puuni, ka mali soobuya mini taha ni dirijaba ni lahi din ni niŋdi buɣim. Di simdi ka yi ti zaŋ daanya mali di lahi mini duɣuri zaa.

⁴Zaŋmiya daanya mali kurupooti, ka zaŋ daanya mali bans’ anahi niŋ di tarisi bunahi zuɣu.

⁵Ka yi ti zaŋ li zali sara maligu bimbini naŋgbaŋkuɣila la lɔŋni, ka di du m-paai sara maligu bimbini maa pirigili tariga zaŋ siɣi tiŋ’ polo.

⁶Ka yi mali gɔpiɛliga dapuhi, ka niŋ daanya pa di zuɣu,

⁷ka zaŋ li tu bansi maa ni din ni chɛ ka dapuhi maa be sara maligu bimbini maa yaɣ’ ayi polo saha shɛli yi yi ti ʒiri li chana.

⁸Zaŋmiya dari mali sara maligu bimbini maa, ka di puuni nyɛ zaɣ’ yɔɣu. Malimiya li kaman n ni daa wuh’ a shɛm zoli zuɣu la.”

⁹“Di simdi ka yi mali m biɛhigu shee dundɔŋ ka zaŋ tan’ piɛl’ viɛlli din ŋmɛliŋmɛli n-she pateesanim’ din wɔɣilim nyɛ mita pihinahinaanahi n-yil’ li zaŋ labi nudirigu polo.

¹⁰Di simdi ka di mali daanya daantalisi pisi mini di ni yɛn tam binshɛŋa zuɣu pisi, amaa ban’ shɛŋa din yɛn yili daantalisi maa mini di dapuhi dina, zaŋmiya anzinfa mal’ li.

¹¹Ka di nuzaa polo gba ni ti mali pateesanim’ din wɔɣilim nyɛ mita pihinahinaanahi ka di daantalisi pisi mini di ni yɛn tamdi binshɛŋa zuɣu pisi la ti nyɛ daanya, amaa ban’ shɛŋa din yɛn yili daantalisi maa mini yi ni yɛn zaŋ binshɛŋa lɔri li la dina, zaŋmiya anzinfa mal’ li.

¹²Dundɔŋ maa yɛliŋ zaŋ labi wulinluhili polo, di simdi ka di ti mali pateesanim’ din wɔɣilim nyɛ mita pisinaayi yil’ li, ka di mali daantalisi pia mini di ni yɛn tamdi binshɛŋa zuɣu.

¹³Dundɔŋ maa yɛliŋ zaŋ labi wulimpuhili polo gba, di simdi ka di nyɛla mita pisinaayi.

¹⁴Ka pateesa’ shɛŋa din yɛn yili dunɔdali yaɣ’ yini polo wɔɣilim ti pooi mita ayopɔin biɛla, ka di ti mali daantalis’ ata mini di ni yɛn tamdi binshɛŋa zuɣu diba ata.

¹⁵Ka yaɣ’ din’ la gba mali pateesa’ shɛŋa din wɔɣilim nyɛ mita ayɔbu ni pirigili, ka mali daantalis’ ata mini di ni yɛn tamdi binshɛŋa zuɣu diba ata.

¹⁶Di simdi ka dundɔŋ maa dunɔdali ti mali pateesa’ shɛli din nyɛ tan’ piɛl’ viɛlli din ŋmɛliŋmɛli ka di wɔɣilim nyɛ mita awɛi, ka yi zaŋ gali sabilifaa mini gali ʒiɛkpeein ni gali ʒiɛkpain ni tan’ piɛli viɛlli din ŋmɛliŋmɛli n-zaŋ shɛriga wuɣi binyɛra pa di zuɣu ka di ti mali daantalis’ anahi mini di ni yɛn tamdi binshɛŋa zuɣu diba anahi.

¹⁷Di simdi ka yi ni yɛn zaŋ binshɛŋa lo daantalisi din gili dundɔŋ maa zaa ti nyɛla anzinfa ka di bansi ti nyɛ anzinfa, ka di ni yɛn tamdi binshɛŋa zuɣu ti nyɛ daanya.

¹⁸Dundɔŋ maa wɔɣilim ni ti nyɛla mita pihinahinaanahi, ka di yɛliŋ nyɛ mita pisinaayi, ka di dubu mi nyɛ mita ayi ni biɛla, ka yi ti zaŋ tan’ piɛl’ viɛlli din ŋmɛliŋmɛli pateesa yil’ li, ka di ni yɛn tamdi binshɛŋa zuɣu ti nyɛ daanya.

¹⁹Ka m biɛhigu shee maa duɣuri mini di lahi zaa zaŋ tabili di kpahi mini dundɔŋ maa kpahi zaa ti nyɛ daanya binyɛra.”

²⁰“Zalim’ Izraɛlnim’ ka bɛ bɔri olivi kpa’ viɛlli na nti niŋdi firila ni din ni chɛ ka firila maa kul ne n-ʒiɛya sahakam.

²¹Aduna min’ o bidibisi nti yɛn nyɔri firila maa zaani Yawɛ tooni Yawɛ chirigibu shee suɣili maa puuni pateesa din be Alikauli Adaka tooni polo la kpaŋa zaawuni hal ni asiba. Di ni ti nyɛla zaligu shɛli din kul ni beni sahakam, ka di simdi ni Izraɛlnim’ ti dol’ li ʒiɛmani kam ni.”