Read Dagbani Yibu 29 Bible Online

Yibu 29 - Dagbani bible

Yibu 29

¹“A ni yɛn niŋ shɛm mali Aduna min’ o bidibisi ka bɛ tooi tum maligumaaniba tuma ti ma m-bɔŋɔ: Zaŋmi naɣila’ polli mini piɛlah’ ayi bɛn ka galimi

²ni bɔrɔbɔro din ka dabindi ni bɛ ni zaŋ kpam ŋɔri maha shɛŋa din ka dabindi ni karikaasi din ka dabindi, ka bɛ niŋ kpam pa di zuɣu. Zaŋmi alikama zim viɛlli mali di zaa.

³Ka a ti zaŋ di zaa niŋ piɛ’ yin’ ni n-zaŋ di mini naɣilaa maa mini piɛlah’ ayi maa na.

⁴“Di nyaaŋa ka a zaŋ Aduna min’ o bidibisi maa n-ka Naawuni min’ o niriba laɣiŋgu suɣili shee dunol’ ni na nti chɛ ka bɛ su kom.

⁵Ka a zaŋ binyɛra yɛli Aduna. Dina n-nyɛ: zabbanim’ mini alichɛbba ni binyɛribil’ din yɛri pari zuɣusaa ni nyolɔrigu; ka zaŋ binyɛribil’ din yɛri pari zuɣusaa la shɛlɔrigu lo o.

⁶Ka a zaŋ bantabiga vil’ o, ka zaŋ zuɣupil’ shɛli din be kasi pil’ o pa bantabiga maa zuɣu.

⁷Di nyaaŋa ka a zaŋ bɛ ni boori kpa’ shɛli bahiri niriba zuɣuri ni la m-booi bah’ o zuɣu ni,

⁸ka zaŋ o bidibisi maa na nti zaŋ zabbanim’ yɛli ba;

⁹ka zaŋ shɛlɔriti lo bɛ shɛhi ni, ka zaŋ zuɣupila pili ba; ka maligumaanitali maa leei bɛ dini sahakam. A ni ti yɛn zaŋ Aduna min’ o bidibisi maa leei maligumaaniba shɛm m-bala.

¹⁰“Dimbɔŋɔ nyaaŋa, ka a zaŋ naɣilaa maa ka Yawɛ chirigibu shee suɣili maa samban’ ni na nti chɛ ka Aduna min’ o bidibisi maa zaŋ bɛ nuhi pa naɣilaa maa zuɣu ni,

¹¹ka a naanyi kɔrig’ o Yawɛ tooni Yawɛ chirigibu shee suɣili maa dunol’ ni,

¹²ka zaŋ a nubil’ suɣi naɣilaa maa ʒim n-zaŋ niŋ sara maligu bimbini binyila la; ka kpaai ʒi’ shɛli din kpalim sɔŋ sara maligu bimbini ni tam binshɛŋa zuɣu la lɔŋni.

¹³Ka a ti yihi kpa’ shɛli din zaa be naɣilaa maa binnyɔri ni mini binsaba ni yaannina mini kpam din be di ni n-zaŋ li nyo buɣim sara maligu bimbini maa zuɣu.

¹⁴Amaa naɣilaa maa nimdi min’ o gbaŋ ni o nyɔri dina, zaŋm’ li yi yi sansani maa kpaŋa nti nyo li buɣim, dama din’ nyɛla alahichi sara maligu.

¹⁵“Di nyaaŋa ka a zaŋ piɛla’ yino n-chɛ ka Aduna min’ o bidibisi maa zaŋ bɛ nuhi pa o zuɣu ni,

¹⁶ka a kɔrig’ o n-zaŋ o ʒim kpaai vie sara maligu bimbini maa luɣilikam zaa.

¹⁷Ka ŋmahi piɛlaa maa, ka paɣ’ o nyɔri min’ o biɛhi n-zaŋ li pahi nimdi maa mini binzuɣu la zuɣu

¹⁸ n-nyo di zaa buɣim sara maligu bimbini maa zuɣu, dama di nyɛla sara shɛli bɛ ni zaŋdi nyɔri buɣim tiri Yawɛ ka di nyom nyɛ din tiɣir’ o nini.

¹⁹“Dimbɔŋɔ nyaaŋa ka a lan zaŋ piɛla’ ŋun’ la na nti chɛ ka Aduna min’ o bidibisi maa zaŋ bɛ nuhi pa o zuɣu ni,

²⁰ka a kɔrigi piɛlaa maa, ka zaŋ o ʒim shɛli n-laɣi Aduna min’ o bidibisi maa nudiriti tib’ nyaɣa mini bɛ nudiriti nubihilɔri ni bɛ nudiriti napombihilɔri, ka kpaai ʒi’ shɛli din kpalim vie sara maligu bimbini maa luɣilikam zaa.

²¹Ka a zaŋ ʒim din be sara maligu bimbini maa zuɣu maa mini kpa’ shɛli bɛ ni boori bahiri niriba zuɣuri ni la m-mihi Aduna min’ o binyɛra ni o bidibisi maa mini bɛ binyɛra din ni chɛ ka o min’ o binyɛra maa be kasi, ka o bidibisi maa mini bɛ binyɛra gba be kasi.

²²“Di simdi ka a ti zaŋ piɛlaa maa kpam min’ o zuli ni kpam ni o nyɔri kpam ni o saba ni o yaannina ayi ni di kpam ni o nudirigu gbalipuɣili, dama o nyɛla maligumaaniba leebu piɛlaa.

²³Ka a yihi bɔrɔbɔro din ka dabindi din be piɛɣu puuni n-ʒe Yawɛ tooni la zaɣ’ kpil’ yini mini maha din mali kpam zaɣ’ yini ni karikaasi zaɣ’ yini,

²⁴n-zaŋ di zaa niŋ Aduna min’ o bidibisi maa nuhi ni, ka zaŋ bɛ nuhi maa gahigahi zuɣusaa, ka di leei nuhi gahibu sara Yawɛ sani.

²⁵Di nyaaŋa ka a yihi li bɛ nuhi maa ni n-zaŋ li pahi sara shɛli din yɛn nyo buɣim maa zuɣu n-zaŋ li nyo buɣim sara maligu bimbini maa zuɣu, ka di leei sara shɛli bɛ ni zaŋdi nyɔri buɣim ka di nyom tiɣiri Yawɛ nini.

²⁶“Ka a zaŋ Aduna maligumaana leebu piɛlaa nyɔɣu polo n-gahi zuɣusaa, ka di leei sara shɛli bɛ ni zaŋ gahi zuɣusaa Yawɛ tooni, ka di leeg’ a tarili.

²⁷“Ka a ti zaŋ binnyɔɣ’ shɛli a ni zaŋ gahi zuɣusaa maa mini maligumaaniba leebu piɛlaa maa gbalipuɣ’ shɛli a ni zaŋ gahi zuɣusaa maa ti Aduna min’ o bidibisi maa.

²⁸Di yɛn nyɛla Aduna min’ o bidibisi maa dihili ʒiɛmani kam ni. Ka Izraɛlnim’ yi mali suhudoo sara maligu ti Yawɛ, di simdi ni bɛ yihi li ti ba.

²⁹“Ka Aduna yi ti kani, yin’ zaŋmiy’ o binyɛr’ shɛŋa din be kasi maa ti o bidibisi maa ka bɛ ye, ka yi booi kpam bahi bɛ zuɣuri ni, ka bɛ leei maligumaaniba.

³⁰Ka o bi’ so yi ti leei maligumaana n-zan’ o ba zaani, o yi ti yɛn ka Yawɛ chirigibu shee suɣili ŋɔ ni na nti tum o tuma luɣ’ kasi ŋɔ shee, ŋun’ yɛm’ binyɛra maa daba ayopɔin.

³¹“Ka a ti zaŋ maligumaaniba leebu piɛlaa maa nimdi duɣi luɣ’ kasi shee maa.

³²Ka a chɛ ka Aduna min’ o bidibisi maa ŋubi nimdi maa mini bɔrɔbɔro shɛli din be piɛɣu puuni la Naawuni min’ o niriba laɣiŋgu suɣili ŋɔ dunol’ ni.

³³Di simdi ni bɛ kɔŋko nti di bindir’ shɛli bɛ ni zaŋ mali alahichi sanyoo sara bɛ maligumaaniba leebu saha maa. Amaa di bi simdi ka ŋun pa maligumaana ti di li, dama di nyɛla din be kasi.

³⁴Ka maligumaana leebu nimdi maa bee bɔrɔbɔro maa yi ti guui n-zani hal ka biɛɣu ti neei, dindina yin’ di lan ŋub’ li, yin’ zaŋmiya li nyo buɣim, dama di nyɛla din be kasi.

³⁵“Di simdi ka a zaŋ daba ayopɔin tum Aduna min’ o bidibisi maligumaaniba leebu tuma kaman n ni zal’ a shɛm maa.

³⁶Di simdi ni a ti kɔrigiri naɣilaa dabisili kam m-maani alahichi sanyoo sara. Di lan simdi ka a maani alahichi kpihimbu sara maligu bimbini maa kasitali zuɣu; ka booi kpam bahi di zuɣu m-mal’ li ka di niŋ kasi.

³⁷Zaŋm’ daba ayopɔin mali alahichi sanyoo sara, sara maligu bimbini maa zuɣu, ka sara maligu bimbini maa leei din be kasi zaa. Ka binshɛɣukam yi ti shihi sara maligu bimbini maa, di ni leei din be kasi.”

³⁸“Yi ni yɛn zaŋdi binshɛŋa maani sara bimbini maa zuɣu n-nyɛ: piɛbihi ayi bɛn paai yuuni dabisili kam, ka kul niŋdi lala sahakam.

³⁹Zaŋmiya piɛbil’ yino mali sara asiba, ka ti zaŋ piɛbil’ ŋun’ la mi mali zaawuni.

⁴⁰Ka yi yi ti yɛn zaŋ tuuli piɛbil’ maa mali sara maa, yin’ zaŋmiya zim viɛlli kilɔgiram yini mini kpa’ viɛlli lita yini gari taba n-zaŋ wain shɛli yi ni yɛn zaŋ booi bahi sara maligu bimbini maa zuɣu lita yini m-pahi mali sara maa.

⁴¹Ka yi ti lan zaŋ lala binyɛra maa m-pahi piɛbil’ ŋun la zuɣu m-mali sara zaawuni kaman yi ni pun mali shɛm asiba la. Ka di leei sara shɛli bɛ ni zaŋdi nyɔri buɣim, ka di nyom tiɣiri Yawɛ nini.

⁴²Di ni nyɛla sara shɛli bɛ ni yɛn zaŋdi nyɔri buɣim Yawɛ tooni Naawuni min’ o niriba laɣiŋgu suɣili dunol’ ŋɔ ni sahakam yi ʒiɛmana zaa ni. Di nyɛla luɣ’ shɛli m mini ya ni yɛn laɣim ka n tɔɣisi ya yɛtɔɣa nimaani.

⁴³Nimaani ka n yɛn kahigi mmaŋ’ wuhi Izraɛlnima, ka n jilima ni ti chɛ ka nimaani mali be kasi.

⁴⁴N ni ti mali Yawɛ chirigibu shee suɣili ŋɔ mini sara maligu bimbini ŋɔ ka di be kasi, ka lan mali Aduna min’ o bidibisi la gba ka bɛ be kasi, ka tumdi maligumaaniba tuma tiri ma.

⁴⁵N ni ti be Izraɛlnim’ sani n-nyɛ bɛ Naawuni.

⁴⁶Ka bɛ ti baŋ ni man’ Yawɛ n-nyɛ bɛ Naawuni ŋun daa yihi ba Ijipti tiŋgbɔŋ ni na ni n ti be bɛ sani. Man’ Yawɛ n-nyɛ bɛ Naawuni.”