Read Dagbani Yibu 3 Bible Online

Yibu 3 - Dagbani bible

Yibu 3

¹Musa daa gulila o deemba Jɛtro ŋun daa nyɛ Midian maligumaana la biŋkɔbbaligu maa. Ka o daa ti zaŋ ba ti kpe tiŋgban’ nɛli ni n-gari chaŋ Naawuni zoli din yuli booni Sinai[4] la gbini.

²Ka Yawɛ malaika daa ti puhi yi o zuɣu buɣim niɛm puuni tutuɣu ni, ka Musa daa lihi nya ka buɣim diri tutuɣu ni, amaa ka lee bi diri tutuɣu maa.

³Di saha ka Musa daa yɛli, “N ni birigi chaŋ ti nya lahizibu din chɛ ka buɣim maa bi diri tutuɣu maa.”

⁴Yawɛ ni daa nya ka Musa birigi kanna ni o ti nya li maa, ka Naawuni daa bol’ o tutuɣu maa ni, “Musa! Musa!” Ka o garigi yɛli, “N-nyɛ ma.”

⁵Di saha ka Naawuni daa yɛl’ o, “Di miri kpe na, pirigim a namda maa, dama a ni ʒe luɣ’ shɛli ŋɔ nyɛla luɣ’ kasi shee.”

⁶O daa lan yɛl’ o, “Mani n-nyɛ a yaannim’ Naawuni. Mani n-nyɛ Ibrahimma Naawuni; mani n-nyɛ Yisahaku Naawuni; mani n-nyɛ Yaakubu Naawuni.” Di saha ka Musa daa pɔb’ o nina, dama o daa zɔrila dabiɛm ni o yuuni Naawuni.

⁷Di saha ka Yawɛ daa yɛli Musa, “N nya n niriba bɛn be Ijipti la muɣisigu, ka wum bɛ fabila zaŋ chaŋ bɛ tuma zuɣulaannim’ ni niŋdi ba fitiina shɛŋa la polo. M mi bɛ wahalanim’ maa zaa.

⁸Dinzuɣu ka n kana ni n ti yihi ba Ijiptinim’ maa nuu ni, ka yihi ba tiŋgbɔŋ maa ni n-zaŋ ba tahi tiŋgban’ viɛlli din galisi ni; tiŋgban’ shɛli din mali bihim mini shiri pam,[5] ka nyɛ Keenannim’ mini Hitinim’ ni Amɔrinim’ ni Pɛrizinim’ ni Hivinim’ ni Jɛbusinim’ ni su tiŋgbɔn shɛli.

⁹Pumpɔŋɔ, nyama, n niriba Izraɛlnim’ maa fabila maa paai ma, ka n nya Ijiptinim’ maa ni tiri ba wahala shɛŋa maa zaa.

¹⁰ Dinzuɣu kamina ka n ti tim a Firawuna sani ka a chaŋ ti yihi n niriba Izraɛlnim’ maa Ijipti tiŋgbɔŋ maa ni.”

¹¹Amaa ka Musa yɛli Naawuni, “M mi lee nyɛ ŋuni n-chani Firawuna sani nti yihiri Izraɛlnim’ Ijipti tiŋgbɔŋ ni?”

¹²Ka o daa yɛli, “N ni be a sani. Dimbɔŋɔ mi n-yɛn nyɛ shihirili din wuhiri ni mani n-tim a, a yi ti yihi niriba maa Ijipti tiŋgbɔŋ maa ni na, yi ni ti jɛmdi man’ Naawuni zoli ŋɔ zuɣu.”

¹³ Di saha ka Musa yɛli Naawuni, “Ka n yi chaŋ ti yɛli Izraɛlnim’ maa, ‘Yi yaannim’ Naawuni n-tim ma yi sanna.’ Ka bɛ bɔhi ma, ‘O yuli lee booni bɔ?’ Man’ yɛlim’ ba wula?”

¹⁴ Ka Naawuni yɛli Musa, “Mani n-nyɛ Mani.” Ka lan yɛli yaha, “Yɛlim’ Izraɛlnim’ maa, ‘Mani[6] n-tim ma yi sanna.’ ”

¹⁵Ka Naawuni daa lan yɛli Musa, “Yɛlim’ Izraɛlnim’ maa ŋ-ŋɔ, ‘Yawɛ ŋun nyɛ yi yaannim’ Naawuni, Ibrahimma Naawuni ni Yisahaku Naawuni ni Yaakubu Naawuni la n-tim ma yi sanna. N yuli m-bala sahakam. Ʒiɛmani kam nim’ ni yɛn booni ma shɛm m-bala.

¹⁶Cham’ ti laɣim Izraɛl kpamba n-yɛli ba, ‘Yawɛ ŋun nyɛ yi yaannim’ Naawuni, Ibrahimma Naawuni ni Yisahaku Naawuni ni Yaakubu Naawuni n-yi n zuɣu ka yɛli ma, N nini nyan ya, ka nya yi ni diri wahala shɛŋa zaa Ijipti tiŋgbɔŋ ni.

¹⁷Ka n lo alikauli ni n ni yihi ya Ijipti tiŋgbɔŋ maa ni wahala maa ni n-zaŋ ya tahi Keenannim’ mini Hitinim’ ni Amɔrinim’ ni Pɛrizinim’ ni Hivinim’ ni Jɛbusinim’ tiŋgbɔŋ ni. Di nyɛla tiŋgban’ shɛli din mali bihim mini shiri pam.’

¹⁸“Di saha bɛ ni wum a yɛligu maa, ka a mini Izraɛl kpamba maa chaŋ Ijipti naa maa sani ti yɛl’ o, ‘Yawɛ ŋun nyɛ Hiburunim’ Naawuni la n-ka ti sanna, ti suhir’ a mi, pumpɔŋɔ chɛ ka ti chaŋ tiŋgban’ nɛli ni daba ata chandi nti mali sara ti Yawɛ ŋun nyɛ ti Naawuni maa.’

¹⁹M mi ni Ijipti naa maa ku chɛ ka yi chaŋ, naɣila n zaŋla kiŋkansi niŋ o.

²⁰N ni teegi n nuu n-tum alahiziba tuma n-darigi Ijiptinim’ maa tibili, di nyaaŋa ka o ni chɛ ka yi chaŋ.

²¹“N ni chɛ ka Ijiptinim’ niŋ ya nirilim din ni chɛ ka yi ku yi nimaani chaŋ ni nu’ zaŋa.

²² Izraɛl paɣ’ kam ni ti chaŋ o ʒiʒiinikpee sani bee o mini saan’ so ŋun laɣim be sani nti suh’ o anzinfa mini salima nɛma ni situra, ka yi zaŋ li niŋ yi bidibisi mini yi bipuɣinsi zaa din ni chɛ ka yi zaŋ Ijiptinim’ maa daazichi pam chaŋ.”